5
1 Bɛɛ Isirelibɑ, i swɑɑ dɑkio i nɔ ɡɔɔ swĩi yi nɑ mɔ̀ bɛɛn sɔ̃.
2 Bɛɛ be i wɔrumɛ temɔ nɡe wɔndiɑ be bɑ ɡu,
i ǹ mɑɑ seemɔ.
Goo sɑri wi u koo bɛɛ seeyɑ.
3 Domi Yinni Gusunɔ u ɡeruɑ u nɛɛ,
bɛɛn wuu ɡe ɡɑ tɑbu durɔbu nɔrɔbu (1.000) mɔ,
bɑ̀ n tɑbu dɑ, tɔmbu wunɔbuwɑ (100) bɑ koo wurɑmɑ.
Ge ɡɑ mɑɑ tɑbu durɔbu wunɔbu mɔ,
tɔmbu wɔkurɑ bɑ koo tiɑ.
I wurɑmɑ Gusunɔn mi
n sere dɑ̃kuru ko
4 Wee ye Yinni Gusunɔ u mɑɑ bɛɛ Isirelibɑ sɔ̃ɔmɔ.
U nɛɛ; ì n kĩ i n wɑ̃ɑ, wiyɑ i ko kɑsu.
5 I ku mɑɑ sɑ̃ɑru dɑ Betɛliɔ kɑ Giliɡɑliɔ kɑ Beri Sebɑɔ.
Domi u koo de bu Giliɡɑliɡibu yoru mwɛɛri.
Kpɑ bu Betɛliɡibu kɑm koosiɑ.
6-7 Bɛɛ be i rɑ ɡem ɡɔsie weesu,
kpɑ i kun mu ɡɑrisi ɡɑ̃ɑnu,
i nɑ wi, Yinni Gusunɔn mi,
kpɑ i wɑ i n wɑ̃ɑ,
kpɑ u ku rɑɑ bɛɛ Isirelibɑ wɔri u mwɑ nɡe dɔ̃ɔ.
Kpɑ i ɡoo biɑ Betɛliɔ wi u koo dɔ̃ɔ wi ɡo.
8 Yinni Gusunɔwɑ u kperi bwese bwesekɑ kuɑ,
mɑ u yen bɑɑyere yi yen ɑyerɔ.
U rɑ yɑm wɔ̃kuru ɡɔsie yɑm bururɑm.
Kpɑ u de sɔ̃ɔ sɔɔ ɡu tĩrɑ, ɡu ɡɔsiɑ wɔ̃kuru.
U rɑ nim wɔ̃kun nim mɛnnɛ,
kpɑ u mu yɛ̃kɑnɑ tem kpuro sɔɔ.
9 Wiyɑ u rɑ dɑmɡibun dɑm bue.
Kpɑ u de bu ben wusun ɡbɑ̃rɑnu kɔsuku.
Kɑ ɡem, win yĩsirɑ Yinni Gusunɔ.
10 Bɛɛ Isirelibɑ, be bɑ bɛɛ sirimɔ dee dee,
i rɑ n bu tusɑ,
kpɑ i n kɑ wi u ɡem ɡerumɔ kɔ̃ruɑ.
11 I rɑ bwɛ̃ɛbwɛ̃ɛbu dɑm dɔre,
i n ben ɡbeɑn dĩɑnu mwɛɛrimɔ kɑ dɑm.
Yen sɔ̃, i ǹ sinɑmɔ bɛɛn diɑ sɔɔ
ye i bɑnɑ kɑ kpee ni i dɑ̃kɑ.
Mɛyɑ i ǹ mɑɑ bɛɛn resɛm ye i duurɑn bii duronun tɑm nɔrumɔ.
12 Domi u bɛɛn torɑnu yɛ̃ nu kpɑ̃,
u mɑɑ yɛ̃ mɑ i durum kuɑ too.
I ɡemɡibu nɔni sɔ̃ɔmɔ.
I nɔm birɑn kɛ̃nu mwɑɑmɔ.
Mɑ i yinɑmɔ bu sɑ̃ɑrobu ben ɡem wɛ̃ siri yerɔ.
13 Sɑnɑm mɛni, sɑnɑm kɔ̃sumɑ.
Yen sɔ̃, wi u lɑɑkɑri mɔ, wiyɑ u ko n nɔɔ mɑɑri.
14 I de i n ɡeɑ mɔ̀ n kun mɔ kɔ̃sɑ.
Kpɑ i wɑ i n wɑ̃ɑ.
Nɡe mɛyɑ Gusunɔ wɔllu kɑ tem Yinni u ko n kɑ bɛɛ wɑ̃ɑ nɡe mɛ i rɑ ɡere.
15 I kɔ̃sɑ tusio kpɑ i ɡeɑ kĩɑ.
I de ɡem mu siribu di siri yerɔ.
Sɔrɔkudo Gusunɔ, wɔllu kɑ tem Yinni u koo bɛɛ Isirelibɑn tɔn be bɑ tiɑrɑ wɔnwɔndu kuɑ.
16 Yen sɔ̃, Gusunɔ wɔllu kɑ tem Yinni u ɡeruɑ u nɛɛ,
tɔmbɑ koo ɡɔɔ wuri ko yɑm kpuro,
kpɑ bɑ n sumɔ swɛɛ sɔɔ, bɑ n mɔ̀, wee, wee!
Bɑ koo ɡbɑɑ wukobu sokumɑ bu ɡɔɔ wooru sinɑ,
kpɑ bu ɡɔɔ swĩiɡibu mɛnnɑmɑ.
17 Sɑnɑm mɛ u koo bɛɛ wɔrimɑ,
kɑ be bɑ wɑ̃ɑ ɡberɔ kpuro bɑ koo ɡɔɔ swĩwɑ.
Yinni Gusunɔwɑ u yeni ɡeruɑ.
Yinni Gusunɔn siribun tɔ̃ru
18 Bɔ̃rurobɑ bɛɛ be i Yinni Gusunɔn siribun tɔ̃ru mɑrɑ.
Mbɑ i yĩiyɔ i wɑ tɔ̃ɔ te sɔɔ.
I n yɛ̃ mɑ tɑ ko n sɑ̃ɑwɑ yɑm wɔ̃kuru, n ǹ mɔ yɑm bururɑm.
19 I ko i n sɑ̃ɑwɑ nɡe tɔnu wi u ɡbee sunɔ dukɑ suurimɔ,
mɑ u kɑ yɑɑ ɡɔbɑ ɡɑɑ yinnɑ.
Ye u duɑ win dirɔ u ɡɑnɑ nɛnuɑ,
mɑ wɑɑ yɑ nùn dɔmɑ.
20 Yinni Gusunɔn tɔ̃ɔ te, tɑ sɑ̃ɑwɑ yɑm wɔ̃kuru n ǹ mɔ yɑm bururɑm.
Tɑ tĩriwɑ niki niki, yɑm bururɑm sɑri.
Sɑ̃ɑ te Yinni Gusunɔ u tusɑ
21 Yinni Gusunɔ u nɛɛ, u bɛɛn tɔ̃ɔ bɑkɑ ni i rɑ nùn diiye tusɑ.
U ǹ mɑm mɑɑ kĩ u bɛɛn mɛnnɔsun woo nɔ.
22 Ì n nùn yɑ̃ku dɔ̃ɔ mwɑɑrɑruɡiru kuɑ kɑ mɑɑ kɛ̃nu,
u ku rɑ nu mwɛ.
Mɛyɑ u ku rɑ mɑɑ bɛɛn siɑrɑbun yɑ̃kunu mɛɛri
ni i rɑ ko kɑ yɑɑ sɑbe ni nu ɡum mɔ.
23 I kɑ bɛɛn womusun wɔkinu doonɔ win bɔkun di.
U ǹ mɑɑ kĩ u bɛɛn mɔrɔkunun wurenu nɔ.
24 Adɑmɑ i de ɡem mu n wɑ̃ɑ bɛɛn suunu sɔɔ,
mu n kokumɔ nɡe nim mɛ mu ku rɑ kpe.
25 Bɛɛ Isirelibɑ, i kɑ kuɑ wɔ̃ɔ weeru ɡbɑburu sɔɔ, i nùn yɑ̃kunu kɑ kɛ̃nu kuɑre nɡe mɛ? 26 Bũu wi bɑ mɔ̀ Sɑkutu wi i ɡɑrisi bɛɛn sunɔ kɑ sere kperɑ ye i sɑ̃ɑmɔ i mɔ̀ Kewɑni, i nin bwɑ̃ɑroku ni i tii kuɑ sɔɔre nɡe mɛ i sɔɔwɑ ɡisɔ? Bɛɛn tii i yɛ̃ mɑ i ǹ koore mɛ.
27 Yen sɔ̃, u koo de bu bɛɛ yoru mwɛɛri
bu kɑ dɑ sere Dɑmɑsin berɑ ɡiɔ.
Wi, Gusunɔ wɔllu kɑ tem Yinniwɑ u yeni ɡeruɑ.
Bɑ koo Isirelibɑ kpeerɑsiɑ