AMƆSU
Amɔsu wi, u sɑ̃ɑwɑ yɑɑ sɑbenun kpɑro. Yɑɑ sɑbe niyɑ u kpɑrɑmɔ Yinni Gusunɔ u kɑ nùn sokɑ u kɑ bwese ni nu kɑ Isirelibɑ sikerenɛ sɔ̃ siri bi Yinni Gusunɔ u koo nu kuɑ. Amɔsun wɑɑti ye sɔɔ, Isirelibɑ bɑ dukiɑ mɔwɑ too, ɑdɑmɑ ben wɑ̃ɑsinɑɑ kɑ Gusunɔ yɑ biru wurɑ. Bɑɑ mɛ bɑ sɑ̃ɑru nɛni, ben ɡɔ̃ru ɡɑ ǹ wɑ̃ɑ te sɔɔ. Bɑ ǹ sɑ̃ɑrobu nɔɔrimɔ. Bɑ bwɛ̃ɛbwɛ̃ɛbu ɡem birɑmɔ. Bɑ tɔmbu tɑki dimɔ tenkurun swɑɑ sɔɔ.
N deemɑ sɑɑ ye sɔɔ, Asiriɡibɑ dɑm mɔ. Amɔsu u Isirelibɑ yɑɑyɑsiɑmɔ woodɑ ye Yinni Gusunɔ u Mɔwisi wɛ̃ ben sɔ̃ kɑ nɡe mɛ u bu yɑrɑmɑ sɑɑ Eɡibitin di. Yen sɔ̃, bɑ̀ kun Gusunɔ sɑ̃ɑmɔ kɑ ɡem, mɛm nɔɔbu sɑrirɑ bɑ mɔ̀. U mɑɑ bu sɔ̃ɔmɔ mɑ Yinni Gusunɔn siribu wee be sɔɔ.
Amɔsu u sɑ̃ɑwɑ Isirelibɑn bwese kɛrɑ wɔkurɑ yiru yen sɔmɔ dɑ̃ɑko wi Gusunɔ u bu ɡɔriɑ Asiriɡibu bu sere bu yoru mwɑ bu kɑ doonɑ.
Tire ten kpunɑɑ
1. Yinni Gusunɔ u koo win tɔmbu kɑ bwese tukunu siri, wiru 1n di sere wiru 2.
2. Isirelibɑn torɑnu kɑ kirɔ ye Yinni Gusunɔ u bu kuɑ, wiru 3n di sere wiru 6.
3. Kɑ̃sinu nɔɔbu, wiru 7n di sere wiru 9:10.
4. Yinni Gusunɔ u koo mɑɑ Isirelibɑ seeyɑ, wiru 9:11-15.
1
1 Amɔsu u sɑ̃ɑwɑ yɑ̃ɑ kpɑro Tekoɑɔ. Wiyɑ Yinni Gusunɔ u kɑ ɡɑri kuɑ Isirelibɑn sɔ̃, n kuɑ wɔ̃ɔ yiru tem mu sere yĩirɑ. Sɑɑ ye sɔɔ, Osiɑsiwɑ u bɑndu dii Yudɑɔ, mɑ Yeroboɑmu, Yoɑsin bii u mɑɑ bɑndu dii Isireliɔ. 2 Amɔsu u nɛɛ,
Yinni Gusunɔn nɔɔ ɡɑ nɔɔrɑmɔ Siɔnin ɡuurɔ Yerusɑlɛmuɔ.
Yɑkɑsu mɑɑ sɑri kpɑrɑ yenɔ,
mɑ ɡuu te bɑ mɔ̀ Kɑɑmɛli, ten wii kpiirɑ ɡberɑ.
Yinni Gusunɔ
u koo Siriɡibu sɛɛyɑsiɑ
3 Nɛ, Yinni Gusunɔ nɑ nɛɛ,
Dɑmɑsiɡibun torɑnu nu kpɛ̃ɑ.
Yen sɔ̃, nɑ ǹ nɛn himbɑ ɡɔsiɑmɔ.
Domi bɑ Gɑlɑdiɡibu tɑɑkɑ bɑ munkɑ.
4 Tɛ̃, kon de dɔ̃ɔ u nɑ u sinɑ boko Hɑsɑɛlin yɛnu wɔri,
kpɑ u Bɛni Hɑdɑdin sinɑ kpɑɑru di mɑm mɑm.
5 Kon ben wuu Dɑmɑsin ɡbɑ̃rɑrun ɡɑmbobɑ kɔsuku,
kpɑ n Bikɑti Afɛnin tɔmbu kpeerɑsiɑ.
Kpɑ n Bɛti Edɛnin sunɔ ɡo.
Kpɑ n de bu Siriɡibu yoru mwɛɛri bu kɑ dɑ Kiriɔ.
Nɛ, Yinni Gusunɔwɑ nɑ yeni ɡeruɑ.
Yinni Gusunɔ
u koo Filisitibɑ sɛɛyɑsiɑ
6 Nɛ, Yinni Gusunɔ nɑ nɛɛ,
Filisitibɑn torɑnu nu kpɛ̃ɑ.
Yen sɔ̃, nɑ ǹ nɛn himbɑ ɡɔsiɑmɔ.
Domi bɑ Isireli dɑbi dɑbinu yoru mwɛɛrɑ
bɑ Edɔmubɑ nɔmu bɛriɑ.
7 Mɛyɑ kon de bu ben wuu Gɑsɑ dɔ̃ɔ sɔku,
kpɑ u yen dii ɡeenu di.
8 Kon Asidɔdun tɔmbu kɑ Asikɑlonin sunɔ kpeerɑsiɑ.
Kon Ekoroniɡibu wɔri.
Kpɑ Filisiti be bɑ tie mi kpuro bu kɑm ko.
Nɛ, Yinni Gusunɔwɑ nɑ yeni ɡeruɑ.
Yinni Gusunɔ
u koo Fenisibɑ sɛɛyɑsiɑ
9 Nɛ, Yinni Gusunɔ nɑ nɛɛ,
Fenisibɑn torɑnu nu kpɛ̃ɑ.
Yen sɔ̃, nɑ ǹ nɛn himbɑ ɡɔsiɑmɔ.
Domi bɑ Isireli dɑbi dɑbinu yoru mwɛɛrɑ
bɑ Edɔmubɑ nɔmu bɛriɑ.
Bɑ ǹ ben ɑrukɑwɑni yibie ye bɑ rɑɑ kɑ bu bɔkuɑ.
10 Yen sɔ̃, kon de bu ben wuu Tiri dɔ̃ɔ sɔku,
kpɑ u yen dii ɡeenu di.
Yinni Gusunɔ
u koo Edɔmubɑ sɛɛyɑsiɑ
11 Nɛ, Yinni Gusunɔ nɑ nɛɛ,
Edɔmubɑn torɑnu nu kpɛ̃ɑ.
Yen sɔ̃, nɑ ǹ nɛn himbɑ ɡɔsiɑmɔ.
Domi bɑ ben mɛro bisibu Isirelibɑ nɑɑ swĩi kɑ tɑkobi.
Bɑ ǹ bu wɔnwɔndu kue.
Ben mɔru kun mɑɑ sure.
Mɑ bɑ kɑ bu wɛrɛru sɑ̃ɑ dim dim sɑɑ kpuro.
12 Yen sɔ̃, kon de bu ben wuu Temɑ dɔ̃ɔ sɔku
kpɑ u Botisirɑn dii ɡeenu di.
Yinni Gusunɔ
u koo Amɔnibɑ sɛɛyɑsiɑ
13 Nɛ, Yinni Gusunɔ nɑ nɛɛ,
Amɔnibɑn torɑnu nu kpɛ̃ɑ.
Yen sɔ̃, nɑ ǹ nɛn himbɑ ɡɔsiɑmɔ.
Domi bɑ ɡuriɡibun nukunu bɛsukɑ Gɑlɑdiɔ,
sɑɑ ye bɑ Gɑlɑdiɡii ben tem mwɑɑmɔ
beɡim mu kɑ yɑsiɑn sɔ̃.
14 Yen sɔ̃, kon de bu ben wuu Rɑbɑ tɑbu wɔri bu ye dɔ̃ɔ sɔku,
kpɑ u yen dii ɡeenu di mɑm mɑm.
Sɑɑ ye sɔɔ, tɑbun wurenu koo nɔɔrɑ nɡe woo bɔkɔ.
15 Kpɑ bu ben sinɑ boko kɑ win tɑbu sinɑmbu yoru mwɛɛri.
Nɛ, Yinni Gusunɔwɑ nɑ yeni ɡeruɑ.
Yinni Gusunɔ
u koo Mɔɑbubɑ sɛɛyɑsiɑ