1 No Gabbarum Aláemit gúᵽuren me bajeker babu butogen ni búuba bal élebur yay, ni ᵽanor dó n’émit cem ᵽio maa. 2 Ᵽúrto, nijuh emalakaay gaamme futoh ni gúuba gaiye me bújoŋor Aláemit. Ni gusenil úturuᵽa wono futoh n’úuba guogen.

3 Ni baj amalaka ace ájoul ak’ailo to ni físimenum fafu. Naogen gájuj gaaᵽiaᵽ ni éurus dó nihi gusaen me batiŋoa. Ni gusenol batiŋoa bammeŋe min mb’áji bo manur ni ulaw waw waa bugan bugagu ᵽe bugal Aláemit to ni físimenum fafu fal éurus yay faamme bújoŋor efenjeŋ yay yaa jávi jaju. 4 Fakor fafu faa batiŋoa babu ni fúᵽur ni gájuj gagu go amalaka ahu átuh me fitebor mbaa fatiya bújoŋor Aláemit, manur n’ulaw waw waa bugan bugagu bugal Aláemit. 5 Ᵽúrto, amalaka ahu nátuh gájuj gagu, náŋarul sambun ni físimenum fafu ammeŋen go, aban náhanul go gúloul n’ettam. No guloulo me n’ettam, ni faen baj guᵽaranu, gurim, baijer-émit ni gagoror-ettam.

6 Ñer emalakaay gaamme futoh ni gúuba gaogen me úturuᵽaaw waamme futoh n’úuba ni gugoror bi eoh wo.

7 Amalaka ahu átiar ahu naoh gáturuᵽaol. Ñer gutesa ni sambun ságuñore ni físim ni sihat ni súloul n’ettam : gajis ganur ni úfaji wal ettam yay ni gusa, gaŋas ganur ni úfaji wal ununuh waw ᵽoᵽ ni gusa, mafos mamu ᵽe may maroŋ me ni musa.

8 Ᵽúrto, amalaka ahu áutten ahu naoh gáturuᵽaol. Ñer ni baj waf uce wanogore ti firijaŋ fámah faam n’esa ulo ni fal fafu : gajis ganur ni úfaji waa fal fafu ni gúbahen gúni físim, 9 gaŋas ganur ni úfaji waa báuwener babu ᵽe baamme ni fal fafu ni guĉet, gaŋas ganur ni úfaji wal uracaaw ni guhajen may.

10 Amalaka ahu áfatten ahu naoh gáturuᵽaol. Ñer ni baj eut yámah yasae ti bíniᵽ baa sambun éloul fatiya bi n’ettam. No eĉih me, nelo ni gaŋas ganur ni úfaji waa siral sasu ni súbula mal sasu. 11 (Eut yauyu gajow yo "Bisih Bátalie".) Ñer gaŋas ganur ni úfaji waa mal mamu ni gúbahen gútali mátali, ban gammeŋe ni bugan bugagu garem me mal maumu ni guĉet mata misigisih.

12 Amalaka ahu abarigen ahu naoh gáturuᵽaol. Ñer gaŋas ganur ni úfaji waa tinah talu, ni ganur ni úfaji waa fieñ fafu ni ganur ᵽoᵽ ni úfaji waa suut sasu ni sugori bireg gaŋas ganur ni úfaji waa maŋannoe mamu mala so ni múkasulo, yaĉil me min gaŋas ganur ni uŋas waw úfajiaw waa maŋannoe mamu mal etufunahaay ni ᵽoᵽ ganur ni uŋas waw úfajiaw waa maŋannoe mamu mal efugaay ni sillim.

13 Ñer niluj, nijuh fúmunjuh fíit fatiya-tiya, ban niun fo nihi fuoh ni firim fajile : « Mataño, mataño, mataño bi ni bugan bugagu gaĉin me n’ettam yay, mala wajae me ebaj no emalakaay gúfaji bugagu gaŋaño bo me gujae me may eoh úturuᵽail. »