11
Paa pa miŋkwentie
1 Pi ni mfɛ muuŋ thɨ fɨ̄ʼɨ yaoŋ vəɨ a pɔ nɔ mbìe, yichəɨ ŋoŋ chhu vəɨ ŋa, “Lɔllɔ mfɨ̄ʼɨ Nda Minnwi pugu pa lɨʼɨ fɛʼiŋgiɛŋ pugu pa ŋgwa ŋa pugu thɔ ŋgaʼo Minnwi moŋ ghɔ nɛ. 2 Ndɔ kiʼi mfɨ̄ʼɨ yɨna ŋa a pɔ mbhi Nda Minnwi nthɛ ŋa pi kwo fɛ yie ghɔ ni pa laʼataoŋ ndɔ pugu shi nɨ̄ɨ laʼataoŋ taoŋtaoŋ laʼo kwò pugu nɔ khwɛ wuŋ nàoŋ ni nàoŋ yi paa. 3 Ǹshi mfɛ njɨ ni paa pa miŋkwentie paŋ pugu yəɨ nnu mfɨ̄ʼɨ nɔ taʼa ŋkaŋ ni paa ŋkɨɨ ni ntɨgao wuŋ llɛmbhi. Pugu shi mbɔ moŋ ndhwí ywei gu.”
4 Yei paa pa thɨ olive pugu pa paa yaoŋ tigi laŋ ŋa a thi shhɨ Taathɔ ŋa a ghà nshaʼa ŋkuoŋ shhɛ nɛ. 5 S̈hesheŋoŋ ntāʼa nu ndəɨŋ vugu, móŋoŋ taoŋ nchò pugu nshiʼi mimbɨna yugu, moŋ yei shɛndaoŋ, s̈hesheŋoŋ ntāʼa nu nchwīe nnu ŋgəʼɨ mbɨŋ pugu pi jwi vugu nɛnnɛ. 6 Pugu fāʼo ghrɨ́ nɔ fɨ̄nɨ nu po, nnɛ ŋa kiʼi mbɨ̀ llɔ moŋ llɛ́ pighɔ ŋa pugu thɔ nchhu pa nnu ŋa pugu yəɨ nɛ, ndɔ pugu fāʼo njɨ mbɨŋ pa ŋkhǐ nɔ kara nu vugu pugu gū chhǐ pugu pa māʼaŋ nu ŋguoŋ ŋkwaŋ ŋgəʼɨ ghao ŋkuoŋ shhɛ moŋ sheshe ndɨɨ haʼaŋ pugu khwā nɛ.
7 Pugu shi ŋga ŋkwo mīʼɛŋ ni chīi nu ŋkɨ̀nɨ yugu, minyieŋ pɨphɨ yɛ ŋa a taoŋ moŋ shiŋ ki ndugwi yi nɛ, māʼaŋ vugu ni nchhɔ̀, ŋgaʼa vugu, ndɔ njwi vugu. 8 Pa khu yugu nūaŋ shɛndaoŋ moŋ mmɛ laʼataoŋ ŋa nɔ lì, pi mɛ̄iŋ ni “Shodoŋ” ki “Ijipti,” mbɔ lɨʼɨ ŋa pi ni ŋkwīŋ Taathɔ vugu ŋkuoŋ wáʼa nɛ. 9 Nɔ trɛi llɛ́ ni ghrà yi pichəɨ llɔ shɨna kɨ́rɨ pa ŋgwa pugu pa kɨ́rɨ ndaaŋoŋ, pugu pa chrà taoŋ taoŋ, pugu pa laʼataoŋ shi mbɛʼi khu pugu ndɔ ndāa nɔ mieŋ nu pi twei vugu. 10 Ŋgwa pɛ ŋa pugu chhɔ ŋkuoŋ shhɛ nɛ shi mfāʼo pwanjuʼɔ nthɛ vugu, nchwīe pa jɨ, ntaoŋ pa yaoŋ fɛ́ ni noŋ pugu, nthɛ ŋa paa pa njəɨlɨʼɨ Minnwi pei ni mbɔ pa thɔpaʼo ni ŋgwa pɛ ŋa pugu ni nchhɔ nu ŋkuoŋ shhɛ.
11 Ndɔ trɛi llɛ́ ni ghrà yi ghɔ ni ŋga ntɔgɔ, jijwɛ chɔmbhi llɔ mbhɔ Minnwi nii mbɨŋ pugu, pugu lɔllɔ ntithi ŋkuoŋ kwò muŋu, ŋkiɛŋ mmɛ pɔgɔ gu wɛ̄iŋ ŋgwa pɛ ŋa pugu ni njəɨ vugu nɛ. 12 Nnɛ, ŋkiɛŋ mmɛ ŋggì taoŋ po, nchhu nu ni pugu ŋa, “P̂əɨ kuʼɔ hɛiŋ!” Pugu kuʼɔ po moŋ lúluŋ pa mbɨ̌na pugu pɛʼi nu.
13 Wuʼɔ ndɨɨ ghɔ, shhɛ chɨ̄ʼɨ ŋkiɛŋ yie ghɔ nshɨna, taʼa ghrà moŋ laʼataoŋ ghɔ nɔ haʼaŋ ɔ̈ ŋgrā wuŋ lɨʼɨ a pɔ yie ghɔ nɛ, gū shhɛ. Khwachəɨ ŋkaŋ ŋgwa ni ŋkhu nɔ haʼaŋ shhɛ ghɔ ni nchɨʼɨ ŋkaʼa nɛ, pɨgəɨ yugu fāʼo mmɛ pɔgɔ gu, pugu fɛ ndighaʼo ni Minnwi po.
14 Mbra ŋgəʼɨ ghɔ kwo tɔgɔ, līi njəɨ, yi trɛi thɔ nu nɔ kuo ndɨɨ.
Ntàŋ ŋgaŋ ntaoŋ Minnwi mbɔ ŋgaŋ khwachəɨ shɨ̀na
15 Nnɛ, ŋgaŋ ntaoŋ Minnwi mbɔ ŋgaŋ khwachəɨ shɨ̀na tua ji ntàŋ pa mmɛ ŋggì, chhu nu po ŋa,
“Shaʼafuoŋ ŋkuoŋ mbhi gū Shaʼafuoŋ Taathɔ via pugu yi Ju ŋa Minnwi Chuʼɔ Ntaoŋ nɔ Ŋkwe nɛ,
a shi nshaʼa nɔ ŋguoŋ ndɨɨ ghao.”
16 Paa wuŋ thishɨ chɨɨchɨɨ ni yi khwɛ ŋa pugu ni nchhɔ ŋkuoŋ pa faaŋ pugu shhɨ Minnwi nɛ, gū ni miŋi muŋu shhɛ ŋgaʼo Minnwi, 17 nchhu nu ŋa,
“Pigi fɛ tōo nu vɛ ma Minnwi Taathɔ
ŋa a chaa ŋguoŋ njɨ nɛ, ŋa a pɔ, ndɔ ni mbɔ
nthɛ ŋa ɔ kwo kwe mmɛ ghrɨ́ yɔ
ndɔ njɛ̄ shaʼa nu.
18 Pa laʼataoŋ fāʼo pɨgɨtua,
ndɔ pɨgɨtua yɔ ni nthɔ,
mbɔ ndɨɨ ŋa pi shi nshaʼa ŋgwa ŋa pugu kwo khu nɛ.
Ndɨɨ thɔ nɔ kɨ̄nɛiŋ nu puoŋ fàʼa pɔ,
mbɔ pa njəɨlɨʼɨ pɔ pugu pa ŋgwa pɔ,
mbɔ ŋgwa pɛ ŋa pugu pɔgɔ ghɔ nɛ,
pa miŋkwasha pugu pa ŋgwa liɛŋliɛŋ.
Ndɨɨ kwo thɔ nɔ pɨrɨ nu ŋgwa pɛ haʼaŋ pugu pɨrɨ ŋkuoŋ shhɛ nɛ.”
19 Nnɛ, Nda Minnwi po chuʼɔ, pi yəɨ ŋkùŋ nūʼɔŋ kɨ̀na yi pugu pa ŋgwa moŋ Nda ju Minnwi. Pa fiembɨ ni nshēi nu, ndɔ nduo nu, pa luo nu miwara mbɨ̀ pɨnɨ mbɔ, shhɛ shɨna, mmɛ wěi gū.