1 Ǹjəɨ yichəɨ taʼa tɨtɨnɨ ŋgaŋ ntaoŋ Minnwi shwiʼi nu shhɛ llɔ moŋ po, ndiŋ moŋ lúluŋ, jijwɛ ŋguŋnnu nnu pɔ tɔthɨ thɔ yu, miŋi mi pɔ nɔ minaoŋ, kwò mi pɔ nɔ ləɨ móŋoŋ. 2 A tuo muuŋ mi ŋwaʼaŋlɨ mbhɔ yu ŋa a ni mbɔ yi ŋaʼaŋ. A tigi ŋgei kwò yi yi jɨ ŋkuoŋ ŋkhǐ, yi ŋkwrɛi pɔ ŋkuoŋ shhɛ, 3 a kə̄ɨ ni mmɛ ŋggì ŋa a pɔ nɔ yi paʼo ndɨɨ ŋa a phɔ̄ nɛ. A ni ŋga mɛ̄iŋ, khwachəɨ miwara mbɨ̀ wara.

4 Khwachəɨ pa miwara mbɨ̀ pighɔ ni ŋga ŋgwara, mi ni ŋkwo tāʼa nāʼaŋ, ndɔ njaʼo ŋggì llɔ po a chhu nu ŋa, “Lə̄ɨŋ nnu ŋa khwachəɨ pa miwara mbɨ̀ pighɔ chhu nɛ, ki lɔ njiʼi nāʼaŋ shhɛ.”

5 Ŋgaŋ ntaoŋ Minnwi ŋa mi ni njəɨ vi a thi ŋkuoŋ ŋkhǐ pugu ŋkuoŋ shhɛ nɛ kə̄rə ŋgei mbhɔ yi yi jɨ po, 6 nshwrɛ̄i ni ligi Minnwi ŋa a yi maoŋ ki lɔ ma ŋkhu nɛ, ŋa a chwīe po pugu pa yaoŋ ŋa a pɔ moŋ ghɔ nɛ, nchwīe shhɛ pugu pa yaoŋ ŋa a pɔ moŋ ghɔ nɛ pugu pa ŋkhǐ ni pa yaoŋ ŋa a pɔ moŋ ghɔ nɛ, ŋa, “Mbaʼa yīri nu nuʼuŋ mbɔ. 7 Ndɔ ŋgaŋ ntaoŋ Minnwi mbɔ ŋgaŋ khwachəɨ shɨna shi ŋga ntua ntàŋ yi, kaŋ Minnwi shi nchwīe nnu lə̄ɨŋ ŋa a ni ŋkāʼa nɛ. A shi ndɔ̄gɔ lɨʼɨ pi wuʼɔ nɔ haʼaŋ a ni nchīi ni puoŋ fàʼa pi mbɔ pa njəɨlɨʼɨ Minnwi.”

8 Nɛnnɛ, ŋggì ŋa ŋki yaʼo llɔ po nɛ chrā vəɨ ŋkamuʼɔŋ, nchhu nu ŋa, “Ghə̄ɨ ŋkwe ŋwaʼaŋlɨ ŋa a yi ŋaʼaŋ mbhɔ ŋgaŋ ntaoŋ Minnwi ŋa a thi ŋkuoŋ ŋkhǐ pugu shhɛ nɛ.”

9 Nnɛ, ŋ̀gə̄ɨ mbara ŋgaŋ ntaoŋ Minnwi ghɔ nchhu ghɔ ŋa a fɛ muuŋ mi ŋwaʼaŋlɨ ghɔ vəɨ. A chhu vəɨ ŋa, “Kwe ŋkru, a shi nchwīe moŋ puŋ yɔ llwī, ndɔ moŋ nchò yɔ shi ndɨ̄ŋ pi nɔ llɔ̌.” 10 Ŋ̀kwe muuŋ ŋwaʼaŋlɨ ghɔ mbhɔ ŋgaŋ ntaoŋ Minnwi ghɔ ŋkru. A ni ndɨ̄ŋ pi nɔ llɔ̌ moŋ nchò a, ndɔ ŋ̀ga ŋkwo kru, a chwīe puŋ a llwī.

11 Pi chhu vəɨ ŋa, “Ɔ shi mbɨnɨ nuʼuŋ nchhu ŋkɨ̀nɨ Minnwi nthɛ ntou pa ŋgwa pugu pa taoŋ taoŋ pugu ŋkwaŋ ŋkwaŋ chrà pa taoŋ pugu pa fùoŋ.”