8
Mɨkánda yéme ledre
1 Sɨmɨ tụ́ꞌdụ́ ledre ga bɨ ꞌdodozé yée zɨ́se ní za mbá, ídísé ówo a kɨ́dí wo bɨ nɨ kɨ́ rokoꞌbụné ní, nɨ kɨ́dí Yésụ nɨ mongụ́ ꞌyị ꞌdáná éyị́, nɨyí cakaba mɨndị́sịyé kɨ́ Lomo do bi kị́éꞌdo komo ere. 2 Nɨ ndị́sị ꞌdáná éyị́ sɨmɨ mbigí ꞌDị́cị́ ꞌbɨ Lomo bɨ komo ere ní. Mbigí ꞌDị́cị́ née Ngére ụbụ́ ne, ndaá ꞌbɨ ené ꞌyịmaꞌdí wá.
3 Káa zɨ́ bɨ mongụ́ ꞌyị ꞌdáná éyị́ ndị́sị íꞌbí tákpásị́lị́ e kpá kɨ́ ꞌdáná éyị́ e ní, Yésụ bɨ nɨ kpá mongụ́ ꞌyị ꞌdáná éyị́ ní, nɨ kpá íꞌbí ꞌbɨ ené éyị́ zɨ́a kpá ꞌdáná éyị́. 4 Idí Yésụ maꞌdáa nɨ kóo ba do sogo káṇgá ona yá, káa bɨ sị́ ledre bɨ zɨ́a kpá ídíne ꞌyị ꞌdáná éyị́ gɨ roa ní ndaá, gɨ zɨ́a ꞌyị ꞌdáná éyị́ e nɨyí yị́ eyé goó bo ndị́sịnɨ́ ꞌdáná éyị́ kacɨ́ lorụ bɨ ꞌbɨ Mụ́sa ní. 5 Moko ꞌbɨ ꞌdáná éyị́ bɨ ndịsịnɨ́ méngị a sɨmɨ ꞌDị́cị́ ꞌbɨ Lomo do sogo káṇgá ona ní, nɨ lá dụụ́ lị́lị moko ꞌbɨ ꞌdáná éyị́ bɨ komo ere ní. Née sị́ ledre bɨ sɨmɨ bɨ kóo Mụ́sa nɨ ndị́sị ụ́bụ́ kụ́tụ́ gɨ ro ndị́sị íni ini zɨ́ Lomo sɨmɨ a, zɨ́ Lomo kóo ésị sị́lị́ne komo a kɨ́dí, “Ídí méngị moko ga gére née tɨ́ za cé káa zɨ́ bɨ kóo máúku ledreyé zɨ́yị do landa bɨ Sináyi ní.” 8:5 Ólụ́ógụ 25:40 6 Moko ꞌbɨ ꞌdáná éyị́ bɨ Lomo iꞌbí zɨ́ Yésụ méngị a ní, romo do ꞌbɨ ngíti géyị ꞌyị ꞌdáná éyị́ e go mbá. Kpá káa zɨ́ mɨkánda ledre bɨ Lomo yeme gɨ rozé ní, nɨ kɨ́ ledrené owóowó rómo do kuṛú a bɨ kóo ꞌdáꞌdá ní mbá. Gɨ zɨ́a Yésụ toro ꞌdáꞌdá ne.
7 Idí mɨzefị yéme ledre kóo ꞌdáꞌdá ní mengị kóo moko bo bɨlámáne, káa bɨ Lomo yeme ené kóo ngíti mɨkánda ledre wá. 8 Lomo owo bú bɨlámáne kɨ́dí ledre kóo née yeme ní, ꞌyịmaꞌdí e nderénɨ́ eyé kacɨ́ a wá, gɨ zɨ́ kéyị née ní, zɨ́a úku ledre kɨ́dí,
“Sịndị́ kadra nɨ ógụ,
zɨ́ma yéme mɨkánda mɨyéme ledre
kɨ́ kúfú Isɨréle
kpá kɨ́ bulúndu Zụ́da e.
9 Mɨkánda ledre bɨ mááyí yéme a ní nɨ kpị́ gɨ zɨ́ wo bɨ kóo
máyéme gɨ ro bulúndusé e
sɨmɨ bɨ máútú zɨ́ye ꞌdáꞌdá
zɨ́ma ꞌdíꞌbiógụ yée gɨ sɨmɨ Ízibiti ní.
Gɨ zɨ́a ledre bɨ máyéme gɨ royé ní ndaá ꞌbɨ ené zɨ́ye kɨ́ ledrené owóowó wá.
Gɨ zɨ́a bɨ mengịnɨ́ ledre kenée ní, zɨ́ma óyó sogomá zɨ́ye.
10 Ba nda go mɨkánda mɨyéme ledre bɨ mááyí yéme a kɨ́ ꞌyị ꞌbɨ Isɨréle e
gɨ kacɨ́ a ba.
Mááyí ꞌdódo lorụ amá e zɨ́ye ówoyéme a,
zɨ́ cíyí a ólụ́ne ngị́rị sɨmɨ mɨmbéꞌdeyé.
Nda née zɨ́ma ídíma Lomo bɨ zɨ́ye ndị́sịyé óto úndru a,
gɨ zɨ́a nɨyí go ꞌyị amá e.
11 Nda gɨ ore, ꞌyị bɨ nɨ ídíáká yaá owoyeme máa káa do Ngére eyé wá,
ili kpá fú do ꞌdódo ledre amá zɨ́ne ní ndaá.
Nɨyí go za mbá ꞌyị ga bɨ owoyemenɨ́ máa go ní,
mɨngburoko ꞌyị e kɨ́ mɨnzéré owụ́ e mbá.
12 Gɨ zɨ́a bɨ owoyemenɨ́ máa go ní, ledre ga bɨ kóo luyúnɨ́ yée ꞌdáꞌdá ní mbá máótoómo yée go mbá,
mááyí lụ́lụóyó yée gɨ royé za mbá ꞌdáꞌba.” 8:12 Yeremáya 31:31-34
13 Ledre máa wo bɨ Lomo yeme ba ní, nɨ mɨkánda yéme ledre. Gɨ zɨ́a ledre máa wo bɨ kóo yeme ꞌdáꞌdá née nɨ yị́ eyé go kuṛúne, moko ndaá lolụ sɨmɨ a wá nɨ ụ́kụ́ ené mɨụ́kụ́.