1 एबे मां तिना सवालो रा जवाब देणा जो तुसे चिट्ठी लिखी की मांते पूछेया, “क्या लोका खे ब्या करना ठीक ए?” 2 इजी रे बारे रे मेरा बिचार ये ए कि व्याभिचारो रे डरो ते हर एक मर्दो री लाड़ी और लाड़िया रा लाड़ा ओ। 3 लाड़ा आपणी लाड़िया रा अक्क पूरा करो और तिंयाँ ई लाड़ी बी आपणे लाड़े रा अक्क पूरा करो। 4 लाड़िया खे आपणे शरीरो पाँदे अक्क निए, बल्कि तेसा रे लाड़े रा अक्क ए, तिंयाँ ई लाड़े खे बी आपणे शरीरो पाँदे अक्क निए, पर लाड़िया राए। 5 तुसे एकी दूजे ते लग नि रओ, पर कुछ बखतो तक आपू बीचली रजाबंदिया ते कि प्रार्थना खे बखत मिलो। फेर साथे रओ, एड़ा नि ओ कि तुसा रे असंयमे की शैतान तुसा खे परखो। 6 आऊँ जो ये बोलूँआ से सिर्फ सलाह ए पर आज्ञा रे तौरो पाँदे निए। 7 आऊँ ये चाऊँआ कि जेड़ा आऊँ अया, तेड़े ई सब मांणू ओ, पर हर एकी खे परमेशरो री तरफा ते खास-खास बरदान मिली रे, केसी खे केड़ा और केसी खे ओरी तरअ रा।

8 पर आऊँ कुआँरे और बिदुआ रे बारे रे बोलूँआ कि तिना खे एड़े ई रणा ठीक ए, जेड़ा आऊँ ए। 9 पर जे सेयो संयम नि करी सको, तो ब्या करी लो, कऊँकि ब्या करना कामातुर रणे ते ठीक पला ए।

10 जिना रा ब्या ऊई चुके रा, तिना खे आऊँ नि, पर प्रभु आज्ञा देओआ कि लाड़ी आपणे लाड़े ते लग नि रओ। 11 और जे लग बी ऊई जाओ तो बिना दूजे ब्याओ ते रओ या आपणे लाड़े साथे फेर मेल-जोल करी लो और ना ई लाड़ा आपणी लाड़िया खे छाडो।

12 दूजे खे प्रभु नि पर आऊँ ई बोलूँआ, जे केसी विश्वासी पाईए री लाड़ी आसा रे प्रभुए रे विश्वास नि राखदी ओ और तेस साथे रणे ते खुश ओ, तो से तेसा खे नि छाडो। 13 और जेसा विश्वासी जवाणसा रा लाड़ा आसा रे प्रभुए रे विश्वास नि राखदा ओ और तेसा साथे रणे ते खुश ए, से लाड़े खे नि छाडो। 14 कऊँकि एड़ा लाड़ा जो विश्वास नि राखदा ओ, से लाड़िया री बजअ ते पवित्र ठईरोआ और एड़ी लाड़ी जो विश्वास नि राखदी, लाड़े री बजअ ते पवित्र ठईरोई, नई तो तुसा रे बाल-बच्चे अशुद्ध ठईरदे, पर एबे पवित्र ए।

15 पर जो मर्द विश्वास नि राखदा, जे से लग ऊणा चाओआ, तो लग ऊणे देओ, एड़ी दशा रे कोई बी विश्वासी पाई या बईण बंदनो रे निए, पर जे ऊई सको तो आपणे अविश्वासी लाड़े या लाड़िया साथे ब्याओ रे बंदनो रे बणे रे रओ कऊँकि परमेशरे आसे मेल-जोलो खे बुलाई राखे। 16 ओ लाड़ियो! तुसे याद राखो कि तुसा री बजअ ते तुसा रे लाड़े उद्धार पाई सकोए और ओ लाड़ेयो! तुसे बी याद राखो कि तुसा री बजअ ते तुसा री लाड़िया उद्धार पाई सकोईया।

17 जो आँऊ बोलणे लगी रा तिजी रा निचोड़ ये ए कि हर एक मांणू जेसा बी दशा रे परमेशरे बुलाई राखेया तिजी रेई बणेया रा रओ और तिजी रे मुताबिक ई आपणी जिन्दगी जिओ। आँऊ सबी मण्डल़िया खे येई नियम ठराऊँआ 18 जे प्रभुए रे विश्वास करने ते पईले केसी रा खतना ऊई चुकी रा तो से बिना खतने रा नि बणो। जे प्रभुए रे विश्वास करने ते पईले केसी रा खतना नि ऊई रा ओ तो से खतना नि कराओ। 19 ना खतना कुछ अया और ना बिना खतने ते, पर परमेशरो री आज्ञा खे मानणा ई सब कुछ ए। 20 हर एक मांणू जेसा बी दशा रे परमेशरे बुलाई राखेया तिजी रेई बणेया रा रओ।

21 जे तूँ दासो री दशा रे बुलाई राखेया, तो चिन्ता नि कर। पर जे दासत्व ते आजाद ऊणे रा मौका मिलो तो एते मौके रा फाईदा जरूर उठा। 22 कऊँकि जो दासो री दशा रे प्रभुए रे बुलाई राखेया, से प्रभुए रा आजाद कित्ते राए और तिंयाँ ई जो आजादिया री दशा रे बुलाई राखेया, से मसीह रा दास ए। 23 परमेशरे बऊत बड़ी कीमत चुकाई की तुसे मोले लयी राखे, मांणूआ रे दास नि बणो पर परमेशरो रे दास बणो। 24 ओ साथी विश्वासियो, जो जेड़ी दशा रे बुलाई राखेया, से तिदे ई परमेशरो साथे रओ।

25 कुआँरिया रे बारे रे प्रभुए री कोई आज्ञा माखे नि मिली, पर प्रभुए आपणी दया ते माखे ज्ञान देई राखेया जेते पाँदे परोसा करेया जाई सकोआ और तिजी रे मुताबिक आँऊ राय देऊँआ। 26 आँऊ समजूँआ कि आज-काल के क्ल़ेशो रे येई अच्छा ए कि मांणू जेड़ी दशा रे आए, तेड़ी ई दशा रई रओ। 27 जे तेरी लाड़ी आए, तो तेसा ते लग ऊणे री कोशिश नि कर। जे तेरे लाड़ी निए, तो लाड़िया री टोल़ नि कर 28 फेर बी जे तूँ ब्या बी करे, तो इदे कोई पाप निए। जे कोई कुआँरी बेटिया ब्या करोई तो से पाप नि करदी। पर एड़े लोका खे एस जिन्दगिया रे शारीरिक दु:ख सईणे पड़ने। आऊँ तुसा लोका खे इना तेई बचाणा चाऊँआ। 29 ओ साथी विश्वासियो, आऊँ ये बोलूँआ कि बखत कम करी ता रा, इजी री खातर चाईयो कि जिना रे लाड़ी आए, सेयो तेड़े ओ, मानो तिना रे लाड़ी निए। 30 और रोणे वाल़े एड़े ओ, मानो रोंदे नि और खुशी करने वाल़े एड़े ओ, मानो खुशी नि करदे और मोल लणे वाल़े एड़े ओ कि मानो तिना गे कुछ अया ई नि। 31 एसा दुनिया साथे बर्ताव करने वाल़े एड़े ओ कि दुनिया रेई नि ऊई जाओ, कऊँकि एसा दुनिया रे रीति और सबाओ बदलदा जाओआ।

32 मेरी इच्छा ये ए कि तुसे दुनिया री लालसा ते दूर रओ। कुआँरा मर्द प्रभुए री सेवा चिन्ता रे रओआ कि प्रभुए खे किंयाँ खुश राखिए। 33 पर ब्याए रा मांणू दुनिया री चिन्ता रे रओआ कि आपणी लाड़िया खे किंयाँ खुश राखूँ। 34 ब्याईया री और कुआँरिया री पसंदा रे बी फर्क ए। कुआँरी एसा चिन्ता रे रओई कि से प्रभुए री किंयाँ सेवा करो। से शरीर और आत्मा दूँईं रे पवित्र ऊणे री कोशिश करदी रओई। पर ब्याई री दुनिया री चिन्ता रे रओई कि आपणे लाड़े खे खुश राखूँ। 35 ये गल्ला तुसा रेई फाईदे खे बोलूँआ, ना कि तुसा खे फसाणे खे, बल्कि इजी री खातर कि जेड़ा शोभा देओआ, तेड़ा ई करेया जाओ कि तुसे एक चित्त ऊई की प्रभुए री सेवा रे लगे रे रओ।

36 जे कोई ये समजो कि आऊँ आपणी तेसा कुआँरिया रा अक्क मारने लगी रा, जेसारी जवानी टल़ी जाओई और जरूरत बी ओ, तो जेड़ा चाओ, तेड़ा करो, इदे पाप निए, से तेसा रा ब्या ऊणे देओ। 37 पर जो मनो रे पक्का रओआ और तेसखे जरूरत नि ओ, बल्कि आपणी इच्छा खे पूरी करने रा अक्क राखोआ और आपणे मनो रे ये गल्ल ठाणी ली री ओ कि मां आपणी बेटी कुआँरी राखणी, से पला करोआ। 38 आपणी कुआँरिया रा ब्या करी देओआ, से खरा करोआ और जो ब्या नि करदा, से ओर बी खरा करोआ।

39 जदुओ तक केसी जवाणसा रा लाड़ा जिऊँदा रओआ, तदुओ तक से तेसते बंदी री ए, पर जेबे तेसा रा लाड़ा मरी जाओआ, तो जेस साथे चाओ, ब्या करी सकोई, पर बस प्रभुए रे। 40 पर जेड़ी आए जे तेड़ी ई रओ, तो मेरे ख्यालो ते ओर बी धन्य ए और आऊँ समजूँआ कि परमेशरो री आत्मा मांदे बीए।