San Marcos
Dios Watsal Pit Jesucristowa Para
Marcosne an ñamin Dios watsal pit para. Mateokas Lucaskas paiña pit parɨt aizpa iz kit mamaz pɨnkɨh Jesucristowa kwizta parɨt. Marcosne an ainki pɨnkɨh para. Usne miza Dios watsal pit Jesucristowa masamɨzta kamtara. Jesucristowa pit kwisha wari, Jesucristo awaruza watsat mɨlnamtu akwa. Marcosne Juan munna kimmikawa pamtu. Juan Jesústa munna kimtawane, Marcosne Diablo Jesústa kwail kinintu aizpa pamtu. Kwiztane usne Jesús Galilea sukin kirɨt aizpa pamtu (1.14–9.50). Suasne Jesúsne Galilea suras kail kit mamasa Jerusalén pɨpulura kailtu (11.1-52). Kwiztane Marcosne Jesucristowa minpa payuwa pamtu, awa Jesús it kit irɨttas kuhsta piankamanapa (caps 11–16).
Jesús akkwan iztasparɨt kal kimtuasmin, usne wan awaruza kamtanamɨzta, Dios ussa ɨninta piankamanapa. Jesúsne ussa kiztu: “Nane Ampu namtɨtmika ish.” Diablowa saliztuzne ussa “Dios painkul i” kizara. Judíowa pariyaruzne ussa ka mɨmaara: “¿Nune Dios Cristo kish? ¿Nune au wat Dios Painkul kish?” Jesúsne sɨnkanara: “Nane Cristo ish. Une nawa, Ampu namtɨtmikara, izanazi,” (Mr 14.61-62).
1
Juan munnammikane Dios pit kainammtu
(Mt 3.1-12; Lc 3.1-9, 15-17; Jn 1.19-28)
1 Sunkana Dios watsal pit masamtu. Sun pitne Jesucristowa, Dios Painkulpa, kainarɨt.
2 Antikwain Isaíasne, Dios pit kainammmikane, kainat kit pɨnkɨhta para. Jesúspa kiz kit pɨnkɨhta ka para:
“Mɨrain. Diosne paiña ɨninmika ɨninnazi,
an ñancha Jesúspa mi watsanapa.✡ Mal 3.1
3 Mazane pul sura ɨt kit akkwan awa tuchira ka tɨnta paranazi:
‘Au wat Anpatpa mi nil sarain,’ ”✡ Is 40.3 kiz kit ka para.
4 Suas Juanne pul sura, akkwan awa tuchira, akkwan awara munnanara. Ka akkwan piji kainanara:
—U kwail kwizninnat kit munnarain, Dios u kwail kiarɨt aizpa kanintɨnpa, uruza maizanapa, kiznara. 5 Akkwan awane Judea suras Jerusalén pɨpuluras Juanparakima taizara, ussa mɨana. Uspane Diosta kaizara:
—Watcha. Aune kwail kianashɨ. Sun kizakane, Juanne Jordán Pira usparuza munnanara.
6 Juanne kwaksham kwara. Mamaz kalpa, camello ashkasa kwaksham sɨp kit kwara. Aya kɨra ip kit kuhta. Usne pak, ittalkanakas, mishkikas kwarɨt. 7 Kamtanamtuasmin, Juanne kaiznara: “Mazane mamaz payura ap kwizpa anazi. Usne nakin anza tɨnta ɨninmika i. Nane paiña kiwainmika ish. Us an tɨnta namtɨt akwa, nane paiña zapato tɨt chɨhtshitchish. Nane ussa wat kiwainnapa piankamsachish. 8 Nane watcha umɨza kwazikasain munnanamtus. Usne umɨza ayukta Sɨnam Izpul winnanazi,” kiznara.
Juanne Jesústa muntu
(Mt 3.13-17; Lc 3.21-22)
9 Mamaz payura Jesúsne Nazaret pɨpuluras, Galilea suras, puz kit Jordán pira ara. Juanne Jesústa munnara Jordán Pira. 10 Mane Jesús piras salaktawane, chiyu azkane, Jesúsne Dios Izpulta utkurukana iztɨt. Dios Izpulne taiz kit ussa uzta. 11 Diosne chiyuras ussa kwianta: “Nune ap painkul i. Nua pashimtus. Nane nua narɨt,” kizta.
Diablone Jesústa kwail kishimtu
(Mt 4.1-11; Lc 4.1-13)
12 Mane Dios Izpulne ussa pul sura, awa tuchira, ɨninta. 13 Cuarenta payura pul sura, awa tuchira, tuazi. Satanásne Jesústa kwail kinashimtu, us kwail kinpa. Ɨnkal kalpakasa tuazi. Ángeltuzkas purazi, ussa kiwaina.
Jesúsne kammuruza akwanamtu
(Mt 4.12-17; Lc 4.14-15)
14 Suldaruruz Juanta piz kit kajchira sɨpparɨkane, Jesúsne ɨt kit Galilea sura Dios watsal pit kainanara. 15 Awaruza ka kiznara: “Diosne sun payu narɨt, awaruza ɨninnanapa, usparuza watsat mɨlnanapa. U kwail kwizninnat kit Dios watsal pit nɨjkultain,” kiznara.
Jesúsne ampara pishkaru sulmuruza akwanamtu
(Mt 4.18-22; Lc 5.1-11)
16 Jesúsne Galilea Pimamin chamtuasmin, Jesúsne Simóntakas Andréstakas aimpihshtuzpain iznara. Uspane pishkaru ɨmmu kiainpailta. Pailta payu pishkaru sulpailta. 17 Jesúsne usparuza ka kaiznara:
—Nakasa at kit piankamnarain. Ñamin pishkaru sulpailta. Kawarain awara akwananaka, Diosta piankamanapa.
18 Mane uspane pishkaru ɨmmu chɨhkat kit ussa kanpailta.
19 Jesúsne pitchin an ñancha ɨt kit Santiagorakas Juantakas, Zebedeo painkulta iznara. Uspane katsa kanuara pishkaru ɨmmu yalpailta. 20 Mane usne usparuza akwanara. Uspane uspa papihshta, Zebedeora, chɨhkailta. Usne kanuara kiwaintuzkasa nukkulara. Ussa kanpailta.
Kwail salizne ampura piztɨt
(Lc 4.31-37)
21 Uspane Capernaum pɨpulukin pianaat kit nappara. Mane Jesúsne kwaizkultu payura Judío kammu yalkin nap kit awaruza kamtanamɨzta. 22 Uspane paiña kammukasa iztaspaarɨt. Uspane ka kizara:
—Nune katsa mikwakana tɨnta kamtanamtu. An Moisés kaizta aizpa kamtamtuzne sunkana kamtaamtuchi, kizara. 23 Ta Judío kammu yalta maza ampune, saliz piztɨtmikane tuazi. 24 Usne kwian kit Jesústa Nazaret pɨpuluras kiz mɨmara:
—¿Aumɨzane chima kinash? ¿Amas, aumɨza puzninnana? Nane nua pianish. Nune Diostas sɨnammika i, kizara.
25 Jesúsne ussa ɨnin kit tɨnta kaizta:
—¡Puñain! ¡Awaras puzti! kizta.
26 Kwail salizne awara ulnin kit tɨnta kwianta. Suasne Jesúsne salizta awaras puzninta. 27 Wan awane ishkuara. Usparuza ka mɨmaara:
—¿Anne chi i? Masas kammu i. Katsa mikwakana kamtamtu. Ɨninkane, kwail saliztuzne ussa mɨamtu, kizara.
28 Azain sun awane, wan Galilea sura uztuzne, Jesúspa piankamaara.
Jesúsne Pedrowa suegrara wat panintu
(Mt 8.14-15; Lc 4.38-39)
29 Judío kammu yaltas puzarawane, suasne Simónpa yalkinkas Andréspa yalkinkas nappara, Santiagokasa Juankasa. 30 Sua Simónpa suegrane kamara immukasa ishtu tuazi. Uspane Jesústa kainaara:
—Paiña suegra ishtu tuazi, kainaara. 31 Jesúsne at kit up chihtɨra piz kit ussa kuhsakninta. Suasmesa immu kara. Suasne Simónpa suegrane usparuza kumira kwinnara.
Jesúsne akkwan awara wat paninnamtu
(Mt 8.16-17; Lc 4.40-41)
32 Amtane pãn payaptɨkane, Galilea suras awane ishturuzakas kwail saliz piztɨttuzakas ussa karaara. 33 Akkwan pɨpulukis awane Jesús tukin pɨjtakin wanmakkara. 34 Usne akkwan tuntu ishturuza wat paninnara. Usne akkwan kwail saliztuza puzninnara. Usne kwail saliz puznintɨttuza chi paranintachi. Saliztuzne ussa piankam kit kaizara: “Jesúsne Dios Painkul i,” kizara.
Jesúsne Galilea sura Dios pit kainammtu
(Lc 4.42-44)
35 Tɨlawain tɨlkwilmin Jesúsne kuhsak kit awa tuchira ɨt kit Diosta paikwat. 36 Simónne mamaz awaruzkasa an kwizta kanpaara. 37 Uspane ussa sait kit kaizara:
—Chiwal awaruzne nua sayamtu, kizara.
38 Usne usparuza kaiznara:
—Ɨzhain, mamaz kasha pɨpulurain, Dios pit kwinta kinpa. Katmizna chiyuras arau, kiznara.
39 Usne Judío kammu yalta Galilea suwara ɨt kit Dios pit kwinta kit kit saliztuza awaras puzninnara.
Jesúsne aya pɨtta ishtumikara wat panintu
(Mt 8.1-4; Lc 5.12-16)
40 Maza ampune, aya pɨttɨt ishtumikane, ussa at kit tɨnta paikwat kit wain kit kaizta:
—Namtashitne, namtashina. Namtazha, kizta.
41 Us akwa mintane, Jesúsne paiña chihtɨkasa ussa paat kit kaizta:
—Nua namtanash. Nua wat pari, kizta.
42 Mane aya pɨtta ishtu karɨt. Wat kultɨt. 43 Suasne mamin Jesúsne ussa paiña yalta ɨnin kit ka tɨnta kainara:
44 —Nune wat parɨt. Mɨnainkas paranamun. Nu wat parɨt akwa, pariyara ɨt kit nua Diospa yal pariyara antash. Ussa Moisés ñamin kaizta aizpa mɨltash. Usne nu akwa Diosta mɨlnazi. Sunkana wan awane nu wat parɨt piankamanazi, kizta.
45 Sun ampune puz kit wanta sun namtɨt aizpa kwinta kinamɨzta. Akkwan awa Jesús tukin wanmakkara akwa, Jesúsne awa iztakin pɨpulukin napsachi. Attishta, awa tuchira, aara. Uspane pul sura ussa salkularɨt.