2 San Pedro
San Pedrone An Kwizta Pɨnkɨh Para
An kwizta pɨnkɨhkin San Pedrone wan Cristora nɨjkulturuza panamtu, paiña wat kamtam mɨanapa, mamaz kwail kamtamtu aizpa mɨamanpa. Usne usparuza an tɨnta namninnamtu, au Cristora nɨjkultamakpas kizara akwa, Cristo aumɨza kamtanarɨt akwa. Sun kwail kamtamturuzne Cristo mamasa amanazi kizara, makima atchi akwa.
Suasne Pedrone usparuza kamtanamtu, wat Cristora nɨjkulturuzkana uzanapa. Ka kamtanara: ussa nɨjkultawa, nil uztawa, wan piankamtawa, kwail kikain, Diosta tɨriztawa, Diosta wakpuj waintawa, Diosta pashimturuza pashinarawa, Diosta pashitpa (cap.1). “Kwail kamtamtu aizpa mɨkikain” ɨninnamtu (cap. 2). Jesús watcha mamasa anazi. Makima Cristo atchikas, usne wantuza tɨriznamtu, Diosta kailnakima, uspa kwail kiamtu aizpa chɨhkanakima (cap. 3).
1
Kakishapu kiztu
1 Nane Simón mun ish. Nakas Pedro mun ish. Jesucristowa kiwainmumika ish. Jesucristone nawa ɨninta, us kaiztu aizpa kainanapa. Ukas aukas Cristo kamtara aizpa kawarain nɨjkulpuspas. Jesús wat awa i. Au Diosne, au Watsat mɨlmumikane, Jesucristone aumɨza maiznashinai, watsal kiarɨnpa. 2 U Diosta pian akwa, au Anpat Jesústa pian akwa, nane paikumtus, Dios uruza kiwainanapa, kalpain uzanapa.
Cristora nɨjkultuzne wat kiarawa
3 Jesucristone au akwa tɨnta kal kit kit aumɨza unanara, wantuza wat kianapa. Diosne aumɨza akwanara, ussa piankamanapa. Au ussa piankamtɨt akwa, Diosne aumɨza kiwainashimtu, uskanain namanapa, us wat kishimtu aizpa kianapa. 4 Diosne us kin namtɨt aizpa aumɨza chɨhkanarɨt, Diospa kwal namanapa. Usne watsal mɨlam mɨji. Aumɨza sun mɨlam kin namtɨt akwa, Diosne aumɨza kiwainnanazi, an sukin awa kwail kishimtu aizpa kiamanpa.
5 Dios ussa piantuza watsanarɨt akwa, une tɨnta kal kiarawa, Cristora an piankamanapa.
Mane Cristora nɨjkulamtuasmin, une an watsal uztain.
An watsal uzamtuasmin, Diospa an piankamamɨztain.
6 Diospa an piankamamɨztuasmin, wan kwail kiashimtu aizpa anupparain.
Wan kwail kiashimtu aizpa anuppamtuasmin, chiwal tɨnta tailcharain.
Chiwal tɨnta tailchamtuasmin, Diospa mintain.
7 Diospa minñamtuasmin, wan Cristora piantuza pashinarain.
Wan Cristora piantuza pashinamtuasmin, wan awaruzakas pashinarain.
8 Na wan manta kit aizpa pailta payukima kiarawa, Jesucristora an wat piankamanapa. Sunkana na manta kit aizpa mɨmturuzne arakankanain kiamanazi. Na manta kit aizpa mɨmturuzne nɨjchiruzkanain uzamanazi. 9 Na manta kit aizpa mɨmtuchiruzne we piankam kit kasu waj chi awakanain chaamtu. Uspane ñamin uspa kwail kiarɨt aizpa mainñashimtuchi. Uspane Dios usparuzain sɨnam sanarɨt aizpa nɨjkulnashimtuchi.
10 Ka akwaizna, Diosta piantuz, wat nɨjkul kit mɨrain. Diosne uruza akwanat kit nanara, wat awakanain uzanapa. Na kaizta aizpa mɨmtumikane mizurainkas kwail kin kailmanazi. 11 Sunkana uzturuzne, sunkana kimturuzne Cristora ɨnintukin nappanazi. Au Anpatne, au watsat mɨlmumikane, uruza akwananazi, pailta payurakima uskasa uzanapa.
12 Ka akwaizna, nane uruza na kaizta aizpa nɨjkulninnanash. Une watcha kamtanarɨt aizpa piankam kit kiamtu. 13 An sukin uztuasmin, nane uruza na kurunnarɨt aizpa nɨjkulninnanash. 14 Au Anpat Jesucristone nawa inapain ish piankamninta. 15 Katmizna nane tɨnta kal kit kit an pit uruza kaiznanamtus, mainñamanpa. Na irawane, une sun pit nɨjkulanazi.
Uspa iztakin Cristo an tɨnta namtɨt
16 Nane uruza au Anpat Jesucristowa kamtanarau. Usmin wan ɨninnanazi. Mamaz payura kailnazi. An pitne kain kwinta kiztachish. Aune Jesucristora izaramakpas. Usne an katsa mika azi. 17 Au Taitta Diosne chiyuras ussa “kwisha wari” kizta. Au iztakin an tɨnta namtɨt. Dios chiyuras paramtuasmin, usne ka kaizta: “Anne ap pashimtu painkul i. Uskas ap narɨtmika i. Usne na pashimtu aizpa kimtu.” kizta. 18 Diospa ɨnkal ɨzara au Anpatkasa kunasmin, aune Dios chiyuras parat aizpa mɨramakpas.
19 Aune Dios kaiztaruz paarɨt aizpa watcha i pianmakpas. Sun pit iztawamakpas, Cristo aumɨza wan piankamninnakima. An pitne impil tɨlkwilkin aiztukanain i. An pitne tɨlawain katsa kɨma aiztukanain i. Kai samtu. 20 An ñancha Dios pit parɨtmikawa piankamtain. Diosne Dios kainammturuza kiwainnara, Dios pit piankamanapa, Dios pit paanapa. Minminkas usminpain Dios pit piankamsachi. 21 Dios pit kainammtuz paiña pitkasain paramtuasmin, Diospa Sɨnam Izpulne usparuza kiwainnara, Dios panashit aizpa paanapa.