21
Tã Ôvârí drí ngá ndrĩ lôꞌbãzó óꞌdí ró rî
1 Nõô tã gólâ ꞌbũû ạ̃kû rî gõꞌdá kpá ı̣̃nyạ́kú drı̣̃ ạ̃kû rî bê rî ꞌbá yî drí ậvı̣̃zó dı̣̃ lı̣̃fı̣́ drı̣̃ ꞌásĩ ndrĩ ꞌdó lı̣̃mvû ândrê ândrê yí bê rî tãsĩ. Má drí gõꞌdá ꞌbũû óꞌdí gõꞌdá ı̣̃nyạ́kú óꞌdí bê rî ꞌbá yî ndrẽzó ĩꞌdî. 2 Má drí jạ̃rı̣́bạ̃ Ôvârí rî nyãányâ kâ, Yẽrõsãlémã óꞌdí ró rî ndrẽzó âríꞌá Ôvârí ngá lésĩ ró ꞌbũû lésĩ. Gólâ rĩꞌá sũsũ ró tákányĩ, õzõ õkó óꞌdí êdélé trá ítá lânjã sĩ gõꞌdá lôꞌĩlí kpá trá ngá sũsũ kôrô ãzâ ꞌbá yî sĩ gõꞌdá trá rĩꞌá njãâ íyî ágó rî tẽꞌá rî kâtí.
3 Tã lâ rĩꞌá nõtí, má drí gbórókõ ãzâ ârízó kı̣́tı̣̃ Ôvârí kâ rî ngá lésĩ ró tã âtáꞌá kĩ, “Ní ndrê drẽ, ꞌbã Ôvârí kâ trá rĩꞌá ngbãângbânõ õjílã gólâkâ rî lãfálé. Gólâ âꞌdô rĩꞌá gólĩyî lãfálé ꞌá, gõꞌdá gólĩyî âꞌdô âꞌdóꞌá õjílã jó ꞌálé gólâkâ kâ rî ꞌbá yî ĩꞌdî. Ãwô, rĩꞌá tã pạ̃tı̣́ı̣̃ ró, Ôvârí rî nyãányâ âꞌdô rĩꞌá gólĩyî lãfálé ꞌá. 4 Ĩtí rî, Ôvârí âꞌdô ı̣̃lı̣́ndrı̣̂ gólĩyî lı̣̃fı̣́ ꞌá rî lĩꞌá ngbá vólé, gõꞌdá õdrã îcá kô âꞌdólé, gõꞌdá ngá lãzé yí bê gõꞌdá kpá ãwó ngõngõ yî lâŋõ yí bê îcá ĩyî kpá kô âꞌdólé. Tã rî ꞌdĩ ꞌbá yî ndẽ rû trá îtõ võ lésĩ.”
5 Gõꞌdá nĩngá sĩ, Ôvârí drí ngãzó tã âtálé kĩ, “Nĩ ndrê drẽ, mâ trá ngá-tı̣̂ cé tı̣̂tı̣̂ ꞌẽꞌá ndrĩ âꞌdólé óꞌdí ró. Ní îgĩ úlı̣́ gólĩyî má drí âtálé nõ ꞌbá yî. Úlı̣́ ámákâ âtálé rî ꞌbá yî rĩꞌá pạ̃tı̣́ı̣̃ ró, gõꞌdá nĩ îcâ trá tã lẽlé ꞌá lâ ĩyî.” Gõꞌdá gólâ kĩ nĩ rî,
6 Óndẽ tã tı̣̂ trá kậkậrậ ndrĩ. Ámâ nyãányâ îtõ tã tı̣̂ ndrĩ nĩ, gõꞌdá ámâ nyãányâ âtî tã tı̣̂ vó kpá nĩ ndrĩ. Má âꞌdô lı̣̃mvû fẽꞌá gólĩyî âꞌdó ꞌbá lı̣̃mvû lédrẽ-lédrẽ âfẽ ꞌbá lôvó ró rî ꞌbá yî drí cú ĩtí gólĩyî drí gĩ ãkó lâ. Lı̣̃mvû rî ꞌdĩ rĩꞌá óró ámákâ gólâ lédrẽ-lédrẽ âfẽ ꞌbá ĩꞌdî rî ꞌásĩ. 7 Õjílã ãzâ ãlô gólâ tã ậtũ ꞌbá gõꞌdá rĩzó tã lẽlẽ sĩ má ꞌá rî, âꞌdô tã tı̣̂ rî ꞌdĩ ꞌbá yî ûsúꞌá ndrĩ. Má âꞌdô âꞌdóꞌá kpá gólâ rî átá ró, gõꞌdá gólâ âꞌdô âꞌdóꞌá ámâ mvá ró.
8 Gõꞌdá õjílã gólĩyî tã ậtũ ꞌbá kôꞌdáwá gõꞌdá kpá tã lẽlẽ ꞌbã ꞌbá ĩyî kô má ꞌá rî ꞌbá yí bê, kpá gólĩyî rĩ ꞌbá ôvârí ãbãrãdãgõ ãzâ ꞌbá yî ı̣̂njı̣̃lı̣́ ĩꞌdî gõꞌdá kpá gólĩyî õjílã ûfú ꞌbá ró, gólĩyî ĩyî trõ ꞌbá drı̣́ ꞌá ágó ngãtá õkó ãzí-ãzí kâ ậyı̣́zó rî ꞌbá yî, gólĩyî ólé ró gõꞌdá ójó ró gõꞌdá kpá drı̣́-ꞌbá ró rî ꞌbá yî, gõꞌdá gólĩyî õnjõ ꞌbá ró rî ꞌbá yí bê, áâꞌdô gólĩyî lûvũꞌá ndrĩ lạ̃sı̣́ lı̣̃mvû ândrê kâ rĩ ꞌbá kõlé zãâ gbạ́dú rî ꞌá, gõꞌdá úzı̣̂ ꞌdĩî rĩꞌá õdrã rı̣̃ lâ ró zãâ rî ĩꞌdî.
9 Gõꞌdá nĩngá sĩ, má drí ãlô mãlãyíkã gólĩyî lâŋõ njı̣̂-drı̣̃-lâ-rı̣̃ âdã ꞌbá ãngó drı̣̃ ꞌá ꞌdĩ ꞌbá yî ꞌásĩ rî ndrẽzó. Gólâ ânĩ gõꞌdá tã âtálé má drí kĩ nĩ rî, “Ní ânĩ má âꞌdô õkó óꞌdí gólâ kạ́bı̣̃lı̣́kı̣̃ drí gĩlí trá rî âꞌdáꞌá ní drí.” 10 Nĩngá sĩ, mbârâkã Líndrí Tãndí Ôvârí kâ rî kâ drí fĩzó má ꞌá, gõꞌdá mãlãyíkã ꞌdî drí ãmâ trõzó âjílí únı̣́ tõrõngõlõ rî ãpírĩ lâ ꞌálâ. Gõꞌdá mã câ bê tólâ rî, gólâ drí jạ̃rı̣́bạ̃ Ôvârí kâ zı̣̃lı̣́ Yẽrõsãlémã óꞌdí rî âꞌdázó má drí, ârî trá Ôvârí vá lésĩ ꞌbũû lésĩ. 11 Ĩtí rî, jạ̃rı̣́bạ̃ rî ꞌdĩ rĩꞌá lậgû-lậgû ró kạ̃ꞌdậ-kạ̃ꞌdậ, tãlâ Ôvârí bê rĩꞌá tólâ. Jạ̃rı̣́bạ̃ rî ꞌdĩ kpá rĩꞌá kõꞌá njãã-njãã gõꞌdá kpá lậgúꞌá kạ̃ꞌdậ-kạ̃ꞌdậ ókĩzõ ngãnã ꞌî. 12 Gõꞌdá ꞌbáráŋã ândrê tõrõngõlõ ãbẽ kúnı̣́ mvá ꞌásĩ rî bê rĩꞌá gbãâ jạ̃rı̣́bạ̃ rî ꞌdĩ rú sĩ, gõꞌdá ạ́tı̣̃ fĩzó ꞌbáráŋã rî ꞌdĩ ꞌá tólâ rî rĩꞌá mûdrı̣́-drı̣̃-lâ-ngâ-rı̣̃, ꞌdó mãlãyíkã bê tı̣̂ lâ ꞌásĩ cé tı̣̂tı̣̂ rĩꞌá lôkílâ. Gõꞌdá ạ́tı̣̃ rî ꞌdĩ ꞌbá yî tı̣́ sĩ ãlô-ãlô íîgĩ ꞌbạ̃súrú rú mûdrı̣́-drı̣̃-lâ-ngâ-rı̣̃ õjílã Ôvârí kâ rî ꞌbá yî ró rî rú lâ yî trá ꞌbạ̃súrú rú ãlô ạ́tı̣̃ ãlô rî rú. 13 Ạ́tı̣̃ tı̣̂ gólĩyî nâ rî ndrê võ gõlé õjí ꞌálâ ró. Gõꞌdá nâ ãzâ ꞌbá yî ĩyíkâ ı̣̃tú drí ꞌdẽrẽ ꞌálâ ró, gõꞌdá ãzâ nâ rî ꞌbá yî ĩyíkâ gõlé lı̣̃jı̣́ drı̣̃ ꞌálâ ró, gõꞌdá ạ̃mbúkũ lâ yî nâ rî ndrê võ gõlé drı̣́-ágó drı̣̃ ꞌálâ ró. 14 Óbẽ ꞌbáráŋã rî ꞌdĩ gá kúnı̣́ úngû mûdrı̣́-drı̣̃-lâ-ngâ-rı̣̃ rî drı̣̃ı̣̂. Gõꞌdá kúnı̣́ úngû rî ꞌdĩ ꞌbá yî drı̣̃ı̣̂ sĩ ãlô-ãlô rî íîgĩ lãjóꞌbá ãlô gólâ lãjóꞌbá mûdrı̣́-drı̣̃-lâ-ngâ-rı̣̃ Kạ́bı̣̃lı̣́kı̣̃ kâ rî ꞌbá yî ꞌásĩ rî rú lâ trá drı̣̃ lâ yî ꞌá sû cé.
15 Mãlãyíkã gólâ rĩ ꞌbá tã âtálé má drí ꞌdĩ cú rĩꞌá fê mvá ngá ı̣̂ꞌbı̣̃ kâ bê éêdê dáãbõ ꞌásĩ, ãꞌdô ró bê rĩzó jạ̃rı̣́bạ̃ rî ꞌdĩ ãcê lâ, ngãngã lâ ûrú ꞌálâ rî, gõꞌdá lạ̃ngbạ̃ngú lâ yí bê rî ı̣̂ꞌbı̣̃zó. 16 Jạ̃rı̣́bạ̃ rî ꞌdĩ ãcê lâ lạ̃ngbạ̃ngú lâ bê rî rĩꞌá îcâ-îcâ ró ãlô. Ĩtí rî, mãlãyíkã ꞌdî drí fê ngá ı̣̂ꞌbı̣̃ kâ ꞌdĩ âtrõzó, gõꞌdá drílâ jạ̃rı̣́bạ̃ ꞌdî ı̣̂ꞌbı̣̃zó ĩꞌdî sĩ lâ. Ĩtí rî, gólâ ûsû ãcê lâ rĩꞌá kĩlõmítĩrĩ kútũ-rı̣̃-drı̣̃-lâ-kámá-sû (2,400 km), gõꞌdá kpá lạ̃ngbạ̃ngú lâ yî ngãngã lâ ûrú ꞌálâ ró rî ꞌbá yî ı̣̂ꞌbı̣̃zó rî, ꞌdó rĩꞌá ãlô. 17 Gõꞌdá nĩngá sĩ, mãlãyíkã ꞌdî drí kpá ꞌbáráŋã kúnı̣́ mvá ꞌásĩ jạ̃rı̣́bạ̃ ꞌdî bẽzó ꞌdî njı̣̃njı̣̃ lâ ı̣̂ꞌbı̣̃zó gõꞌdá rĩꞌá ãnyî mítĩrĩ nyâꞌdî-nâ-drı̣̃-lâ-ngâ-njı̣̂-kázíyá.
18 Éêdê jạ̃rı̣́bạ̃ rî ꞌdĩ dáãbõ ꞌásĩ lậgû-lậgû ró õzõ ngãnã kâtí ĩtí. Gõꞌdá gólĩyî ꞌbã kúnı̣́ õnyí ró lậgú ꞌbá ngbángbá ngãnã kâtí zı̣̃lı̣́ jásĩpã rî ĩꞌdî ãbẽ ꞌbáráŋã ꞌdî kâ bẽzó. 19-20 Kúnı̣́ úngû gólĩyî ꞌbáráŋã ꞌdî bẽzó gá drı̣̃ lâ ꞌdĩ ꞌbá yî rĩꞌá ndrĩ ngĩíngî, gõꞌdá kpá ndrĩ rĩꞌá ĩyî ꞌdó sũsũ ró.
Kúnı̣́ mvá rî sı̣́sı̣́ ꞌdĩ íyíkâ rĩꞌá jásĩpã ꞌî,
gõꞌdá rı̣̃ lâ íyíkâ lậgû-lậgû ró kạ̃ꞌdậ-kạ̃ꞌdậ ró, úzı̣̂ rú lâ sãfírẽ,
gõꞌdá nâ lâ rĩꞌá ngĩî lâkâ-lâkâ ró mvẽêmvê ĩtí, úzı̣̂ rú lâ ágẽtẽ,
gõꞌdá sû lâ íyíkâ ngbángbá lạ̃dậ-lạ̃dậ ĩtí, úzı̣̂ rú lâ ẽmẽrãládã,
gõꞌdá njı̣̂ lâ íyíkâ rĩꞌá cú úrı̣̃ bê ngĩíngî dũû, úzı̣̂ rú lâ õníkĩsĩ,
gõꞌdá njı̣̂-kázíyá lâ ró rî íyíkâ rĩꞌá kãâkâ ró, úzı̣̂ rú lâ kãrãnẽlíyãnĩ,
gõꞌdá njı̣̂-drı̣̃-lâ-rı̣̃ lâ ró rî íyíkâ rĩꞌá ngbángbá lâwâ-lâwâ ró ĩtí, úzı̣̂ rú lâ kĩrĩsõlátẽ,
gõꞌdá njı̣̂-drı̣̃-lâ-nâ lâ ró rî íyíkâ rĩꞌá káꞌdã-káꞌdã kạ̃ꞌdậ-kạ̃ꞌdậ ró ĩtí, úzı̣̂ rú lâ bẽrílẽ,
gõꞌdá njı̣̂-drı̣̃-lâ-sû lâ ró rî íyíkâ rĩꞌá kpírí-kpírí lâwâ-lâwâ ró ĩtí, úzı̣̂ rú lâ tõpázã,
gõꞌdá mûdrı̣́ lâ ró rî íyíkâ rĩꞌá kpírí-kpírí kạ̃ꞌdậ-kạ̃ꞌdậ ró ĩtí, úzı̣̂ rú lâ kĩrĩsĩpãrásẽ,
gõꞌdá mûdrı̣́-drı̣̃-lâ-ngâ-ãlô lâ ró rî íyíkâ wạ̃yı̣̃-wạ̃yı̣̃ ró ĩtí, úzı̣̂ rú lâ jãsĩnísĩ,
gõꞌdá mûdrı̣́-drı̣̃-lâ-ngâ-rı̣̃ lâ ró rî íyíkâ lạ́múrı̣̃-lạ́múrı̣̃ ró, gõꞌdá úzı̣̂ rú lâ ãmãsãsítĩ.
21 Ạ́tı̣̃ tı̣̂ ãlô-ãlô rî ꞌbá yî rĩꞌá kúnı̣́ mvá mvẽêmvê õzõ ĩnjígó sı̣́ kâtí zı̣̃lı̣́ pérẽlẽ rî ĩꞌdî, gõꞌdá lạ́tı̣̂ jạ̃rı̣́bạ̃ ꞌdî kâ éêdê ndrĩ dáãbõ nyãányâ lâ ró rî sĩ.
22 Má ndré jó ạ́ngı̣́ ãzãkã jạ̃rı̣́bạ̃ ꞌdî ꞌá rĩzó Ôvârí rî ı̣̂njı̣̃lı̣́ ꞌá lâ rî kô ãlôwálâ, tãlâ õjílã ndrĩ rî ĩyî Ôvârí gólâ Kúmú ámákâ ró mbârâkã ndrĩ lı̣́pı̣̂ ró rî gõꞌdá Kạ́bı̣̃lı̣́kı̣̃ bê rî ı̣̂njı̣̃lı̣́ võ gólâ gólĩyî drí âꞌdózó ꞌá lâ rî ꞌbá yî ꞌásĩ. 23 Tólâ rî, ı̣̃tú yû párá bê, jạ̃rı̣́bạ̃ rî ꞌdĩ lẽé gólĩyî kô, tãlâ ngá îꞌĩ Ôvârí kâ bê võ îwáꞌá tólâ, gõꞌdá Kạ́bı̣̃lı̣́kı̣̃ rî nyãányâ kpá rĩꞌá võ îꞌĩꞌá ngbángbá õzõ ı̣̃tú kâtí võ rî ꞌdĩ ꞌá. 24 Gõꞌdá õrĩ ãngó drı̣̃ ꞌá rî ꞌbá yî ndrĩ âꞌdô ĩyî tã Kạ́bı̣̃lı̣́kı̣̃ kâ rî ꞌẽꞌá ĩꞌdî. Gõꞌdá kúmú ạ́ngı̣́ ạ́ngı̣́ gólĩyî ndrĩ ãngó drı̣̃ kâ rî ꞌbá yî âꞌdô ĩyî ĩyî nyãányâ fẽꞌá drı̣̃-bạ́lạ́yı̣̂ ró Kạ́bı̣̃lı̣́kı̣̃ rî ı̣̂njı̣̃lı̣́. 25 Ạ́tı̣̃ tı̣̂ jạ̃rı̣́bạ̃ rî ꞌdĩ kâ âꞌdô rĩꞌá kpá zãâ trậ. Áâꞌbãá gólĩyî kôꞌdáwá ãlôlâ tãlâ ngạ́cı̣̂ âꞌdô ꞌbãꞌá yû. 26 Õrĩ cé tı̣̂tı̣̂ âꞌdô ĩyî ânĩꞌá Ôvârí rî ı̣̂njı̣̃lı̣́ ĩyî nyãányâ fẽfẽ sĩ. 27 Kpálé rî, ngá ãzãkã gólâ Sãtánã kâ ró rî îcá kô fĩlí tólâ jạ̃rı̣́bạ̃ rî ꞌdĩ ꞌá, gõꞌdá kpá ĩtí gólĩyî rĩ ꞌbá tã gólĩyî Sãtánã kâ rî ꞌbá yî ꞌẽlé ĩꞌdî rî ꞌbá yî ndrĩ gólĩyî õnjõ ꞌbá ró rî ꞌbá yí bê. Íyîngá rĩꞌá cé õjílã gólĩyî ĩyî rú îgĩ ꞌbá trá búkũ gólâ Kạ́bı̣̃lı̣́kı̣̃ kâ gólâ âꞌdó ꞌbá õjílã gólĩyî cú rú lédrẽ-lédrẽ kâ bê rî ꞌbá yî ĩꞌdî.