18
Tã Ôvârí drí âtálé Yõwánĩ drí kĩ ꞌbá nĩ, yí ãꞌdô jạ̃rı̣́bạ̃ zı̣̃lı̣́ Bãbĩlónã rî ûfúꞌá rî
1 Gõꞌdá ꞌdĩî vósĩ rî, má drí mãlãyíkã ãzâ ndrẽzó ânĩꞌá ꞌbũû lésĩ, ãngó drı̣̃ ꞌá nõngá gólâ cú rĩꞌá mbârâkã bê gạ̃rạ̃. Võ îꞌĩ ânĩ trá gólâ ngá lésĩ võ îwálé võ tı̣̂ ãngó drı̣̃ ꞌá rî ꞌbá yî ꞌásĩ cé tı̣̂tı̣̂. 2 Ĩtí rî, gólâ drí ngãzó trẽlé ûrû mbârâkã sĩ rõô kĩ nĩ rî,
Jạ̃rı̣́bạ̃ ạ́ngı̣́ Bãbĩlónã ꞌdĩ áâꞌdô ûfúꞌá lâ trá, gõꞌdá âyézó lâ ándró ró. Gõꞌdá âꞌdô rû jãꞌá cé võ gólâ líndrí õnjí gõꞌdá lãjóꞌbá ndrĩ Sãtánã kâ rî ꞌbá yî drí rĩzó rĩlí ꞌá lâ rî ró. Lõgónõ, bívõ, lạ̃bạ̃gũ gõꞌdá kõrõnyã gólĩyî õjílã mvá drí lôvó lâ yî ꞌbãlé kôꞌdáwá rî ꞌbá yî trá rĩꞌá ĩyî rû êꞌbéꞌá tólâ. 3 Áâꞌdô gólâ rî ûfúꞌá trá, tãlâ gólâ âdô õjílã õrĩ tı̣̂ kâ ndrĩ ãngó drı̣̃ kâ ró rî ꞌbá yî, ngâ ĩyî trá ꞌdó rĩꞌá tã âzâ-âzâ kpõnyã õkó kpã kâ rî ꞌẽlé gólâ bê. Gólĩyî rî ĩyî trá õdrá gólâkâ mvũlı̣́ gõꞌdá kúmú ạ́ngı̣́ ạ́ngı̣́ ãngó drı̣̃ ꞌá rî ꞌbá yî ndrĩ ꞌdó rî ĩyî nĩlí gólâ drí ꞌbã ꞌálâ rĩꞌá ậyı̣́lı̣́ gólâ bê. Ngá lậzı̣́ ꞌbá ãngó drı̣̃ kâ rî ꞌbá yî âꞌdô ĩyî trá ngá-tı̣̂ bê dũû, tãlâ õjílã jạ̃rı̣́bạ̃ ꞌdî kâ rî ꞌbá yî lẽ ĩyî tã ngá kâ rõô ĩyî ífífí drí õzõ õkó gólâ ãvẽ ꞌbá ró rî kâtí.
4 Gõꞌdá nĩngá sĩ, má drí ãzákôlâ ꞌdĩ gbórókõ lâ ârízó ꞌbũû lésĩ kĩ nĩ rî, Ôvârí kĩ,
Ãnî õjílã ámákâ ró rî ꞌbá yî, nĩ ngâ ûrû, nĩ âyê ró jạ̃rı̣́bạ̃ ꞌdî, tãlâ nĩ ãꞌdô ró bê cú ĩtí ngá ãzãkã ãkó ꞌẽlé tã ꞌẽꞌẽ ányâ sũ ꞌbá kô gólâkâ rĩꞌá ꞌẽlâ ꞌdĩ bê. Õzõ nĩ ãâyê gólâ kôꞌdáwá rî, nĩ âꞌdô lâŋõ ŋãꞌá ãnî drı̣̃ı̣̂ kpãkã ãlô gólâ bê. 5 ꞌDõvó nĩ ndrê drẽ, tã õnjí gólâkâ rî ꞌbá yî ndrĩ já Ôvârí drı̣̃ı̣̂ sĩ kô, tãlâ tã õnjí rî ꞌdĩ ꞌbá yî trá rĩꞌá ĩyî âdrõ-âdrõ lâ yî ró, õzõ ngá âdrõ-âdrõ ạ́ngı̣́ kâtí îtõlé kó ı̣̃nyạ́kú drı̣̃ı̣̂ sĩ cãlé bũúũ ûrú ꞌálâ. 6 ꞌDõvó ĩtí rî, tã õnjí gólâkâ ꞌẽlé trá rî ꞌbá yî ãâgõ ãkpã gólâ drı̣̃ı̣̂. ꞌDõvó gólâ ũûsû ró lâŋõ gólâ âꞌdó ꞌbá ândâlâ rı̣̃ gạ̃rạ̃ lâŋõ gólâ drí ꞌẽlé trá ãzí-ãzí drí rî ꞌbá yî drı̣̃ı̣̂ sĩ. Gólâ lôrô õdrá õnjí gãlãhã ãzí-ãzí drí mvũlı̣́, ꞌdõvó ĩtí rî, gólâ ũmvû õdrá âꞌdó ꞌbá õnjí lâ ró ândâlâ rı̣̃ rî. 7 Gólâ fẽ ngá-tı̣̂ tãndí tãndí dũû ãmbá trá ndrĩ ꞌdó íyî nyãányâ drí. Gõꞌdá ngbãângbânõ rî, ꞌdõvó gólâ ũnı̣̃ drẽ ĩzã kõkõ ngá ãkõ kâ bê ꞌdĩ võ lâ ꞌá. Tãlâ gólâ rĩꞌá ạ́rú-ạ́rúwạ́ ꞌbá ꞌî rõô, gõꞌdá tã ı̣̂sũ-ı̣̂sũ bê íyî nyãányâ drí kĩ, “Mâ rĩꞌá õzõ kúmú ạ́ngı̣́ kâtí, má âꞌdó kô õzõ ạ̃yı̣́zı̣́ kâtí ĩzã ró, lâŋõ ûsú mâ kô gõꞌdá ámâ ꞌbãlé ĩzã ró.” 8 Gõꞌdá tãlâ tã ı̣̂sũ gólâkâ trá ĩtí ró rî drí sĩ rî, lâŋõ ândrê âꞌdô ꞌdẽꞌá gólâ drı̣̃ı̣̂. Ngá lãzé âꞌdô gólâ rî ꞌẽꞌá kậyı̣̂ ãlô sĩ, gólâ âꞌdô ꞌbãꞌá tã ı̣̂sũ ró. Lõfó âꞌdô gólâ rî ꞌẽꞌá gõꞌdá lạ̃sı̣́ âꞌdô kpá gólâ rî zãꞌá. Ôvârí Kúmú ãmákâ rî rĩꞌá cú mbârâkã bê. Ĩtí rî, rĩꞌá gólâ ĩꞌdî âꞌdó ꞌbá tã gólâkâ kĩlí rî.
9 Gõꞌdá kúmú ạ́ngı̣́ ạ́ngı̣́ gólĩyî ndrĩ õrĩ ꞌásĩ sı̣́sı̣́ ậyı̣́ ꞌbá trá gólâ bê rî ꞌbá yî, gõꞌdá kpá ãyĩkõ ꞌẽ ꞌbá trá gólâ bê rî ꞌbá yî, õzõ õndrê ĩyî õcĩkã trá ngãꞌá lạ̃sı̣́ gólâ rĩ ꞌbá jạ̃rı̣́bạ̃ ꞌdî zãlé rî kâ rî, gólĩyî âꞌdô ĩzã ngõꞌá. 10 Ĩtí rî, ũrı̣̃ âꞌdô gólĩyî ꞌẽꞌá, tãlâ gólĩyî ndrê lâŋõ trá rĩꞌá ꞌdẽꞌá õjílã ꞌdî ꞌbá yî drı̣̃ı̣̂, ꞌdĩî gólĩyî âꞌdô âdréꞌá gĩâ jẽjẽ ró gõꞌdá rĩꞌá tã âtálé kĩ,
“Wúûwú, Bãbĩlónã! Ĩzã kõkõ, ĩzã kõkõ! Jạ̃rı̣́bạ̃ mbârâkã ãkĩ,
lâŋõ ãníkâ rî âꞌdê trá gbõ ꞌwãâ ró, úûfû nî trá cé ı̣̃tú-pá ãlô sĩ.”
11 Ngá lậzı̣́ ꞌbá ãngó drı̣̃ı̣̂ rî ꞌbá yî âꞌdô ĩyî kpá ĩzã ngõꞌá tãlâ jạ̃rı̣́bạ̃ ꞌdî tãsĩ, tãlâ õjílã âꞌdô ꞌbãꞌá yûꞌdạ́wạ́ ngá gólĩyíkâ gĩlí. 12-13 ꞌDĩî rĩꞌá ngá âꞌdó ꞌbá õzõ nõô yí kâtí rî ꞌbá yî, dáãbõ, kúnı̣́ lậgú ꞌbá rî ꞌbá yî, ítá lâgî lâ yî drí ꞌbãlé rõô lâ rõô ró rî ꞌbá yî, fê tãndí rĩzó ngá ũrûkậ ꞌbá yî êdélé rî ꞌbá yî, ĩnjígó sı̣́ yî, ngá sũsũ êdélé ậdı̣̂ ꞌásĩ, gõꞌdá kúnı̣́ mvẽêmvê ró rî ꞌbá yí bê rî, gírĩfã yî, dõ gólĩyî ạ̃jı̣́ bê rî ꞌbá yî gãfálã gõꞌdá ãlókõ gólĩyî âꞌdó ꞌbá õzõ múrạ̃ kâtí rî ꞌbá yî, gõꞌdá dõ gólĩyî rĩ ꞌbá kõlé cú ạ̃jı̣́ bê tũrũ-tũrũ rî ꞌbá yî, õdrá, dõ tãndí rî ꞌbá yî, ı̣́tı̣́, kạ́bı̣̃lı̣́kı̣̃ yî õsánĩ ãrãbíyã gólâ õsánĩ drí rĩꞌá sẽlâ rî, gõꞌdá õjílã gólĩyî rạ̃gı̣́ı̣̃ ró rî ꞌbá yí bê rĩꞌá gĩlâ ĩyî õzõ kõrõnyã ꞌbã kâ yí kâtí rî ꞌbá yî ĩꞌdî.
14 Gõꞌdá ngá lậzı̣́ ꞌbá ꞌdĩ ꞌbá yî âꞌdô ĩyî tã âtáꞌá kĩ,
“Wúûwú, Bãbĩlónã, ngá-tı̣̂ ndrĩ ãmâ drí lı̣̃fı̣́ ꞌbãzó vó lâ yî rú ꞌá rî ꞌbá yî ậvı̣̃ ĩyî trá ndrĩ.
Ngá-tı̣̂ ãmákâ dũû rî ꞌbá yî dı̣̂ trá lı̣̃mvû bê ngbá, gõꞌdá mã îcá kô ûsúlâ óꞌdí.”
15 Gõꞌdá ngá lậzı̣́ ꞌbá ꞌdĩ ꞌbá yî, ũrı̣̃ âꞌdô gãꞌá gólĩyî rú tãlâ lâŋõ jạ̃rı̣́bạ̃ ꞌdî kâ sĩ, gólĩyî âꞌdô âdréꞌá gĩâ jẽjẽ ró, 16 gõꞌdá âꞌdô ĩyî tã âtáꞌá kĩ,
“Wúûwú, Bãbĩlónã! Ĩzã kõkõ, ĩzã kõkõ!
Ãyẽ ĩzã jạ̃rı̣́bạ̃ ândrê ꞌdĩ kâ gâ trá ãmâ lı̣̃fı̣́. Sı̣́sı̣́ nã rî, gólâ rĩꞌá õzõ õkó gólâ ítá lậgû-lậgû sõ ꞌbá ĩꞌdî rî kâtí,
gólâ lôꞌĩ íyî nyãányâ trá ngá dáãbõ gõꞌdá kúnı̣́ mvá lậgû-lậgû ró rî ꞌbá yî sĩ.
17 Ngbãângbânõ rî, nyĩî ró, ngá-tı̣̂ dũû gólâkâ ꞌdĩ ꞌbá yî drã trá ndrĩ.”
Kõlóngbõ ândrê ândrê lı̣́pı̣̂ yî gõꞌdá gólĩyî ndrĩ rĩ ꞌbá lôsĩ ꞌẽlé lı̣̃mvû ꞌá rî ꞌbá yí bê, âꞌdô ĩyî kpá âdréꞌá gĩâ jẽjẽ ró. 18 Gõꞌdá gólĩyî ndrê bê õcĩkã âfõꞌá lạ̃sı̣́ gólâ rĩ ꞌbá jạ̃rı̣́bạ̃ ꞌdî zãlé rî kâ rî, gólĩyî drí ôtrézó ûrû kĩ,
“Ãlôwálâ kó îtõ võ ꞌásĩ rî, jạ̃rı̣́bạ̃ ãzâ kó yûꞌdạ́wạ́ gạ̃rạ̃ gólâ nõô rî drı̣̃ı̣̂ sĩ.”
19 Ĩtí rî, gólĩyî drí ngãzó ófó ômvólé lôdãlé ĩyî drı̣̃ı̣̂ sĩ lúlũ bê kĩ,
“Wúûwú! Bãbĩlónã! Ĩzã kõkõ, ĩzã kõkõ!
Jạ̃rı̣́bạ̃ ândrê ꞌdĩ ĩzã lâ gâ trá ãmâ lı̣̃fı̣́.
Ạ̃kû ró rî, ãmâ õjílã ndrĩ kõlóngbõ kâ rî ꞌbá yî âꞌdô ĩyî trá ngá-tı̣̂ bê dũû tãlâ jạ̃rı̣́bạ̃ ꞌdî tãsĩ,
gõꞌdá nyĩî ró, gõꞌdá âcâ trá ạ̃ꞌdı̣́-drı̣̃ ãgângbêlẽ ró.
20 Õjílã ndrĩ ꞌbũû kâ rî ꞌbá yî, ꞌdõvó nĩ âꞌdô ãyĩkõ ró, tãlâ úûfû Bãbĩlónã trá. Ãnî tã ậngũ ꞌbá Ôvârí kâ rî ꞌbá yî,
gõꞌdá lãjóꞌbá Ôvârí kâ rî ꞌbá yí bê gõꞌdá kpá gólĩyî õjílã Ôvârí rî nyãányâ kâ rî ꞌbá yí bê, nĩ âꞌdô ãyĩkõ ró,
tãlâ Ôvârí fẽ lâŋõ trá drílâ, tãlâ gólâ ûfû ãnî trá.”
21 Gõꞌdá nĩngá sĩ, mãlãyíkã ãzákôlâ mbârâkã ãkĩ bê rî drí ânĩzó kúnı̣́ cú õzõ gólâ ngá ꞌı̣̃zó rî kâtí rî trõzó vũlı̣́ lı̣̃mvû ândrê ꞌá, gõꞌdá tã âtázó kĩ,
“Mĩ ndrê, jạ̃rı̣́bạ̃ ândrê Bãbĩlónã kâ ꞌdĩ áâꞌdô vũꞌá lâ vũdrı̣́ ĩtí,
gõꞌdá âꞌdô ậvı̣̃ꞌá vólé.
22 Gõꞌdá tólâ rî, ócá gõꞌdá ngá kũꞌdı̣́ kâtí rî ꞌbá yî kô.
Ngãtá ngá gólĩyî rĩꞌá võlâ võvõ rî ꞌbá yî óvó kpá kô, lôngó ngõngõ kpá yû.
Gõꞌdá jạ̃rı̣́bạ̃ rî ꞌdĩ ꞌá tólâ rî, õjílã ãzãkã yûꞌdạ́wạ́ âꞌdólé ngá tãndí ró rî ꞌbá yî êdélé gĩlí gõꞌdá kpá ꞌạ̃ꞌı̣́-ãrá ꞌı̣̃lı̣́.
23 Õjílã yûꞌdạ́wạ́ lámbã îꞌĩlí tólâ. Gõꞌdá ãyĩkõ ậfû lãgĩ kâ rî îcá kô âꞌdólé tólâ kpá óꞌdí.
Ngá lậzı̣́ ꞌbá gólĩyî Bãbĩlónã kâ rî ꞌbá yî âꞌdô ĩyî kpá trá õjílã ạ́ngı̣́ ạ́ngı̣́ ró võ ndrĩ ãngó drı̣̃ ꞌá rî ꞌbá yî ꞌásĩ.
Áâdô õrĩ ãngó drı̣̃ ꞌá rî ꞌbá yî trá ndrĩ õjõ gólâkâ rî sĩ.
24 Gõꞌdá Ôvârí fẽ lâŋõ trá Bãbĩlónã drí, tãlâ gólâ ûfû tã ậngũ ꞌbá gólĩyî Ôvârí kâ rî ꞌbá yî trá,
gõꞌdá kpá õjílã Ôvârí rî nyãányâ kâ rî ꞌbá yí bê ãngó drı̣̃ sĩ ndrĩ.”