15
Tã ãyĩkõ drí Ôvârí rî cĩzó õjílã drı̣̃ âdĩ ꞌbá rî tãsĩ rî
1 Kậyı̣̂ ãzâ sĩ rî, bélé-bélé ûꞌdú ꞌbá yî kpá lãꞌbí îzã ꞌbá yí bê dũû ânĩ ĩyî trá úlı̣́ Yésũ kâ ârílí. 2 Gõꞌdá õjílã gólĩyî zı̣̃lı̣́ Pạ̃rúsı̣̃ ró rî ꞌbá yî, kpá lãꞌbí îmbá ꞌbá yî rî trá tã ãzâ ꞌbá yî tı̣̂ lâ ŋãlé ꞌẽlé ĩyî lãfálé ꞌásĩ kĩ nĩ rî, “Yésũ kpá lậmû-ãzíyã ꞌî lãꞌbí îzã ꞌbá nõ ꞌbá yí bê. Nĩ ndrê gólâ ngá nyãꞌá gólĩyí bê.” Pạ̃rúsı̣̃ ꞌdĩ ꞌbá yî zı̣̂ õjílã gólĩyî lãꞌbí îzã ꞌbá ꞌdĩ ꞌbá yî “ ‘õjílã ậvı̣̃-ậvı̣̃ ró” ’.
3 Gõꞌdá Yésũ ârílí bê tã ꞌdî ĩtí rî, drílâ gõzó íꞌdígówá ãzâ ngĩlí. 4 Gólâ kĩ nĩ rî,
Õzõ õjílã ãzâ ãꞌdô kạ́bı̣̃lı̣́kı̣̃ bê nyâꞌdî-njı̣̂, gõꞌdá cé ãlô rî õrî trá vólé, ậvı̣̃ trá rî, gólâ âꞌdô kạ́bı̣̃lı̣́kı̣̃ ꞌdî ꞌbá yî ạ̃mbúkũ lâ ꞌbãꞌá kõró ꞌá. Drílâ gõzó zãâ nĩꞌá ãlô ꞌdĩ ndãlé té drílâ ûsúzó lâ ĩꞌdî. 5 Õzõ ũûsû trá rî, drílâ ậnjı̣̃zó lâ ángbálángõ ꞌá, âgõzó ĩꞌdí bê lâ, drílâ gõzó ꞌbãlé ãyĩkõ ró. 6 Õró gõ tã lâ âtálé íyî lậmû-ãzíyã drí kĩ nĩ rî, “Mâ trá ãyĩkõ ãmbá sĩ, tãlâ kạ́bı̣̃lı̣́kı̣̃ ámákâ ậvı̣̃ ꞌbá rî, má ûsû trá.”
7 Gõꞌdá nĩngá sĩ rî, Yésũ kĩ nĩ rî, íꞌdígówá íyíkâ ꞌdĩ tã ífí lâ rĩꞌá nõtí, Ôvârí rĩꞌá ãyĩkõ ãmbá sĩ, õzõ õjílã ãlô ãâdĩ drı̣̃ trá tã õnjí ꞌásĩ rî, Ôvârí âꞌdó kô ãyĩkõ sĩ õjílã gólĩyî drı̣̃ âdĩ ꞌbá kô ꞌdĩ ꞌbá yí bê, tãlâ gólĩyî rĩꞌá õjílã lómbé-lómbéwá ꞌbá ꞌî, kĩ nĩ rî, yĩ âꞌdô tãndí ró.
8 Nĩngá sĩ, Yésũ âtâ íꞌdígówá ãzâ kpá trá õkó ãzâ tãsĩ kĩ nĩ rî,
Lãfâ õkó ãzâ kâ ậvı̣̃ trá drı̣́gạ́ lâ sĩ jó ꞌá. Õkó ꞌdĩ rî trá lãfâ íyíkâ ꞌdĩ ndãlé jó ꞌásĩ. Drílâ lạ̃sı̣́ îꞌĩzó ãlíká sĩ, rĩzó jó ꞌálé ậkũlı̣́ mãnísĩ, ı̣́ndı̣̂-ı̣́ndı̣̂, rĩzó lãfâ íyíkâ ꞌdĩ ndãlé té drílâ ûsúzó lâ ĩꞌdî. Gólâ kĩ nĩ rî, “Wáâwá! Ãwô-ĩtí, má ûsû lãfâ ámákâ ậvı̣̃ ꞌbá rî trá.” 9 Õkó ꞌdĩ drí kpá íyî lậmû-ãzíyã yî ậzı̣́zó kĩ nĩ rî drílĩyî, “Ãwô-ĩtí, ãyĩkõ cî trá má rú, tãlâ lãfâ ámákâ ậvı̣̃ ꞌbá jó ꞌá rî, má ûsû trá.”
10 Yésũ drí gõzó tã âtálé kĩ, “Õzõ tã õnjí ꞌbá ãlô âdĩ drı̣̃ trá tã õnjí ꞌásĩ rî, ãyĩkõ cî trá Ôvârí rú ãmbá.”
11 Yésũ âtâ íꞌdígówá ãzâ ngĩî lâ kpá trá tã Ôvârí drí drı̣̃ âdĩ ꞌbá rî lẽzó rî tãsĩ drílĩyî kĩ nĩ rî,
Ãgô ãzâ ngá-drı̣̃ ãmbá bê, gólâ rĩꞌá mvá bê rı̣̃, ãgô mvá ró. 12 Gõꞌdá mvá gólâ ạ̃dú ró rî drí tã âtázó íyî átá drí kĩ nĩ rî, “Tátá, nî rĩꞌá ngá bê ãmbá. Má lẽ ní câ ngá ꞌdĩ ꞌbá yî lãfálé ãmâ drí ãkpã ní drí drã ãkó. Ní âfẽ ámákâ rî ngbãângbânõ.” Gõꞌdá átá lâ drí ngá yí bê rî lãfálé lâ cãzó drílĩyî ậdrúpı̣̃ lâ bê. 13 Gõꞌdá nĩngá sĩ rî, mvá gólâ ạ̃dú rî drí ngá gólâ íyíkâ rî gĩzó ngbá vólé, íyîngá nĩzó ꞌbạ̃drı̣̃ ãzâ ꞌá jẽjẽ ró átá lâ rú sĩ. Gõꞌdá nĩngá sĩ rî, gólâ îzã lãfâ tíbê ꞌbã ꞌbá yí bê rî trá ndrĩ rĩrĩ õnjî-õnjî sĩ. 14 Lãfâ tíbê ãmbá mvá ꞌdĩ drı̣́gạ́ nõ ndẽ rû trá ꞌbũû. Gõꞌdá nĩngá sĩ, kãrábã ạ́ngı̣́ lõfó kâ ꞌdê trá ꞌbạ̃drı̣̃ ãmbá ꞌdĩ ꞌásĩ ndrĩ, gõꞌdá ûsû mvá nã trá cú ĩtí lãfâ ãzâ ãkó yí drı̣́gạ́. 15-16 Gõꞌdá nĩngá sĩ, mvá ꞌdĩ nĩ trá ãgô ãzâ ꞌbá yî kó ꞌbạ̃drı̣̃ ꞌbá ró rî ãlô lâ ngálâ lôsĩ ndãlé ꞌẽlé. Gõꞌdá ãgô ꞌdĩ drí gólâ rî jõzó nĩꞌá võ ngbíkpí kâ rî ꞌálâ, ngbíkpí íyíkâ vó lâ ndrẽlé. Gõꞌdá gólâ ı̣̂sũ tã trá kĩ nĩ rî, “Ãwô-ꞌdĩ, tãkó, má âꞌdô ngá nyãꞌá ãndrõ ạ̃drúgú kúrũmû rĩꞌá dãlâ ĩgîzẽ bê ngbíkpí drí ꞌdĩ ꞌbá yî.” Gõꞌdá nĩngá sĩ rî, õjílã ãzâ ãlôlâ fẽé ngá ꞌdĩ ꞌbá yî drílâ nyãlé kô.
17 Nĩngá sĩ rî, tã ı̣̂sũ-ı̣̂sũ âcâ trá gólâ drı̣̃ı̣̂ nõtí kĩ nĩ rî, “Má õtírĩ rĩî drãlé lõfó drí nõ rî, lôsĩ ꞌẽ ꞌbá ámâ átá drí ạ́mvú ꞌá rî yî, gólĩyî rĩꞌá ngá nyãnyã bê kpânó-kpânó vũdrı̣́ sĩ. Gõꞌdá nõô rî, má drí rĩzó íyíkâ drãlé lõfó drí ámâ átá drí ꞌbãrẽ bê rî ꞌá yã? 18 Mâ nĩꞌá gõlé ámâ átá ngálâ, mâ kĩꞌá nĩ rî, ‘Tátá, má îzã rû trá, má ꞌê tã õnjí trá bũúũ Ôvârí rú, gõꞌdá kpá ní rú. 19 Ngbãângbânõ rî, îcá gõꞌdá kô ní drí ámâ zı̣̃zó kpá óꞌdí ánî mvá ró. Ní ꞌê mâ õzõ lôsĩ ꞌẽ ꞌbá áníkâ rî tí.’ ”
20 Gõꞌdá nĩngá sĩ rî, drílâ ngãzó zãâ nĩꞌá gõlé íyî átá ngálâ. Gólâ drẽ jẽjẽ ró íyî átá lạ̃gạ́tı̣́ sĩ rî, átá lâ drí gólâ rî ndrẽzó. Átá lâ rî ꞌâ gâ trá ạ̃trạ̃. Átá lâ drí ârázó ânĩlí rû ûtúlı̣́ gólâ drı̣̃ı̣̂, gólâ rî âmvólé bı̣́-ꞌbálé lâ võzó. 21 Gólâ âtâ tã trá átá lâ drí kĩ nĩ rî, “Tátá, má îzã rû trá, má ꞌê tã õnjí trá bũúũ Ôvârí rú gõꞌdá kpá ní drí, îcá kô gõꞌdá ní drí ámâ zı̣̃zó ánî mvá ró.”
22-23 Gõꞌdá mvá ꞌdĩ átá lâ, ãyĩkõ cî gólâ trá ãmbá, rî tã ꞌẽlé ꞌdó lı̣̃fı̣́ ãkó. Drílâ lãjóꞌbá íyíkâ zı̣̃zó kĩ nĩ rî, “ꞌWãâꞌwâ, nĩ ꞌbã lũmvû drílâ dãlé yí rú, õsõ ró ítá tãndí, káꞌbókã bê íyî pá ꞌá. Nĩ âfẽ ró tómó ámákâ nã sõlé drı̣́gạ́ lâ. Nĩ nĩ ró bê kạ́bı̣̃lı̣́kı̣̃ sẽsẽ ró ꞌdĩ âsélé fũlı̣́. Mã ꞌê ró bê kãrámã ạ́ngı̣́. 24 Má kĩ nĩ rî, mvá ámákâ nõ drã trá, tákõ íyîngá lédrẽ-lédrẽ ró.” Gõꞌdá drílĩyî kãrámã îtónãzó.
25-26 Nĩngá sĩ rî, ójô ꞌdĩyímvá nĩꞌá mvá gólâ sı̣́sı̣́ rî ậzı̣́lı̣́ ạ́mvú lésĩ ãânĩ ró, tãlâ gólâ rî ậdrúpı̣̃ tíbê ậvı̣̃ ꞌbá rî âcâ trá ꞌbã ꞌá. Gõꞌdá ágámvá gólâ sı̣́sı̣́ ꞌdĩ õtírĩ íyíkâ âcá ãnyî ꞌbã lạ̃gạ́tı̣́ rî, kálálá gõꞌdá trá tákányĩ ꞌbã ꞌálâ. Ágámvá ꞌdĩ kĩ, “Ãꞌdô tã ꞌî nõtí nõ yã?” 27 ꞌDĩyímvá ꞌdĩ kĩ, “Ánî átá fû kạ́bı̣̃lı̣́kı̣̃ lîngâ-lîngâ trá kãrámã ạ́ngı̣́ ꞌẽzó ĩꞌdî sĩ lâ, tãlâ ánî ậdrúpı̣̃ âgõ trá vólé ꞌbã ꞌá, tã ãmbá gólâ rî ı̣̂mvú ꞌbá ꞌdĩ ꞌásĩ.”
28 Mvá sı̣́sı̣́ rî trá õmbã ró, îcá gõꞌdá âfõlé ạ̃ꞌdı̣́-drı̣̃ ꞌá kô. Nĩngá sĩ, átá lâ drí ânĩzó rúꞌbạ́ lôꞌbãlé rú lâ, ãâfõ ró bê ꞌbã ꞌálâ nî-bê-yã fẽlé íyî ậdrúpı̣̃ drí. 29 Âtâ tã trá átá lâ drí kĩ nĩ rî, “Ámâ átá, ní ndrê drẽ, ndrô ãmbá nõ sĩ rî, má rî trá ꞌbã ꞌá ngá ꞌẽlé ní drí õzõ lãjóꞌbá kâtí. Má ꞌé tã õnjí ãzâ ní drí kô. Ní âfẽ íyíkâ ãꞌdô ꞌî má drí yã? Ngbãâ ꞌạ̃ꞌú ró rî, ní fú ãmâ drí nyãlé ámâ lậmû-ãzíyã yí bê kãrámã ꞌẽzó kô. 30 Gõꞌdá mvá áníkâ tíbê ngá áníkâ îzã ꞌbá ndrĩ õkó mvá drı̣̃ı̣̂ õlẽ ró yî bê gõꞌdá âgõ íyíkâ bê rî, ní drí kạ́bı̣̃lı̣́kı̣̃ ạ́ngı̣́ fũzó drílâ.”
31 Átá lâ lôgõ tã-drı̣̃ trá drílâ kĩ nĩ rî, “Ámâ mvá, ní ndrê drẽ, ãmâ rĩꞌá ní bê ı̣̃tú vósĩ cé ꞌbã ꞌá nõ, ngá gólâ ámákâ rî ndrĩ ꞌdó rĩꞌá kpá áníkâ. 32 Má ꞌê drẽ kãrámã, má âꞌdô ró ãyĩkõ sĩ, tãlâ ánî ậdrúpı̣̃ tíbê ngá pã ꞌbá õdrã ꞌásĩ nô rî tãsĩ.”
Ngá gólâ íꞌdígówá gólĩyî nâ nõ ꞌbá yî ꞌá rî yî rî tã âꞌdálé âꞌdô ngá lẽlẽ Ôvârí kâ tã õnjí ꞌẽ ꞌbá drí rî tãsĩ. Yésũ rî tã ꞌdî âtálé Pạ̃rúsı̣̃ yî drí, tãlâ Pạ̃rúsı̣̃ yî lẽé ĩyî Yésũ drí rĩlí tã õnjí ꞌẽ ꞌbá bê võ ãlô ꞌá kô.