1 Ámâ ậdrúpı̣̃ yî ámâ îzó yí bê, nĩ lẽ tã trá Kúmú ãmákâ Yésũ Krístõ gólâ âꞌdó ꞌbá sı̣́sı̣́ ãzí-ãzí drı̣̃ı̣̂ sĩ rî ꞌá. Ĩtí ró rî, nĩ ꞌbã õjílã ãzãkã kô ãlôlâ âꞌdólé gạ̃rạ̃ õjílã ãzâ ꞌbá yî drı̣̃ı̣̂ sĩ. 2-3 Õzõ õjílã ãzâ âꞌdó ꞌbá ngá-tı̣̂ bê dũû rî ãânĩ trá ítá lânjã bê yí rú gõꞌdá kpá tómó dáãbõ ꞌásĩ bê íyî drı̣́-mvá ꞌá, drílâ ngãzó âfílí ãnî lãfálé ꞌá ãnî drí rû êꞌbérẽ võ ãlô ꞌá rî tú rî, gõꞌdá nĩngá sĩ, ãnî drí ngãzó tã âtálé gólâ drí kĩꞌá nĩ rî, “Ãgô ãmbá, ní ânĩ ạ̃tı̣́ ꞌá nõlé rĩlí rĩ-võ tãndí nõ drı̣̃ı̣̂.” Gõꞌdá vólé drı̣̃ lâ ꞌásĩ, ãzâ íyíkâ ngá ãkó lé ꞌbá ꞌî cú ítá lı̣́rı̣́kũ bê yí rú njãvõ-njãvõ, drílâ ngãtá íyíkâ kpá ngãzó âcálé, gõꞌdá ãnî drí ãníkâ ngãzó tã âtálé gólâ drí kĩꞌá nĩ rî, “Ní nĩ áníkâ rĩlí gĩâ ı̣̃nyạ́kú drı̣̃ı̣̂ ı̣̂bı̣́rı̣́bı̣́ nã drı̣̃ı̣̂ nãlé”, õzõ ngãtá nĩ ãâyê gólâ íyíkâ âdrélé pá drı̣̃ı̣̂ ûrû yã rî. 4 Ãꞌdî ꞌbã ãnî õjílã lãfálé cãlé rî nĩ yã? Õzõ nĩ õcâ õjílã lãfálé trá rî, ꞌdĩî nĩ ꞌê trá tã õnjí ꞌî.

5 Nĩ ndrê drẽ, ámâ îzó yî ámâ ậdrúpı̣̃ yí bê, Kúmú ạ́ngı̣́ ãmákâ Ôvârí rî gógó êpẽ ngá ãkó lé ꞌbá trá íyî tã lẽlé ĩꞌdî, tãlâ gólĩyî õrî ró bê kũmũ íyíkâ rî zẽlé cú tã tãndí ãmbá dũû yî Ôvârí drí ꞌbãlé fẽlé drı̣́-ꞌâ ró gólĩyî íyî lôvó bê ꞌdĩ ꞌbá yî drí ꞌdĩ bê. 6 Ãꞌdô kpálé ĩtí rî, ãnî nyãányâ îzã ngá ãkó lé ꞌbá rú trá. Âꞌdô âꞌdóꞌá ngá ãkó lé ꞌbá ĩꞌdî ãnî lârâkô ꞌẽlé yã? Âꞌdô âꞌdóꞌá gólĩyî ĩꞌdî ãnî lâsélé nĩlí âjí bê lâ kúmú ândrá sĩ yã? ꞌÉꞌẽ, âꞌdô âꞌdóꞌá ngá-tı̣̂ dũû lé ꞌbá ĩꞌdî. 7 Âꞌdô kpá ꞌbãꞌá gólĩyî ãlôlâ ꞌdĩ ꞌbá yî ĩꞌdî úlı̣́ õnjí âtá ꞌbá ãnî gólĩyî Yésũ Krístõ rî rú âpázó drı̣̃ lâ rî yî rú rî. Gõꞌdá bê trá ĩtí rî, nĩ ꞌbã lậnjı̣̃ ngá-tı̣̂ dũû lé ꞌbá rú ãꞌdô tãsĩ yã?

8 Õzõ nĩ ãârî tã gólâ Ôvârí ãmákâ drí ꞌbãlé ãmâ drí rî trá kĩ nĩ rî, “Nĩ ꞌbã ãzí-ãzí yî lôvó ndrĩ kpá té ãnî drí ãnî lôvó ꞌbãrẽ kâtí” rî, ꞌdĩî âꞌdô âꞌdóꞌá tãndí ró lậvũlı̣́ gạ̃rạ̃. 9 Gõꞌdá õzõ nĩ õꞌbã õjílã ãzâ ꞌbá yî trá âꞌdólé gạ̃rạ̃ ãzâ ꞌbá yî drı̣̃ı̣̂ sĩ rî, ꞌdĩî nĩ ꞌê tã õnjí tẽtẽ trá, tãlâ óômbê ãnî trá tã îzã ꞌbá ró âꞌdô tã Ôvârí kâ ꞌbãlé ꞌẽlé rî vó ró. 10 Õzõ õjílã ãlô ãnî lãfálé ꞌásĩ ãârî tã Ôvârí kâ ꞌbãlé ꞌẽlé rî trá ndrĩ, gõꞌdá drílâ ãlô rî âyézó ꞌẽ ãkó lâ rî, ꞌdĩî gólâ trá tã Ôvârí kâ ꞌbãlé ꞌẽlé rî ârí ꞌbá lâ kô rî ĩꞌdî. 11 Rĩꞌá ĩtí lâ ꞌdĩ ró, tãlâ Ôvârí rî gógó âtâ nĩ ngbálí-ngbálí kĩ nĩ rî, “Nĩ ꞌbã ꞌdãzí rî õkó ãnî ũgúlı̣́ ꞌá kô.” Gõꞌdá Ôvârí âtâ kpá nĩ kĩ nĩ rî, “Nĩ fû õjílã kô.” Tã rî ꞌdĩ tãsĩ rî, õzõ kpálé nĩ õꞌbã ꞌdãzí rî õkó kô ũgúlı̣́ ꞌá rî, gõꞌdá õzõ nĩ ũfû õjílã trá rî, ꞌdĩî ãnî rĩꞌá tã Ôvârí kâ ꞌbãlé ꞌẽlé rî ârí ꞌbá kô rî ĩꞌdî. Ĩtí, õzõ nĩ ĩîzã õjílã rú trá rî, áâꞌdô kpá lâŋõ fẽꞌá ãnî drí lậvũlı̣́ kôrô.

12 Tã âtâ-âtâ ãníkâ ꞌásĩ ndrĩ gõꞌdá kpá tã ꞌẽꞌẽ ãníkâ ꞌásĩ ndrĩ rî, nĩ ı̣̂sũ dódó kĩ, Ôvârí âꞌdô tã ãníkâ kĩꞌá âꞌdô tã gólâkâ kĩ ꞌbá nĩ rî, nĩ õlẽ ãzí-ãzí kpá õzõ ãnî drí ãnî ífífí lẽrẽ kâtí rî rú. Ôvârí ꞌbã tã ꞌdî ãmâ pãzó mbârâkã tã õnjí kâ rî ꞌásĩ. 13 Õzõ nĩ ãꞌdô tã tãndí ꞌẽ ꞌbá õjílã drí kô rî ĩꞌdî rî, Ôvârí ꞌé tã tãndí ãnî drí kpá kô. Áâꞌdô tã ãníkâ kĩꞌá, té õzõ tã ãnî drí rĩꞌá ꞌẽlâ õjílã drí rî vó ró. Tã tãndí ꞌẽꞌẽ ꞌdî âꞌdô Ôvârí rî ꞌbãꞌá âꞌdólé ãyĩkõ ãní bê kậyı̣̂ tã kĩkĩ kâ sĩ.

14 Ámâ ậdrúpı̣̃ yî ámâ îzó yí bê, âꞌdô âꞌdóꞌá kó ángô tí yã, õzõ nĩ ãâtâ kĩꞌá nĩ rî, nĩ ꞌbã tã lẽlẽ ãníkâ trá Ôvârí ꞌá, gõꞌdá nĩngá sĩ rî, nĩ gõ nĩ ꞌé tã rî ꞌdĩ kô âꞌdô lâ vó ró rî yã? Pạ̃tı̣́ı̣̃ tã lẽlẽ ãníkâ ꞌdĩ âꞌdô fí ãnî pãꞌá trá yã? ꞌDĩî îcá kô. 15-16 Õzõ nĩ õndrê õjílã ãzâ trá ãlô ãnî lãfálé sĩ ítá ĩzã bê ngãtá ngá-ĩyínyâ ĩzã bê, gõꞌdá ãnî drí ngãzó tã âtálé drílâ kĩꞌá nĩ rî, “Ôvârí ãâꞌdô ní bê, ní âꞌdô ró bê ítá lânjã bê, gõꞌdá kpá ngá-ĩyínyâ tãndí bê”, cú ĩtí õjílã rî ꞌdĩ ậmú ãkó ãlôwálâ rî, ꞌdĩî âꞌdâ íyíkâ ãꞌdô ꞌî yã? ꞌDĩî rĩꞌá cú ĩtí tã ífí ãkó. 17 Ĩtí rî, tã lẽlẽ ãníkâ élê tã lâ ꞌẽ ãkó rî âꞌdô âꞌdóꞌá lôsĩ ãkó.

18 Õzõ õjílã ãzâ ãlô ãâtâ tã má drí kĩꞌá nĩ rî, “Ĩîcâ trá õjílã ãzâ drí rĩzó cú tã lẽlẽ Ôvârí ꞌá rî bê, gõꞌdá ãzâ ãlô rî íyíkâ rĩꞌá cú tã ꞌẽꞌẽ tãndí bê õjílã drí” rî, má âꞌdô âtáꞌá lâ drílâ kĩ nĩ rî, “Gõꞌdá ní ꞌélé bê tã ãzãkã kôꞌdáwá rî, ní âꞌdô áníkâ gõꞌdá âꞌdáꞌá lâ má drí kĩꞌá nĩ rî, ní ãâꞌdô trá cú tã lẽlẽ bê Ôvârí ꞌá rî íyíkâ ángô tí ró yã? ꞌDĩî má âꞌdô tã lẽlẽ ámákâ âꞌdáꞌá ní drí cú ĩtí drı̣̃ vẽ ãkó, tãlâ tã ꞌẽꞌẽ ámákâ Ôvârí ꞌá rî sĩ.” 19 Nĩ lẽ tã trá kĩꞌá nĩ rî, Ôvârí rî gógó rĩꞌá ãlô yã? Rĩꞌá tãndí ró. Sãtánã yî lẽ ĩyî kpá ndrĩ ꞌdó tã ꞌdî. Ĩtí rî, Sãtánã rî gólĩyî rĩꞌá ũrı̣̃ bê kpã kpã kpã. Tã lẽlẽ élêwálâ tã ꞌẽꞌẽ ãkó rî îcá kô õjílã pãlé.

20 Gõꞌdá bê ĩtí rî, ãnî õjílã gólĩyî tã nı̣̃ ãkó nõ ꞌbá yî, nĩ lẽ má drí âꞌdázó lâ ãnî drí kĩ nĩ rî, tã lẽlẽ Ôvârí ꞌá cú ĩtí ꞌẽꞌẽ lâ ãkó rî rĩꞌá cú ĩtí lôsĩ ãkó yã? 21-22 ꞌDõvó nĩ ꞌdê mã ndrê ãmâ ạ́ꞌbı̣́yạ́ Ãbãrãyámã. Gólâ îtõ íyî mvá Ĩsákã rî fẽlé ngá fẽfẽ ró Ôvârí drí võ ngá lı̣̃ kâ Ôvârí drí rî drı̣̃ı̣̂. Gólâ rĩꞌá tã lẽlẽ bê gõꞌdá kpá cú ꞌẽꞌẽ lâ bê. Tãlâ ꞌdĩî tãsĩ rî, Ôvârí ndrê gólâ õjílã tã mbı̣̂ ꞌbá ró. Nĩ ârî trá yã? Ĩtí rî, tã ꞌẽꞌẽ gólâkâ âꞌdâ tã lẽlẽ gólâkâ rî ĩꞌdî. 23 Gõꞌdá tã rî ꞌdĩ drí âꞌdózó õzõ îgĩlí trá rî kâtí kĩꞌá nĩ rî,

24-26 Mã ndrê drẽ tã Rãhábã kâ. Õzõ gólâ ãꞌdô kpálé ãgô kpã ꞌbá ró sı̣́sı̣́ lâ sĩ rî ĩꞌdî rî, gólâ lậgû lómígówá ꞌbạ̃súrú Ĩsĩrãꞌélẽ kâ rî ꞌbá yî ꞌásĩ ngá-ĩyínyâ sĩ võ rû lậpı̣́zó õjílã rĩ ꞌbá gólĩyî lôndãlé rî ꞌbá yî drí sĩ rî bê, gõꞌdá drílâ kpá gólĩyî jõzó gõlé vólé kôrô pávó tı̣̂ ngĩî ãzâ ꞌásĩ, tãlâ gólĩyî õpâ ró ngá bê. Tã ꞌdî tãsĩ rî, Ôvârí drí Rãhábã rî ndrẽzó tã mbı̣̂mbı̣̂ ꞌẽ ꞌbá ró.

Tã ꞌẽꞌẽ õjílã kâ âꞌdô gólâ rî ꞌbãꞌá nĩ âꞌdólé mbı̣̂mbı̣̂ ró Ôvârí rî lı̣̃fı̣́ drı̣̃ ꞌá ꞌdó tã lẽlẽ gólâkâ Ôvârí ꞌá rî bê. Tã lẽlẽ gólâkâ élêwálâ îcá kô gólâ rî ꞌbãlé âꞌdólé õjílã mbı̣̂mbı̣̂ ró. Tã lẽlẽ élêwálâ tã ꞌẽꞌẽ ãkó rî rĩꞌá õzõ ãvõ lôvó-lôvó ãkó yí ꞌá rî kâtí.