11
Israel bagee okoo eebaa yaato kuwa Yesus me menaa si yayeeta kiya okoo noonaa Wa yaato daamaa wigintaata bagee kiyaata menaa
1 Israel bagee yuwa me Ogatamee mee kisee si yayeeta kemaata anii apaadee see menaa ena mee ko kisee: Ogatamee me kuwa Wa me bagee yuwa be kaa tameepeata ye? Kisee menaa kuwa peenaa ma taa, iyo. Anii miya Israel bagee, Abraham me asii-kaba-kaba seta bagee ena, toma ko Benyamin apaa kaa mée yoka 2 Israel bagee kuwa, Ogatamee me petamanii kaama daamaa wiginta bagee kuwa be kaa umina wisintagaano taa. Idukaa nabi Elia wa me Israel bagee okoo kaa Ogatamee paagoo yawegata menaa mee ikii ewo ye? Mee ebeamaata menaa mee ko kisee: 3 "TUHAN, wae. Okoo me A me nabi bagee kuwa kawogeepeasegea, ani too topa. Bedaa A paagoo agiyoo kupi-manee taa see yoo uduma miya kakabaapi-paapi semaagea. Eto ko okoo anii miya nawugiino see dimii mee agoo" see aseta. 4 Kiya Ogatamee me Elia aseta menaa mee mapea menaa? Wa me asiino, "Okoo mée tujuh ribu Ni yaato daamaa wigintaata topea. Okoo Baal paagoo kagu sibumaano taa, waa ebo ekeasiino taa see bagee yuwa" see aseta. 1Raj 19:10-18 5 Mee mokoo miya eto mee begaa kaa Israel bagee noonaa Wa yaato daamaa wigintaata bagee yuwa topea, Wa me okoo aii epa kaa daamaa wigintaata bagee yuwa. 6 Wa me okoo Wa yaato daamaa wigintaata mee ko okoo me daamaa ukuwagee seta agiyoo kuwa kaa wigintaata se kiya Wa me okoo aii epa dimii kaa too Wa yaato daamaa wigintaata. Wa me mée me daamaa ukuwagee seta agiyoo kuwa kaa mée wigintaata naaki Wa me okoo aii epa kaa too wigintaata ii see menaa kuwa se wegamaayaa. Ep 2:4-9
7 Wa me mée kisee aii epa kaa daamaa mée wigintaayaa kemaata Israel bagee kuwa kaasee? Israel bagee okoo Ogatamee me inii sikii mée kiyaagi naaki ou see dimii mee gaawoo seta kiya Wa me okoo kisee sikii kiyaano taa, Wa me daamaa wigintaata bagee yuwa okoo too kisee sikii kiyaata. Kuwa apanaa Israel bagee daamaa wigineano taa yuwa kuwa Wa me dimi mena eboo yakiyaata. 8 Mee see see okoo kaa menaa ena yaebeamaata, mee ko kisee:
"Ogatamee me okoo toomoo dimii yakiyaata,
diino naka see emaa manta,
apa togo me yiino naka see miya yakiyaata,
idukaa kaama kisee too eto miya okoo ewo kedaa siwookea" see menaa ebeamaata. Ul 29:4, Yes 29:10
9 Bedaa mee see see okoo kaa menaa ena Daud me miya yawegata, mee ko kisee:
"Kuwa bagee kuwa okoo me naano agiyoo eebaa noogee siyaa yoo kiyoo kupi kaa booyaa yoo mokoo yakiyaano daamaa,
okoo kisee boodaa taano daamaa.
Bedaa okoo okaata kaama okoo me pedeo ukuwagee seta doodoo okoo kaa kisee yaukuwayaabuu taano miya daamaa.
10 Okoo emaa se deesi naadi emaa digiyoo yakiyaano miya daamaa,
bedaa okoo ae-wae siyaa agiyoo eebaa okoo kaa yadootagaa naadi kaama
okoo me doogaa da kudiinta kisee too toowoo taano miya daamaa" see yawegata. Mzm 69:23-24
11 Okoo kaa yawegata menaa kuwa kisee gaayu ko anii bedaa apaadee see menaa ena miya kisee: Israel bagee kuwa okoo eebaa yaato Yesus mikee gaano taa kemaata okoo kisee okaata kaama umina pedeo kedaa seta ye? Kisee menaa kuwa peenaa ma taa, iyo. Okoo me Yesus me doometa menaa si yayeeta kemaata kuwa menaa doodoota mée tomaa-tomaa apanaa yuwa paagoo eeweganaa seta, mée eebaa daba daagimaa peeyaabuu seta. Mee ko Israel bagee yuwa me kuwa deeta kaama inii miya kisee mée kiyaagi naaki ou see dimii mee misi naadi kuwa apanaa tomaa kaa bagee yuwa daba daagimaa peeyaabuu seta. 12 Israel bagee yuwa me Yesus me menaa kisee si yayeeta kemaata Ogatamee me mée tomaa-tomaa okoo kaa esee daamaa agiyoo aii yaukuwaaniyaabuu taaki. Eto ko Israel bagee yuwa daba kedaa seta kemaata Ogatamee me mée tomaa-tomaa apanaa yuwa okoo kaa esee daamaa agiyoo yadootagaa segeeki. Wa me kisee mée tomaa-tomaa okoo kaa daamaa yaukuwawoo segeeki kiya epeekaa Israel bagee yuwa okoo miya Yesus mikee gaayaa bagee mée eebaa kedaa naadi kaama kuwa Wa me mée tomaa-tomaa apanaa yuwa kaa daamaa yaukuwaaniyaabuu siyaa agiyoo kuwa bedaa mee asii esee maamaa eebaa kedaa taata.
Mée tomaa-tomaa apanaa yuwa daba daagimaa peeta menaa
13 Eto ko anii ikii Yahudi bagee paagoo se kiya apanaa tomaa kaa bagee yuwa paagoo mena ena kisiinaka, mee ko kisee: Anii Yesus me doometa menaa mee ikii paagoo kiiweganaasi naadi Wa me anii pooi see nasimi kuwa esee ebo agiyoo yoka anii ede ma yaukuwanaa segeeka. 14 Apanaa tomaa kaa bagee Yesus mikee gaagea kemaata anii ma tomaa kaa bagee kuwa noonaa me kuwa deeta kaama okoo me anii miya kisee daba daagimaa peega naaki ou see dimii mee misi naadi anii kuwa menaa eeweganaaka. 15 Mee ko Yahudi bagee me si yayeeta kemaata Ogatamee me okoo ekeata kaama mée tomaa-tomaa apanaa yuwa Waa ma daamaa emee-emee siyaata. Kuwa mikee daamaa agiyoo okoo kaa yaukuwata kiya epeekaa Ogatamee me Yahudi bagee yuwa okoo miya Wa yaato miyaatagi kuwa ko mee asii esee daamaa agiyoo yaukuwaatagi, boota bagee daamaa aya andoo peeyaa mokoo okoo miya daamaa kaatagea.
16 Roti kaa ebea-ebea menaa mee ko kisee: Ogatamee paagoo maniyaa roti petamanii mee pataguu to mee ko Waa taano kisi naadi daamaa wa too wigintaata see roti mee. Kisee kemaata mee kaama wodoo Wa paagoo maniyaa roti apa yuwa kuwa uduma miya kisee daamaa wa too wigintaata roti kiyaa. Piya manii da ebea-ebea mee miya kisee. Piya mani yuwa daamaa wigintaata kaama Ogatamee Waa taano kiyu ko piya kago yuwa miya daamaa wigintaata kaama Waa taano kiyaa.* Roti ebea-ebea ma, piya mani yuwa ebea-ebea ma kuwa mena nekeeniino yaato ko roti petamanii maniyaa yuwa ma, piya mani yuwa ma kuwa Abraham ma, Isak ma, Yakub ma kuwa ebea-ebea. Roti apanaa yuwa ma, piya kago yuwa ma kuwa Yahudi bagee yuwa ebea-ebea. Petamanii Abraham daamaa wa too wigintaata see see wa me asii-kaba-kaba seta bagee yuwa okoo miya wigintaata Ogatamee Wa yaato bagee yuwa kiyaata, okoo aii bagee se, see kuwa nekeensi naadi ebea-ebea menaa wiya kuwa.
17 Mee mokoo miya ebea-ebea menaa ena miya kisee: Zaitun piyaa wodoo to weetaata kaama daamaa iyawoo naadi kago yuwa noonaa daageeta kaama kisee eke. Ekeata kaama peedoota aii weeno taa zaitun piya wodoo to kaa kago ena pe-daageeta kaama mee weta piya wodoo to kaa kago daageeta otoo to kaa kuwa kagoo yuwa yupii daamaa pe-taku. Mee daamaa weta piya wodoo to mani yuwa kuwa daamaa kemaata mee aatakutaata kagoo da mee daamaa iyataa. Mee mokoo miya ikii mée tomaa-tomaa apanaa yuwa kisee daamaa kitakumetaata topea. 18 Kiya ikii apanaa tomaa kaa bagee kuwa ebo poga-poga se taai. Ikii me 'Anii ko daamaa natakumetaata kagoo da mokoo, okoo daageeta ekeata yuwa kuwa aii bagee yoka' see mee se gaai. Ikii kisee ebo poga-poga bagee yuwa daamaa nekeenii: Piya kagoo yuwa kuwa me piya mani yuwa pesee kiyaakee se kiya piya mani kuwa me kago yuwa pesee keta kaama daamaa iyaakee.† Mee zaitun see piyaa daamaa weta wodoo to mee ko Israel bagee ebea-ebea. Kagoo yuwa noonaa daageeta kuwa ko Israel bagee Yesus mee mikee gaano taa yuwa ebea-ebea, bedaa mee pe-takumetaata kagoo da mee ko mée tomaa-tomaa apanaa yuwa Yesus mikee gaata yuwa ebea-ebea. "Piya mani kuwa me kago yuwa pesee keta kaama daamaa iyaakee" see mee mena nekeeniino yaato ko petamanii Ogatamee me Abraham paagoo "Aa doodoo mée tomaa-tomaa yuwa uduma okoo kaa miya daamaa agiyoo yadootagaata" see aseta kemaata waa manii to mokoo, bedaa mée tomaa-tomaa apanaa yuwa kuwa Israel bagee doodoo daamaa kiyaata. Kisee kemaata mée tomaa-tomaa apanaa yuwa kuwa inii ebo, Yahudi bagee okoo peedi, kisee ebo poga-poga se taai naadi ebea-ebea menaa kuwa. 19 Kisee kemaata ikii mée tomaa-tomaa apanaa yuwa me wegayaa menaa ena ko kisee: "Ogatamee Wa me anii mee weta piya wodoo to kaa pe-natakumaano see naadi kaama kuwa kagoo yuwa noonaa daageeta ekeata" see wegayaa. 20 Kuwa mikee menaa kiya okoo Yesus mikee gaano taa kemaata Wa me daageeta ekeata. Ikii gaayu ko ikii Yesus mikee gaata kemaata daamaa kitakumetaata topea. Kisee kemaata ikii ebo poga-poga se kiya weda dimii ma daamaa nekeenii, mee ko kisee: 21 Ogatamee Wa me daamaa weta piyaa kagoo yuwa noonaa daakomeeta see see ikii mée tomaa-tomaa apanaa yuwa miya kisee kiukuwayaa yoka ikii miya daamaa gaamagaai.
22 Kisee kemaata Ogatamee Wa me dapuu see dimii mee too se kiya Wa me mée kagoo kiyaa dimii mee miya nekeenii. Kuwa Ogatamee me ekeata bagee kuwa Wa me kagoo kaa ekeata kiya ikii mée tomaa-tomaa apanaa yuwa gaayu ko Wa me dapuu see dimii kaa kiekee segeeki. Kisee kiya ikii daamaa nekeenii: Ikii me Wa me naepa kigi nao see dimii kaa umiwoo, toowoo siyu ko daamaa. Taa gaayu ko Wa me okoo kago daageeta ekeata see see mokoo ikii miya kisee kiukuwayaa yoka daamaa nekeenii. 23 Yahudi bagee kuwa okoo si yayeeta bagee kiya okoo miya Yesus mikee nao see gaapea kepa ko Ogatamee me okoo daamaa Wa yaato miyaayaa. Daageeta ekeata piya kagoo da mee bedaa masegeeta mee weta piya wodoo to kaa pe-takumiyaa see see mokoo Wa me okoo miya kisee pe-takumiyaa. Wa me kisee yaukuwaaniyaayaa. 24 Mikee, ikii mée tomaa-tomaa apanaa yuwa kuwa ko aii zaitun piyaa kagoo da mokoo, mée me weeno taa piya wodoo to mee kagoo da mokoo. Kisee aii piya kagoo da mee daageeta kaama daamaa weta see zaitun piyaa wodoo to kaa pe-takumeekee kuwa mée me se ukuwayaa agiyoo kiya Ogatamee me ikii kisee daamaa kiukuwata. Kisee Wa me kiukuwata agiyoo mee esee daamaa maa diya Yahudi bagee kuwa Wa me mee asii esee daamaa agiyoo okoo kaa yaukuwaaniyaayaa. Mee ko okoo miya zaitun piya wodoo to kiya daamaa weta piyaa wodoo to mokoo yoka mee piya wodoo to piya kago noonaa daageeta kaama bedaa mee piyaa wodoo to kaa daamaa pe-takumetaayaa, Ogatamee me okoo kaa kisee daamaa yaukuwaaniyaayaa.‡ "Piya kago noonaa daageeta kaama bedaa mee piyaa wodoo to kaa daamaa pe-takumetaayaa" see mee mena nekeeniino yaato ko Yahudi bagee yuwa okoo Yesus mikee gaata kaama okoo bedaa idukaa see see Ogatamee yaato bagee kiyaa, see kuwa nekeensi naadi ebea-ebea menaa mee.
Ogatamee me mée tomaa uduma epa gaata menaa
25 Neebee nokaa yuwa, ikii mée tomaa-tomaa apanaa yuwa ebo poga-poga taapea yoka naadi eto ko anii kuwa idukaa kaama awee da kaa mée ipi kiyaano taa menaa ena daamaa keipi kiyaanaka, mee ko kisee: Israel bagee kuwa eebaa yaato okoo dimi mena eboo kegea. Okoo kisee dimii kaa umiwoo, toowoo naadi kaama mée tomaa-tomaa apanaa yuwa okoo Ogatamee yaato peaneekea, kisee too okoo eebaa kega yoka sikii see dimii gaatagi naagoo too. 26 Mee naagoo Israel bagee yuwa kuwa uduma daba daagimaa pootagea. Mee see see menaa ena ebeamaata, mee ko kisee:
"Sion magaa kaa kaama daba mée daagimaa peeyaano Mée mee meetagi,
Yakub me asii-kaba-kaba seta bagee yuwa okoo me pedeo yuwa yataa kiyaatagi. Yes 59:20
27 Ogatamee me 'Anii kisee daamaa kiukuwaaniyaabuu taata' see aseta menaa mee doodoo
Anii okoo me pedeo yuwa epa yaekeasiita" see wegata menaa mee ebeamaata. Yer 31:33-34
28 Yahudi bagee kuwa Yesus me doometa menaa be kaa wisintaata kemaata okoo Ogatamee ma aayape see bagee yuwa keta. Kisee kemaata ikii mée tomaa-tomaa apanaa yuwa paagoo kuwa menaa kiiweganaa seta. Okoo yape see bagee keta kiya okoo idukaa kaama Ogatamee me daamaa wigintaata bagee yuwa. Mee ko idukaa petamanii okoo me bagee yuwa paagoo Ogatamee me "Anii kisee daamaa kiukuwaaniyaabuu taata" see aseta menaa kuwa me okoo Wa me epa see bagee yuwa. 29 Mikee, Ogatamee me okoo idukaa kaama kisee daamaa wigintaata, bedaa okoo paagoo Anii kisee daamaa aii kiukuwaaniyaabuu taata see menaa kuwa aseta. Kisee kemaata Wa me kuwa menaa yuwa se ekeasiyaa. 30 Idukaa ikii mée tomaa-tomaa apanaa yuwa kuwa Ogatamee me menaa si yayeeta bagee kiya eto Yahudi bagee okoo Yesus me menaa yayiino taa kemaata ikii Wa me kiepa see bagee yuwa keta. 31 Yahudi bagee yuwa okoo miya kisee kaata. Eto ko okoo Wa me menaa si yayeegea kemaata Wa me ikii kiepa kaa daamaa kiukuwami. Kisee kiya ikii see see Wa me okoo miya epa kaa daamaa yaukuwaatagi. 32 Mikee, idukaa Ogatamee me mée tomaa uduma okoo Wa me menaa si yayeeta pedeo ukuwawoo siyaata. Mee ko bedaa Wa me epeekaa okoo uduma epa kaa daamaa yaukuwaano see naadi okoo idukaa kaama kisee yaekeata.
Ogatamee yaapaagee seta menaa
33 Ogatamee Wa kaa senawii agiyoo kuwa se egamaayaa, Wa me dimi bokoo to mee esee ebo, Wa me ipii kuwa asii-sege. Wa me too dimi daataata ukuwawoo siyaa menaa kuwa mée ena me gaamagaano iyo, bedaa Wa me ukuwayaa, peeyaa yuwa miya se nekeeniyaa. Kisee menaa ena ebeamaata, mee ko kisee:
34 "TUHAN me gaayaa dimii mee ipi see mée ena agoo ye?
Wa paagoo 'Kisee ukuwaano daamaa, kisee ukuwaano pedeo' see tupiyaa mée maamee ya? Yes 40:13
35 Bedaa Ogatamee paagoo 'Ani me miya kisee kaneega yoka
A me miya kisee nii' see menaa ena ma asiyaa ye?" see menaa ebeamaata. Ayb 41:11
36 Se-agiyoo, we-agiyoo kuwa uduma Wa me too ogaataata, uduma Wa me pesee da kaa too toowoo siyaa, kuwa uduma me Wa too ebo ekee siwoo siyaa. Eto ko Wa too asii-sege see Mée mee niiyaapaagee siwoo taai, kisee too iminoo miya, iminoo miya! Amin.
11:4 1Raj 19:10-18
11:6 Ep 2:4-9
11:8 Ul 29:4, Yes 29:10
*11:16 Roti ebea-ebea ma, piya mani yuwa ebea-ebea ma kuwa mena nekeeniino yaato ko roti petamanii maniyaa yuwa ma, piya mani yuwa ma kuwa Abraham ma, Isak ma, Yakub ma kuwa ebea-ebea. Roti apanaa yuwa ma, piya kago yuwa ma kuwa Yahudi bagee yuwa ebea-ebea. Petamanii Abraham daamaa wa too wigintaata see see wa me asii-kaba-kaba seta bagee yuwa okoo miya wigintaata Ogatamee Wa yaato bagee yuwa kiyaata, okoo aii bagee se, see kuwa nekeensi naadi ebea-ebea menaa wiya kuwa.
†11:18 Mee zaitun see piyaa daamaa weta wodoo to mee ko Israel bagee ebea-ebea. Kagoo yuwa noonaa daageeta kuwa ko Israel bagee Yesus mee mikee gaano taa yuwa ebea-ebea, bedaa mee pe-takumetaata kagoo da mee ko mée tomaa-tomaa apanaa yuwa Yesus mikee gaata yuwa ebea-ebea. "Piya mani kuwa me kago yuwa pesee keta kaama daamaa iyaakee" see mee mena nekeeniino yaato ko petamanii Ogatamee me Abraham paagoo "Aa doodoo mée tomaa-tomaa yuwa uduma okoo kaa miya daamaa agiyoo yadootagaata" see aseta kemaata waa manii to mokoo, bedaa mée tomaa-tomaa apanaa yuwa kuwa Israel bagee doodoo daamaa kiyaata. Kisee kemaata mée tomaa-tomaa apanaa yuwa kuwa inii ebo, Yahudi bagee okoo peedi, kisee ebo poga-poga se taai naadi ebea-ebea menaa kuwa.
‡11:24 "Piya kago noonaa daageeta kaama bedaa mee piyaa wodoo to kaa daamaa pe-takumetaayaa" see mee mena nekeeniino yaato ko Yahudi bagee yuwa okoo Yesus mikee gaata kaama okoo bedaa idukaa see see Ogatamee yaato bagee kiyaa, see kuwa nekeensi naadi ebea-ebea menaa mee.