3
Yahudi bagee me Ogatamee si yayeeyaa kiyaa miya Ogatamee Wa too esee mikee dimii yago Mée yoka see gaasi naadi menaa
1 Kisee Yahudi bagee yuwa ma, mée tomaa-tomaa apanaa yuwa ma kuwa endagii kemaata Yahudi bagee kuwa keagoo se, see kuwa wegayaa ye? Bedaa kado ponee daapeasiino mee imi taa see agiyoo too, see kuwa miya wegayaa ye? 2 Taa, Yahudi bagee kuwa okoo kaa daamaa asii-doge-doge siwoosi naadi yaekeata agiyoo eebaa. Petamanii esee daamaa yaekeata agiyoo mee ko Ogatamee me menaa mee. 3 Kisee Yahudi bagee kaa daamaa yaekeata kiya okoo noonaa kuwa menaa mikee menaa yoka see gaano taa. Okoo Wa me menaa wisintaata kemaata Ogatamee me miya Wa me idukaa Yahudi bagee paagoo "Anii kisee daamaa kiukuwaaniyaabuu taata" see aseta menaa kuwa Wa me wisintagaapi ye? 4 Kisee menaa kuwa peenaa ma taa, iyo. Se-bagee, we-bagee kuwa uduma makapaa menaa wegataa see bagee yuwa too kiyaa miya Ogatamee me kisee se. Waa mikee menaa too wegataa see Mée kemaata kuwa Wa me idukaa aseta menaa kuwa se wisintaayaa. Mee see see ebeamaata menaa ena mee ko kisee:
"A me wegayaa menaa kuwa uduma mikee, topoo too ii see kuwa mée me awee da kaa kanekeeniipea.
Bedaa Aa kawisiniyaa menaa kuwa uduma A me yataa kiyaabuu segee taape" see menaa ebeamaata. Mzm 51:6
5 Kisee kiya inii pedeo ukuwagee see bagee kuwa me inii pedeo, Ogatamee Wa too daamaa, Wa too topoo see Mée ii see kuwa awee da kaa mée nekeeniyaayaa yoka inii kaasee wegayaa? Mée me aii wegayaa menaa ena mee ko kisee: "Inii me pedeo ukuwagee seta agiyoo kuwa me Ogatamee Wa too topoo see Mée ii see kuwa daamaa nekeeniyaa yoka Wa me inii me pedeo yuwa kaa mée kagoo kaa pedeo mée yadootagaakee kuwa se, kisee mée yaukuwaano koopoo, se maa?" Kisee menaa kuwa mée noonaa me aii wegayaa kiya 6 kisee menaa kuwa peenaa ma taa, iyo. Ogatamee Waa dimi koopoo naaki magaa da kaa bagee kuwa okoo kaa daamaa, pedeo see kuwa Wa me kaasee yawegata kaama wigintaayaa? Iyo.
7 Bedaa mée ena me wegayaa menaa ena miya kisee: "Anii makapaa menaa yago mée mee me anii pedeo, Ogatamee Wa too esee mikee dimii yago Mée, Wa too asii-sege see Mée ii see kuwa daamaa awee da kaa nekeeniyaa. Ni me makapaa menaa kuwa me Ogatamee Wa too mikee dimii yago Mée ii see nekeenta kaama Waa yaapaagee siyaa yoka kaasee kaa Wa me aa pedeo ukuwagee see mée yoka naadi anii napedeo kiyaayaa?" see menaa mee miya mée me aii wegayaa. 8 Aii wegayaa menaa ena ma kisee: "Inii pedeo, Ogatamee Wa too daamaa ii see kuwa mée me awee da kaa daamaa nekeensi yoka inii pedeo agiyoo niiukuwaai" see wegayaa menaa kuwa inii miya wegaano daamaa ye? Taa, inii kisee menaa se wegayaa kiya mée noonaa me inii kuwa menaa weganaakea yaai, see menaa kuwa mée yakobanaakea. Kuwa mée yakobanaakea bagee yuwa kaa Ogatamee me pedeo yadootagaano daamaa.
Se-bagee, we-bagee kuwa uduma pedeo too see kuwa nekeensi naadi menaa
9 Kisee kemaata inii mapea menaa wegayaa? Inii Yahudi bagee kuwa peenaa ebo see tomaa, mée tomaa-tomaa apanaa yuwa kuwa see see se, see kuwa wegayaa ye? Taa, kisee menaa se wegayaa. Anii yumakaa kiebeapa menaa see see Yahudi bagee miya, mée tomaa-tomaa apanaa yuwa miya mée uduma pedeo dimii gaawoo, pedeo agiyoo ukuwawoo, kisee umiwoosi naadi pesee da ma aagadi siwoo seta bagee yuwa keta. 10 Mee see see menaa ebeamaata, mee ko kisee:
"Dimi mena topoo see bagee ena ma, ena ma taa, Mzm 14:1-3, 1Yoh 1:10
11 nekeeniino bagee ena miya taa,
Ogatamee Waa ou dimii gaayaa bagee miya taa.
12 Mée uduma Ogatamee mee amaa kaa ekeasegea,
uduma otoopa umiwoo, toowoo see bagee yuwa too,
daamaa agiyoo ukuwagee see bagee taa,
mikee, mée ena ma taa.
13 Mée bootaa da ogo maata yoo kabataayaa see see
okoo togaawee kaama pedeo menaa pakayaabuu see,
dabegea da me mée deebaa see menaa too,
pokoo to kaa wegayaa menaa kuwa otoogiyoo me tani uwoo mokoo. Mzm 5:10, 140:4
14 Okoo ebeawee kaama pedeo ayaa mée yadootaayaa menaa miya agoo,
mée wisineekee menaa miya maamaa pudii, Mzm 10:7
15 okoo mée tadaa peeyaano see naadi
bado mani-mani see peenaa siyaa. Yes 59:7-8
16 Okoo me mée wegee-wegee taano see naadi metaa,
mée ae-wae siyaabuu taano see naadi peetaa,
17 mée aaemee-emee siyaa etaa da mee okoo ewo.
18 Ogatamee Wa too ebo, Wa too weda see dimii mee okoo taa" Mzm 36:2 see menaa ebeamaata.
19 Kisee menaa ebeamaata yoka mée tomaa uduma dimi topoo see mée ena ma taa. Yahudi bagee miya, okoo Musa me menaa deewoo see bagee kiya okoo me "Anii kuwa menaa uduma daamaa deewoo see mée yoka anii sikii" see menaa wegaano kuwa iyo, se wegamaayaa. Kisee kemaata se-bagee, we-bagee uduma Ogatamee me wigintaata kaama pedeo kiyaayaa see bagee yuwa too, see kuwa inii ipi. 20 Musa me menaa deewoo naadi kaama Ogatamee me waa sikii, waa miya nao see deeyaa bagee ena ma taa. Musa me menaa kuwa ko inii sikii mée kiyaayaa menaa se kiya inii kuwa "Kisee ukuwaai, kisee se ukuwaai" see menaa kuwa doodoo inii me 'Anii pedeo agiyoo ukuwataa see mée ii' see dimii mee awee da kaa mée nekeeniyaayaa menaa kuwa. Rom 7:7-8
Ogatamee mikee gaakee kaa too Wa me waa sikii, waa miya nao see mée deeyaa see kuwa nekeensi naadi menaa
21 Musa me menaa deewoo naadi kaama Ogatamee me waa sikii, waa miya nao see mée deeyaa se kiya eto Wa me waa sikii, waa miya nao see mée deesi naadi menaa kuwa awee da kaa mée deeyaata. Kuwa menaa kuwa idukaa Musa ma, nabi bagee yuwa ma okoo me wegawoo seta, 22 kuwa ko kisee: Yesus Kristus mee mikee gaakee kaa Ogatamee me waa sikii, waa miya nao see mée deeyaa, inii Yesus mikee gaayaa bagee uduma kisee mée deeyaa. Mikee, inii mée tomaa uduma endagii, 23 inii uduma pedeo agiyoo ukuwagee seta bagee yuwa kemaata inii uduma sikii taa. Ogatamee paagoo asii-sege siyaa agiyoo yuwa mée kaa daamaa yaekeata yuwa kuwa taa kedaa seta kaama inii kisee totaakea. Ep 1:7, Tit 3:4-7, 1Yoh 2:2 24 Mée tomaa kuwa uduma kisee toowoo siyaa bagee yuwa too kiya Ogatamee Wa me inii epa mée gaata dimii mee me Kristus Yesus doodoo inii Ogatamee ma menaa yuwa aii mée yataa kiyaata kaama daba mée daagimaa peeyaabuu seta. Kuwa me kaama Ogatamee me aii kisee inii sikii mée kiyaata. 25 Kristus Yesus Wa me tadaa me inii kaa menaa yuwa mée yataa kiyaata, inii me Waa mikee gaakee kaa Ogatamee me inii ma mée emee-emee siyaata. Mee ko Yesus bogaano taa miyoo mée tomaa-tomaa pedeo dimii gaawoo, pedeo agiyoo ukuwawoo, umiwoo seta kiya Ogatamee Waa dimi animaata okoo pedeo kiyaano taa, kisee too mée ekee siwoo seta. Kiya okoo me kisee too pedeo agiyoo ukuwawoo naadi kaama Waa ma menaa kuwa eebaa kiwoo siyaa see kuwa pedeo. Wa me okoo kisee too pedeo ukuwawoo, umiwoo siyaano kuwa topoo see taa, iyo. Kisee kemaata Ogatamee Waa topoo see Mée ii see deesi naadi Wa me kuwa Waa ma menaa eebaa kiwoo seta yuwa kuwa Yesus doodoo mée yataa kiyaata. 26 Wa me kisee daamaa mée yaukuwata mee ko eto Ogatamee Waa topoo see Mée ii see nekeeniyaa, bedaa Yesus mikee gaata bagee yuwa okoo Waa ma menaa yuwa yataa kiyaata okoo sikii kiyaabuu taa see Mée ii see kuwa miya awee da kaa mée deeyaano see naadi mée yaukuwata.
27 Kisee kemaata mée ena me ebo poga-poga dimii kaa "Anii Musa me menaa deewooka kuwa kaa anii sikii" see kuwa wegayaa ye? Kisee wegaano iyo. Kaasee kaa kisee se wegayaa? Inii Yesus mikee gaakee kaa too sikii kiyaa yoka ebo poga-poga menaa ena ma taa. 28 Mikee, inii me wegawoo siyaa menaa mee ko kisee: Ogatamee me waa sikii, waa miya nao see mée diino kuwa ko Musa me menaa deewoo see kaa se kiya Yesus mikee gaakee kaa too waa sikii see mée deeyaa, see menaa mee too mikee menaa. 29 Ogatamee mee ko Yahudi bagee me Eboo too ye? Waa mée tomaa-tomaa apanaa yuwa okoo me Eboo miya, taa ye? Mikee, Waa mée tomaa-tomaa apanaa yuwa okoo me Eboo miya. 30 Ogatamee mee ko ena too too, mée okoo uduma me Eboo kemaata Yesus mikee gaayaa bagee uduma, kado ponee daapii seta bagee miya, apanaa tomaa kaa kado se daapii see bagee miya uduma okoo sikii, okoo miya nao see mée diipi. 31 Inii Yesus mikee gaakee kaa sikii kiyaa yoka Musa me menaa kuwa aii wisintaayaa ye? Kisee menaa kuwa peenaa ma taa, iyo. Inii Yesus mikee gaakee kaa kuwa Musa me menaa kuwa mikee menaa yoka naadi se wisintaayaa, see kuwa inii gaayaa.