Ka Sulat ni Pablo to mgo Taga
Episu
Tongod to Soini no Sulat dio to mgo Taga Episu
Ka lunsud to Episu, duon to probinsia to Malintok no Asia no nasakup to gobirnu no dio to Ruma. No nigsulatan ni Pablo ka mgo otow no nigtuu ki Hisus no dio to sikan no lunsud. Ka nigsulat si Pablo to soini, napirisu sikandin su ligkat to pognangonnangon din to Maroyow no Nangnangonon tongod ki Hisu Kristu.
To kabinunsuran to soini no sulat, impohitaga ni Pablo ka karoyawon no ogligkat to nigsagboka ki Hisus ka mgo otow no nigtuu kandin woy songo ogkasagboka on sikandan to duma no mgo otow no ogtuu on kandin. Pogkaponga, innangon ni Pablo ka batasan no litos to mgo patalaasawa, woy ka litos to mgo amoy woy mgo inoy, woy ka batasan no oglitos to mgo bato, woy ka litos to mgo uripon woy ka tagtuun kandan. No to katamanan to sulat din, duon ig-anad ni Pablo oyow kono ki ogkaayat to salo. Woy innangon din ko ogmonuon ta ko duon igsulung ni Satanas kanta. No ka ig-atu ta woy ka ig-atang ta, impanag-iling din to kalaglagan to sundalu.
Ka Ignangon to Soini no Sulat
Ka kabinunsuran no ignangonnangon 1:1-2
Ka pogkasagboka ta ki Hisu Kristu 1:3 – 3:21
Ka batasan no litos no og-unugon to mgo nigtuu 4:1 – 6:9
Ka ig-atu woy ig-atang ta ki Satanas 6:10-20
Ka katamanan to soini no sulat 6:21-24
1
1 Ka soini no sulat, nigligkat kanak no si Pablo. Nohimu a no suguanon ni Hisu Kristu su sikan ka imboot to Magboboot kanak.* To Ginirigu, ka lituk to Kristu Hisus, ogkounawa rod ki Hisu Kristu. Si Kristu, ogkalituk to sikandin ka Im-imanan to mgo Koot-otawan.
Ogsulatan ku sikaniu no dio to lunsud to Episu no nigtuu ki Hisu Kristu woy ogkasaligan to ogpaagad-agad to mgo sugu din kaniu.
2 Ogbuyu a to Amoy tanow no ka Magboboot woy si Hisu Kristu no ian Lagboy no Igbuyag ta oyow ogkohoy-uan kow woy to ogkabogayan kow ran to maawang no pog-ugpo now.
Ka mgo Pogkohoy-u no Ogligkat ki Hisu Kristu
3 Ogpasalamatan tanow ka Magboboot no ian Magboboot woy Amoy to Lagboy no Igbuyag ta no si Hisu Kristu su ligkat to nasagboka kinow on ki Kristu, nohoy-uan kinow on to Magboboot. Ian su dio to Langit, nigbogayan kinow rin to tibo no karoyawon no ogligkat to Gimukud din. 4 Dongan no waro pad nohimu ka soini no kalibutan, nig-alam kinow on to Magboboot oyow ogkohimu kinow on no mgo sakup din ligkat to ogkasagboka kinow ki Hisu Kristu. Ian su tuud din to oyow ogmaroyow kinow on dio to tangkaan din no waro igkoogot din kanta.
5 No su dakol ka goinawa to Magboboot kanta, tahan on no nigboot sikandin to oyow ogkohimu kinow on no anak din ligkat to nighimu ni Hisu Kristu. Sikan ian ka tuud din woy ka ogkoiniatan din. 6 Ogsayoon tanow ka Magboboot su dakol ka ingkohoy-u rin kanta su nasagboka kinow on to Anak din no si Hisus no indakoli rin to goinawa.
7 Ka langosa ni Hisu Kristu to pogkamatoy rin ka imbalukas din kanta, no nigpasaylu on ka mgo salo ta. Dakol lagboy ka sikan no ingkohoy-u to Magboboot kanta, 8 no waro ogpakasokod to sikan no igkohoy-u rin.
Ligkat to dakol no katagaanan din woy ka dakol no katouanan din, 9 nigtuman to Magboboot ka dongan no imboot din duon ki Hisus. Woy impohitaga rin on kanta ka sikan no tuud din no nokani ingkoholos. 10 Ka tuud to Magboboot oyow, ko ogpokouma on ka allow no nig-indanan din, ogsagbokoon din naan do dio ki Kristu ka katondanan to tibo to agad nokoy no dio to Langit woy ka kai to kalibutan. 11-12 No to tibo no oghimuon to Magboboot, ogtumanon ka tuud din woy ka ogkoiniatan din. No su tuud din, sikanami no an-anayan no nigtuu, impanoy koy rin nig-abin to oyow ogkohimu koy on no sakup din no ogkasagboka on ki Kristu.† Ka mgo Hudiu no nigtuu on ki Hisus, ian ka an-anayan no nigtuu kandin. Mohuri naalap ka nangnangonon dio to mgo otow no kono no Hudiu. Ka sikan, tahan no imboot to Magboboot ligkat dongan. No ka tuud din to oyow ligkat kanami, ogkasayo ka Magboboot no ian mabogbog.
13 No sikaniu no mgo taga Ipisu no nigtuu on ki Hisus, songo nounawa kow rod kanami no nigdinog kow to soini no tu-tuu ian no kinagian to Magboboot, no ian ka Maroyow no Nangnangonon tongod to ogkapangabangan kinow on to mgo salo ta. Nigtuu kow on ki Hisu Kristu no nigbogayan kow on to Gimukud to Magboboot no ian og-indan to nohimu kow on ian no mgo sakup din. Sikan ka impanoy rin innangon no igbogoy rin kanta. 14 No ka Gimukud to Magboboot ka igmaganangon to uromo, ogkabogayan kinow to tibo no insabut din kanta taman to ogkapongaan din on ka pogpangabang din kanta. Ogsayoon tanow ka Magboboot no ian mabogbog.
Ka Pog-ampu ni Pablo
15 Sikan ian, mgo sulod, ligkat to nignangonan a to pogtuu now to Lagboy no Igbuyag ta no si Hisus, woy ligkat to nignangonan a to dakol ka goinawa now to tibo no mgo otow no nigtuu on kandin, 16 waro a nighagtonghagtong to ogpasalamat to Magboboot tongod kaniu. No ko og-ampu a kandin, og-ampuan ku sikaniu. 17 Sikandin ka Magboboot to Lagboy no Igbuyag ta no si Hisu Kristu, woy sikandin dod ka Amoy tanow no mabogbog. Ogbuyu a kandin to oyow ligkat to Gimukud din, ogkabogayan kow to maroyow no pogsabut oyow lagboy igpohitaga rin kaniu ka goinawa to Magboboot. 18 Ogbuyu a kandin to oyow ogkapulasan on ka pogdoromdom now oyow ogkatagaan now on ian ka tibo no ogkoim-imanan tanow su nohimu kinow on no mgo sakup din. Woy ogbuyu a to oyow ogkatagaan now ian lagboy ka sikan no karoyawon no insabut to Magboboot no igbogoy rin uromo to mgo sakup din. 19 Woy og-ampu a oyow ogkatagaan now to dakol lagboy ka kabogbogan to Magboboot no ogpakabulig kanta no ogtuu kandin. No ian ka kono ogkatogkad no kabogbogan no 20 in-uyag to Magboboot ki Kristu ligkat to kamatayon din. No pogkaponga, nigpapinnuu rin on si Hisus dio to kawanan din dio to Langit.‡ Ogkabasa to Salmo 110:1. 21 No dio ian si Hisu Kristu ka ogsugu. No ka katondanan din, ogpakalabow to katondanan to agad hondoi no igbuyag woy to agad hontow no mabogbog woy agad hontow no og-alap to mabogbog no katondanan. Nabogayan si Kristu to dakol no ngaran no oglabow to tibo no ngaran kai to kalibutan kuntoon woy ka dio to langit taman to waro katamanan. 22 Impariralom to Magboboot ki Hisu Kristu ka tibo to agad nokoy no nohimu woy insabuk din on si Hisus no Lagboy no Igbuyag to tibo no mgo nigtuu kandin oyow ogkabuligan din sikandan.§ Ogkabasa to Salmo 8:6. 23 No sikantanow no nigtuu kandin, ogkounawa ki ro to lawa ni Hisus. No ogkatibulus ka tibo no tuud din kai to kanta. No sikandin ka ogtibulus to agad hondoi no dio to Langit woy ka kai to tano.
*1:1 To Ginirigu, ka lituk to Kristu Hisus, ogkounawa rod ki Hisu Kristu. Si Kristu, ogkalituk to sikandin ka Im-imanan to mgo Koot-otawan.
†1:11-12 Ka mgo Hudiu no nigtuu on ki Hisus, ian ka an-anayan no nigtuu kandin. Mohuri naalap ka nangnangonon dio to mgo otow no kono no Hudiu.
‡1:20 Ogkabasa to Salmo 110:1.
§1:22 Ogkabasa to Salmo 8:6.