1  ✡ Pal 1:16 “Nini nakaukavu vaivaikala ane ꞌo ulai noxou angelo noxiꞌa ta mitema noxou Lataua ne Epeso. Itema e utetelisiꞌa ta oto muxatele tamei no avolu tema xe umuamuaꞌi no taiinu mii sou itulusou telu xoulu no anu muxatele tamei ane mulamilami ne, uvikala aloxo ꞌo, 2  ✡ 1Ioa 4:1‘Eni elavusou ꞌiliꞌilixomengi mo xaixai tatila e ngingi ngeꞌoxonu. Mo eni elavu lexe ngingi ngatulu pekiaꞌinge no anu tuꞌutuꞌumaxu mo ngingi ngamomomo sou ngatulu noxiꞌa ta mitema ta masua la uasi. Mo eni elavusou lexe ngingi ngetovoneꞌi aneꞌi ane mikalavoingengi lexe aneꞌi ta mitema noxou Iesu sou upalupalusiꞌa la ngelavusiꞌa lexe aneꞌi ta mitema sou kalakalavoisi. 3 Mo ngingi ngetulu pekiaꞌinge mo ngexolu seꞌisisi no anu tuꞌutuꞌumaxu xo ngingi ngemulileli no ualasilo ia ngingi ngatotosa uasi.

4 Ia eni akalapuusinge. Xo ngingi tei la ngemasaxailo, ia vaimomo ꞌo la ngamasaxailo uasi. 5  ✡ Pal 3:3La sou ngingi ngaxavutalanu ꞌilixo laixe ngingi ngemulinu tei. Ia vaimomo ꞌo ngingi ngelapau! La sou ngingi ngaxiu mo ngamulinu ꞌiliꞌilixo ane ngingi ngeꞌoxoꞌoxo tei sou ngamasaxailo. Lexe ngingi ngaxiu uasi, la eni aneꞌe axexeenu mii sou itulusou telu no anu noxinge no tanixu ne asukunu ulai vaꞌaxu. 6 Ia eni aꞌiti ualasinge, xo ngingi ngamasaxau ꞌiliꞌilixo noxiꞌa aneꞌi ane mimulinu xavutala noxou Nikolasi uasi manina aloxo eni kalumo.’

7  ✡ Tav 2:9; Pal 22:2, 19ꞌEi ane sangalou, la ulomusou vaikala ane Uleenu Tavuna muvikalaneꞌi ta mitema noxou Lataua no anu laixe. Xe anu ane ualulixu ꞌotoꞌoto, la eni apelemasaxanu sou uꞌou ovu sou mauli ngiaxu. Ovu ne, mutulu no nano no tuala laixe noxou Lataua.”

8 “Nini nakaukavu vaivaikala ane ꞌo ulai noxou angelo noxiꞌa ta mitema ne Sumuna. Itema e sokoꞌu mo kaluxu xe musoli ia mumauli la ne, Anu uvikala aloxo ꞌo, 9  ✡ 2Ko 11:14-15; Pal 3:9‘Eni elavusou lexe ngingi ngaxamulinu navunavu mo mengi mimii uasi, ia noxou Iesu Kalisito la ngingi mengi mimii tavuꞌalo. Mo eni elavu lexe ta mitema ane aneꞌi ikalavoi lexe aneꞌi ta Iutaia ne, ivikala masuasinge. Ia aneꞌi ta Iutaia manina uasi, aneꞌi ta mitema noxou Satani. 10  ✡ 2Ti 4:8; Iak 1:12Ia mamu sou ngaꞌume no anu navunavu e ꞌalaꞌalai sou ngingi ngaxalisou. Eni avikalangengi lexe itema masua anu Satani umulaxaꞌa seꞌi noxinge no nano no taasou navunavu sou utovongengi mo ngingi ngaxolu no anu navunavu ane ne voxo mavulovexa. Ia ngingi ngatulu pekiaꞌinge ulai utalo no voxo ane ngingi ngasoli, la eni alosinge mauli ane kaluxu uasi loxo eni alosou itema e muuli no anu saisale kisivalu.’

11  ✡ Pal 20:14; 21:8ꞌEi ane sangalou, la ulomusou vaikala ane Uleenu Tavuna muvika-laneꞌi ta mitema noxou Lataua no anu laixe. Xe anu ane uaulixu ꞌotoꞌoto, la anu umomomo sou uulua no anu soli tameisou uasi.”

12 “Nini nakaukavu vaivaikala ane ꞌo ulai noxou angelo noxiꞌa ta mitema ne Peluxamo. Itema e utetelisou laviso anaxu tamei ia laviso ne anaxu misevile ne, uvikala aloxo ꞌo, 13 ‘Eni elavusou lexe ngingi ngaxoxolu no tani ane ne Satani musaxilaꞌu. Ia ngingi ngamulimulileli kalumo. Xe no voxo ane ta mitema no tualasinge e Satani muxolu no anu ne mivau Antipasi sou musoli, la ngingi ngaxiu tumalingeilo uasi. Io anu ne, anu muꞌoxonu xaixai laixe sou muaꞌaloxu ualasilo.

14  ✡ Iti 22:1–25:2; 31:16; 2Pi 2:15Ia eni akalapuusinge no anu mimii moseꞌi, xo ta mitema seꞌi no taiingengi ne mimulinu vaivaikala e Balamu mulosieꞌixu. Tatei, la anu mulosiouxu Balaki sou muꞌoxoneꞌi ta Isilaeli sou misusu la miꞌou laꞌilali e milosiꞌa ta Maliava sou kalakalavoi. Xe miꞌoxonu ꞌiliꞌilixo masumasua sou voteꞌi. 15 Aloxo ta mitema moseꞌi no taiingengi kalumo mimulinu vaivaikala e Nikolasi mulosieꞌixu. 16 La sou ngaxiu. Ia lexe ngingi ngaxiu uasi, la eni ꞌalaꞌalai sou alivu aneꞌe noxinge. Aneꞌe la aꞌotoxaꞌa no anu laviso no anaxo.’

17  ✡ Mul 16:4, 14-15, 33-34; Ais 62:2; Ioa 6:48-50ꞌEi ane sangalou, la ulomusou vaikala ane Uleenu Tavuna muvika-laneꞌi ta mitema noxou Lataua no anu laixe. Xe anu ane ualulixu ꞌotoꞌoto, la eni aitiu laꞌilali ilemo lexe mana e mitalumeu. Mo eni alosou lavoꞌo kea vile. No anu lavoꞌo kea ne, la mikau-kavunu uala vile alavua no anu, ia anu ane unoꞌu lavoꞌo ane nesi ulavusou.”

18  ✡ Pal 1:14-15 “Nini nakaukavu vaivaikala ane ꞌo ulai noxou angelo noxiꞌa ta mitema noxou Lataua ne Tiatila. Lataua ꞌOlu e iou loxo navu lamixu xe tavaꞌu loxo barasi ulamilami ne, uvikala aloxo ꞌo, 19 ‘Eni elavusou ꞌiliꞌilixomengi mo ꞌilixo sou ngemasaxau Kalisito mo muxamuxaxu tangengi noxou mo xaixai e ngingi ngaꞌoxoꞌoxonu ulai noxiꞌa ta menexinge mo elavu lexe ngingi ngetulu pekiaꞌinge no anu tuꞌutuꞌumaxu. Mo elavu lexe ꞌiliꞌilixo e ngingi ngaꞌoxoꞌoxonu ne muaulixu ꞌilixo ane ngingi ngeꞌoxo tei.

20  ✡ 1Ta 16:31; 2Ta 9:22Ia eni akalapuusinge, xo ngingi iengi muvaxaie sema to ne ualasie lexe Iseveli. Ane mele milemele lexe ane sema palomatana vile. Ane milosieꞌixaꞌa ta mitema sou xaixai noxilo vitanisi sou miꞌoxonu ꞌiliꞌilixo masumasua sou voteꞌi mo miꞌou laꞌilali ane milosiꞌa ta Maliava sou kalakalavoi. 21 Eni elosie voxo moseꞌi sou lexe ixiu no anu ꞌiliꞌilixoie sou voteꞌi ne, ai ane imasaxa uasi. 22 La sou eni alosie pipiena mo ixamuli navunavu tatila mo iailixu no luusie. Mo eni alosiꞌa aneꞌi ane mitaulaꞌi ia milai noxie navunavu toxoxaꞌa lexe aneꞌi ixiu tumaliꞌau ꞌiliꞌilixo noxie uasi. 23  ✡ Lex 7:9; Iel 17:10; Pal 20:12-13Mo eni aveꞌaveꞌa aneꞌi ane mimulimuline isoisoli. La sou ta mitema noxou Lataua ukalusi ne, ilavu lexe eni elavusou manina ta mitema taneꞌi ilou xavutalaiꞌa mo eni akoli ulai noxinge no anu mii maꞌia ngingi vilevilesi ngaꞌoxonu. 24 Ia eni avikalangengi ngingi ta mitema paꞌusou ne Tiatila e ngingi ngamulinu vaivaikalaie mo ngalavusou mii noxou Satani ane mutalume uasi. Eni amomomo sou alosinge tuꞌutuꞌumaxu seꞌi uasi. 25  ✡ Pal 3:11Ia ngatetelisou mii maꞌia ane ngingi ngenoꞌu ulai utalo no mine eni alivu aneꞌe.’

26  ✡ Lex 2:8-9ꞌEi ane uuaulixu ꞌotoꞌoto mo uꞌoxonu mii maꞌia ane eni emasaxau ulai utalo no anu voxo ane anu usoli ne, la eni alosou xavi sou usaxilaꞌa ta mitema no xalexalee tuatuala ukalusi.

27 ‘Anu usaxilaꞌa no anu vilaxoxu aeni ane xaviinu musuku sou umamuloneꞌi ta mitema loxo latotope ane miꞌoxonu no anu lia utuxusi aloxo eni enoꞌu xavi noxou Mamilo. 28  ✡ Pal 22:16Mo eni alosou xuae sou lamana ukea.’

29 ꞌEi ane sangalou, la ulomusou vaikala ane Uleenu Tavuna muvikalaneꞌi ta mitema noxou Lataua no anu laixe.”