8
Ityaantiri Pawa Aatzikawinisatzi yapirotanti
1 Ari ikantakina Pawa: “Payi antaro incha-kota pisankinatiro, kamiitha onkoñaati pisankinari, onkanti: ‘Mahersalal-hasbaz’. Ikantai-tziro: ‘Irootaintsi inosikan-taiti, yapirotan-taiti’. 2 Pawintyaari Ompira-tasorintsi-taari Urías aajatzi Zacarías itomi Jeberequías, iriitaki kantatsini: ‘Jii, ari okanta.’ ”
3 Okanta osamanitaki, naaki noina ñaawyawai-taniro. Nowaiyan-takaakiro, itzimaki otomi. Ikantakina Pawa: “Pimpaitiri wairontsi pisankina-takiri: ‘Mahersalal-hasbaz’. 4 Tikira iyotanaki iinchaa-niki inkanti: ‘apaa,’ ‘ina,’ yapiroi-takiro nampitsi Ontyaamairini aajatzi Ositikii-toni. Yaitakiro owaararontsi tzimawi-tachari anta yasityaari pinkathari-tatsini Aatzika-winiki.”
5 Yapiitakiro Pawa, ikantana:
6 “Yoka atziri-payi imanintakiro nijaa Tyaantaa-riniki amatsinka-chari osiyaata,
Okantakaan-tziro itharowa-kaari Rezín, aajatzi itomi Remalías,
7 Irootaki ityaantan-tyaariri Pawa ñaapirori iwinkathariti Aatzika-wini-satzi,
Intsipa-takyaari iwayiriti, inkimita-paakyaaro antaroiti amaraniti nijaa Antaraani.
Otarankayiti tsika okinaayitzi.
Anonkaayiti tsika owiraa-chiraata nijaa.
8 Anonkaati irojatzi iipatsitiki Judá-iti, onthonkiro anairo maaroni tsika owiraayita.
¡Ñaamisa Emanuel!
Yoka pinkathari pokaintsiri, inkimityaari siwanki-tatsiri yaagatziri iyominthani.
Irootaki siyakaa-wintacha tsika onkantyaa yapiroitiro apaata maaroni pipatsiti.”
Kisotatsiri yantziwaitari
9 ¡Pasini-satziiti! Papatojiityaa, antaroiti pintharowa-jiiti.
¡Intaina-satziiti! Pinkimisantiro iroka:
Ontzimi-mowityaami pitonka-mintoiti, antaroiti pintharowa-jiiti,
Omaa-piro, ontzimi-mowityaami pitonka-minto, pasi piwatyiiro pintharowa-jiiti.
10 Pinkinkithasiri-wityaa pantiri, tikatsi ompai-tzimaityaa.
Pininta-wityaa pantirimi airo omatzimaita, tima iriitaki Pawa tsipayitajairi arokaiti.
11 Isintsiwintakina Pawa ti okamiithatzi nonkimita-kotyaari ikinkithasiritari pasini-satzi atziri-payi. Ikantakina:
12 “Ti okamiithatzi pinkanta-waiti awiroka: ‘Kamanta-wakaantsi onatzi.’
Okantawitaka irootaki ikantayitakiri atziri-payi.
Airo pitharowa-kaawaitaro awiroka itharowa-kaari iriroriiti.
13 Intaini pintharowa-kaiyaari Pawa Ñaapirori matzirori otzimi-motziri isintsinka, matzirori Itasorintsitzi.
Iriitaki pintharowa-kaiyaa, iriitaki pintharowa-kaiyaa intsipata-tyaami.
14 Iriitaki kimitzi-motyaamini yoka anta isaikaitzi tikatsi awishi-motimini.
Iriima Israel-iiti, ikarataki apiti ipinkathari-wintantzi,
Iriitaki kimityaaroni kisotatsiri yantziwataitari, soompikintsi owaryaan-tatsiri.
Iriima Aapatyaawini-satziiti, onkimitzi-motyaari iriroriiti owasirintsi. * kisotatsiri = mapi
15 Oshiki antziwatan-tyaarini, imparyaa-yitan-tyaari, inkamayiti.
Oshiki aachani owasirin-tsiki, ari isitsikayityaari.”