6
1 Ikanta ikamaji pinkathari Uzías, ari iñaakakana Pawa ithointaka jinoki iwinkathari-mintoki, yanaantakaro opatzi iithaari Tasorintsi-panko. 2 Tzimatsi inkiti-wiri-payi paamathai-taintsiri yaatzinkaka ipatziitoki Pawa. Otzimimo-tziri 6 isiwanki. Apiti isiwanki ipasika-poro-tantari, apiti ipasikantaka iitziki, apiti yarantari. 3 Iriitaki apiiyapii-tzirori ikaimajiitzi, ikantzi:
“¡Tasorintsí! ¡Tasorintsí! ¡Tasorintsi inatzii Pawa Ñaapirori!
Iñiitairo maaroni kipatsiki iwaniinkaro.”
4 Okanta ikampini-tanaki iñaawaitzi, antaroiti onikanaka asitakoro Tasorintsi-panko, kachaaryiinka okantanaka. 5 Ari nokanta-siri-tanaki:
¡Ikanta-machiitana, kamakina!
Tima noñaajiri Nowinkathariti Pawa Ñaapirori.
Kaari-piro-waantiri nonatzii, nosaiki-motziri kaari-piro-waantiri.”
6 Ari ipokasi-tapaakina aparoni inkiti-wiri. Yamakina paamari-minki yaakiri pomitai-rontsiki yairikan-takari yawita-minto. 7 Itzinkan-takanaro paamari-minki nopaantiki, ikantana:
“Pamini, itsitokakami pipaantiki paamari-minki.
Iriitaki apirota-jimironi pikowiinkataki,
Ipyaako-tajimiro pikaaripiro-witaka.”
8 Nokimatzii iñaawai-tanaki Awinkathariti, ikantzi:
“¿Paitama nontyaantiri? ¿Paitama antyaantiri inkamantanti?”
Ari nakanakiri naaka, nokantziri:
“Naaka pintyaanti.” 9 Ari ikantanakina:
“Pimatiro, pinkamantiri atziri-payi, pinkantiri:
‘Ari pinkima-wityaa, airotzimaita pikimathatziro.
Ari paminawityaa, airotzimaita piñiiro.’
10 Awiroka kantakai-yaaroni inkiso-siri-tajitan-tyaari,
Atsikimpitya inkantaityaa, imawityaakiyiti.
Irootaki airo yokichaa-tanta,
Airo ikimi,
Airo ikimatha-tantaro,
Tima airo ikimisantai, airo yawisakotai aajatzi.”
11 Nokantziri:
“¡Nowinkatharití! ¿Onkaratika osamaniti pikantakiri?”
Ikantzi irirori:
“Oshiki osamanitaki, ari asi owiro irojatzi apaata yapiroi-tanta-jyaariri ikaratzi saikatsiri nampitsiki,
Tima kaanki-panko onkantajyaa pankotsi-payi,
Miritzi-patha onkantajyaa kipatsiki tikatsi tzimatsini.
12 Nosikaari inkantajyaa atziri-payi, tima naaka Pawa kantakai-yaaroni.
Kaanki onkantajyaa nampitsi-payi tikatsi nampita-jyaaroni.
13 Intzimi-rika añaanain-tsini, kapichiini inkarati,
Ari yapiroi-tajiri aajatzi yokaiti, inkimitai-yaaro itowaitziro inchato,
Intowawi-taita-kyaaro inchato irojatzi osaikimaityaa oponkitzi,
Irootaki opirini oshootiki-yaanta-jyaari, osiyakaa-wintaro okithoki tasorintsi-tatsiri.” * kapichiini = itzimawita 10 atziri, aparoni-machiini añaatsiri; inchato = encina, roble