O evanđelje e Lukasoro
1
Uvod
1 Cenimeja Teofile, but džene lelje te pisinen oto događaja save ule maškar amende. 2 On pisinde ađahar sar so vaćerde amenđe okola kola taro anglunipe dikhle adala događaja hem kola inele sluge zako e Devlesoro lafi. 3 Ađahar hem me, palo adava so taro anglunipe šukar ispučljum sa adava, mangljum tuće sa palo redo te pisinav, 4 te šaj ove uverime dai čače sa adava so injan sikavdo.
O anđeo phenela so ka bijanđol o Jovan o Krstitelj
5 Kad o Irod inele caro ani Judeja, nesavo manuš palo anav Zaharija inele svešteniko e izraelconengoro, oto redo e Avijasoro. E Zaharijasiri romni da inele oto pleme e Aronesoro. Lakoro anav inele Jelisaveta. 6 O Zaharija hem i Jelisaveta inele pravedna anglo Devel, adalese so živinde palo sa o naredbe hem o zakonja e Gospodesere. 7 Olen na ine čhave adalese so i Jelisaveta našti ine te ačhol khamni, a soduj džene već purandile.
8 Jekh dive kad e Zaharijasiri grupa oto sveštenici kandlja ano Hram, tegani hem o Zaharija ćerela ine pli buti sar svešteniko anglo Devel. 9 Ov, palo adeti e sveštenikonengoro, barbuteja inele izabirime te đerdini ko Hram e Gospodesoro hem te kadini. 10 Sar o Zaharija kadini ine ano Hram, sa edobor narodo molini pe ine avri.
11 A ano Hram e Zaharijase mothovđa pe o anđeo e Gospodesoro, kova terdino ki desno strana oto oltari kotar kadinđa pe. 12 Kad o Zaharija dikhlja le, uznemirinđa pe hem but darandilo.
13 A o anđeo phenđa lese: “Ma dara, Zaharija! O Devel šunđa ti molitva. Ti romni i Jelisaveta ka bijani će čhave, i ka de le anav Jovan. 14 Ka ove but radosno zbog leste hem but džene ka radujinen pe so ov ka bijanđol, 15 adalese so ka ovel baro manuš anglo Gospod. Nikad naka pijel mol hem ništa sostar šaj te mačol pe. Ka ovel pherdo e Svetone Duhoja pana pe dajaće ano vođi. 16 Bute Izraelconen ka irini anglo Gospod, anglo lengoro Devel. 17 Ka džal anglo Gospod sar glasniko ano duho hem ano zoralipe e prorokosoro e Ilijasoro. Ka mirini e daden lengere čhavencar hem okolen so na šunena ka irini nakori mudrost e pravednikonengiri. Te pripremini e narodo te oven spremna zako e Gospodesoro aviba.”
18 I o Zaharija pučlja e anđeo: “Sar me te džanav da čače ka ovel adava so phenđan? Me injum purano hem mli romni da beršali.”
19 A o anđeo phenđa lese: “Me injum o Gavrilo, o anđeo kova terđola anglo Devel. Ov bičhalđa man te vaćerav tuja hem te anav će akava šukar lafi. 20 I ače, ka ove laloro, naka šaj te vaćere sa đi o dive kad adava ka ovel, adalese so na verujinđan mle lafenđe save ka pherđoven ano pravo vreme.”
21 Sar o anđeo vaćeri ine e Zaharijaja, o narodo kova adžićerđa avri čudinđa pe so o Zaharija edobor ačhilo ano Hram. 22 A kad o Zaharija iklilo, našti ine te vaćeri olencar. Ćerela ine nesar te mothoj lenđe vastencar, ali ačhilo laloro. O manuša halile da ole ine vizija ano Hram.
23 Kad pherdile o dive oti lesiri služba ano Hram, o Zaharija irinđa pe čhere. 24 Na nakhlo but, i lesiri romni i Jelisaveta ačhili khamni hem pandž masek na iklili avri taro čher. Phenđa: 25 “O Gospod ćerđa te šaj ačhovav khamni. Akana mothovđa maje pli milost hem cidinđa mli lađ anglo manuša.”
O anđeo phenela e Marijaće so ka bijani e Isuse
26 Kad i Jelisaveta inele šofto masek khamni, o Devel bičhalđa ple anđeo e Gavrilo ki diz Nazaret ani regija Galileja. 27 Adari valjanđa te legari o lafi e Marijaće koja pana inele čhaj. Oj inele mangli e muršese palo anav Josif, kova inele oto pleme e carosoro e Davidesoro.
28 Kad alo o anđeo, phenđa e Marijaće: “Radujin tut! O Gospodi but milostivno premala tute!”
29 A i Marija but uznemirinđa pe zbog e anđeosere lafija, i pučlja pe so šaj te značini adava pozdrav.
30 A o anđeo phenđa laće: “Ma dara, Marije! O Devel mothovđa će pli milost! 31 Ače, ka ačhove khamni hem ka bijane čhave, i ka de le anav Isus. 32 Ov ka ovel baro hem ka vičini pe Čhavo e Najbare Devlesoro. O Devel o Gospod ka del le o presto lesere pradadesoro e Davidesoro. 33 Ka carujini upro pleme e Jakovesoro zauvek; zako lesoro carstvo naka ovel kraj.”
34 Tegani i Marija pučlja e anđeo: “Sar šaj te ovel adava kad me pana injum čhaj?”
35 A o anđeo phenđa laće: “O Sveto Duho ka huljel upra tute hem o zoralipe e Najbare Devlesoro ka učhari tut. Adalese adava čhavo, kole ka bijane, ka ovel sveto hem ka vičini pe Čhavo e Devlesoro. 36 Eče, ti bibi i Jelisaveta da, ko purane berša, ačhili khamni hem ka bijani murše. I oj, kolaće sare džande da našti te ačhol khamni, akanai šov masek khamni. 37 Adalese so o Devel sa šaj te ćerel!”
38 Tegani i Marija phenđa: “Ače, sluškinja e Gospodesiri injum. Nek ovel maje palo to lafi.”
I o anđeo dželo olatar.
I Marija džala te dikhel e Jelisaveta
39 Adala dive i Marija spreminđa pe hem siđarđa ko bregalo krajo, ki jekh diz ani regija Judeja. 40 Kad resli adari, đerdinđa ko čher e Zaharijasoro hem pozdravinđa e Jelisaveta.
41 I kad i Jelisaveta šunđa e Marijakoro pozdrav, o čhavoro oti radost zorale mrdinđa olaće ano vođi, a oj pherdili e Svetone Duhoja. 42 I bare glasoja phenđa e Marijaće: “Najblagoslovime injan maškaro đuvlja hem blagoslovime o čhavoro kole akhareja ano vođi! 43 Akavai bari čast maje so tu, mle Gospodesiri daj, aljan kora mande. 44 Adalese so, kad šunđum to pozdrav, o čhavoro oti radost zorale mrdinđa maje ano vođi. 45 Blago tuće so verujinđan da ka ovel adava so phenđa će o Gospod!”
I Marija hvalini e Devle
46 Tegani i Marija phenđa:
“Mlo vilo barjari e Gospode;
47 Mloi duho radosno ano Devel, ano mlo Spasitelj,
48 so ulo milostivno upri poniznost ple sluškinjakiri.
I ače, od akana sa o generacije ka phenen da injum blagoslovime đuvli,
49 adalese so bare šukaripa ćerđa maje o Zoralo Devel
kasoroi anav sveto!
50 Ovi milostivno e manušenđe tari generacija ki generacija
kola darana olestar.
51 Ple zorale vasteja ćerđa bare buća;
rasfrdinđa e manušen kolai barikane ano pumare vile.
52 Peravđa e vladaren taro lengoro prestolje,
a vazdinđa e poniznonen.
53 Čaljarđa e bokhalen šukaripnaja,
a čučen muklja e barvalen.
54 Pomožinđa e Izraelconenđe, ple slugenđe.
Na bisterđa te ovel milostivno
55 e Avraamese hem lesere potomkonenđe zauvek,
sar so dinđa plo lafi amare pradadenđe.”
56 I Marija ačhili e Jelisavetaja đi sar trin masek, i tegani irinđa pe čhere.
Bijandilo o Jovan o Krstitelj
57 A kad alo o vreme i Jelisaveta te bijani, bijanđa murše. 58 Kad lakiri familija hem lakere komšije šunde so o Gospod mothovđa laće bari milost, radujinde pe olaja. 59 A kad e čhavore inele ofto dive, koro Zaharija čedinde pe o manuša zako obreziba e čhavoresoro. I mangle te den le lesere dadesoro anav – Zaharija, 60 ali i Jelisaveta phenđa: “Na! Lesoro anav ka ovel Jovan!”
61 A on phende laće: “Niko te familijatar na vičini pe ađahar.” 62 I vastencar pučle e Zaharija savo anav mangela te del ple čhavore.
63 Tegani o Zaharija rodinđa te den le jekh tikori phal zako pisiba hem pisinđa: “Lesoro anavi Jovan.”
I sare začudinde pe.
64 I otojekhvar e Zaharijasoro muj phravdilo hem šaj ine palem te vaćeri, i lelja te slavini e Devle.
65 I uklinđa i dar sa lengere komšijen. Ko sa o bregalo krajo e Judejakoro vaćerđa pe adalestar so ulo. 66 I sare kola šunde adava, razmislinde adalestar hem phende: “Akava čhavoro isi te ovel baro manuš. Čačei upro leste o vas e Gospodesoro.”
O Zaharija prorokujini e Mesijastar hem e Jovanestar
67 A o Zaharija, e Jovanesoro dad, pherdilo e Svetone Duhoja hem prorokujinđa:
68 “Slava e Gospodese e Izraelesere Devlese,
adalese so alo hem otkupinđa ple narodo!
69 Vazdinđa amenđe e zorale Spasitelje
oto pleme e carosoro e Davidesoro, ple slugasoro,
70 sar so vaćerđa pana angleder
prekalo muja ple svetone prorokonengere.
71 Vazdinđa amenđe zorale Spasitelje te spasini amen amare neprijateljendar
hem sa e manušengere vastendar kola mrzinena amen.
72 Mothovđa milost amare pradadenđe
hem ispuninđa plo sveto savez,
73 i sovli savi halja e Avraamese amare pradadese:
74 so ka ikali amen amare neprijateljengere vastendar
te šaj služina lese bizi dar
75 ani svetost hem ani pravednost anglo leste sa đikote injam dživde.
76 A tu Jovane, mlo čhavo, ka ove pendžardo sar proroko e Najbare Devlesoro,
adalese so ka dža anglo Gospod te pripremine lese o drom.
77 Ka sikave lesere narodo sar te pendžaren o spasenje
prekalo oprostiba lengere grehija
78 zbog amare Devlesoro milosrdno vilo
palo savo o svetlost odupral ka avel kora amende sar ikljojba e khamesoro,
79 te svetlini okolenđe so bešena ani tomina hem ani senka e meribnasiri,
te legari amen ko drom oto mir.”
80 A o čhavoro o Jovan barjola ine hem zoraljola ano duho. Kad barilo, živinđa ani pustinja sa đikote na iklilo anglo Izraelci te propovedini.