13
Canaan si Nanagi
1 Bada i sisiya, Moses kurina, 2 “Israel biyisi asi dam 12 kamosi yai bibadana kesakesasike ke bineisi, ba ki poraisi Canaan tanona Yauku Israel biyisi a berebereisi wai sina nanagi.”
3 Kata Bada i kaotunei wai Moses nanakasike i wosei. Israel asi dam babadisi asi 12 Paran kupura momnai i poraisi si kasibau.
17 Maranai Moses i poraisi Canaan sita kita nanagi wai i wona, “Negev kamonai wata ko nae ku sepina ku koya yogiyogisi. 18 Kupurina ko kita nanagi, pipiya biyamo namai te mamana, ba kosi maragasisi kona mesumesusi. 19 Tanona ko nanaga kabitamni kata gairena kona goyona. Kwanatusi ko nanaga kata kamagisi kona si gara bibira. 20 Tanona marimariyina kona gomagomarina. Namai keyama kona kega. Ko wosei rubai kata tano uwana mutusi kona yauna kona veramaga.” (Kona maranai grape menai si dagui.)
21 Damanina ba si nae ba tano si nanagi, Zin kupura momnai ba si nae ku Rehob, Lebo-Hamat kupurina parinai.
Kaunanaga Biyisi si Veramaga
25 Pipiya kupura si nanagi wai kao 40 murinai si veramaga. 26 Si veramaga Moses, ba Aaron ba Israel biyisi ereonowasi kurisi Kadesh yai, Paran kupura momna kamonai. Namai ereonowasi kurisi si mamatara ba yebo kupurina uwana si beyisi. 27 Moses kurina si wona, “Kupurina ka nanagi ba ka panani kata kona marimariyina ba tano gairena, ba nina uwana mutusi. 28 Saba pipiyisi nai te mamana wai si maragata saki, ba asi meyaga kaikaposi ba asi gari padapadasi. Yebo Anak ana dam namai ka kinanisi. Pipiya kaidagimisi. 29 Amalek biyisi Negev kupurinai te mamana, ba Hitti, Jebusi ba Amori biyisi koyai te mamana, ba Canaan enaga parinai ba Jordan okowina parinai te mamana.”
30 Ba pipiya Moses si msi bibiri wai Caleb i wonisi sita ma guguba ba i wona, “Kota wai rubarubana nokosi pipiya tana getawanisi ba asi tano tana yauni.”
31 Saba pipiya yabata si gae wai si kaosaira, “Kega, nokosi pipiya si maragata saki, kega rubana kosi yabata tani abiya.” 32 Kata Israel kamosi yai si kaobimaragwasa, si wona, “Tano ka nanagi wai kega marimariyina ba pipiya nai te mamana wai ini kampariparisi. Pipiya ereonowasi ka kinanisi wai pipiya kaidagimisi. 33 Nephilim yebo namai ka kitai, kona Anak ana dam.* Genesis 6:4 Ba kurisi wai bage kota sapom rutainisi, ba kinanita kosi kurisi wai kesanina.”