EXODUS
Kasikasibau
Wonaberena
Niko wona Exodus wai basuna kona kasikasibau ba ebi beyita wose kaimasavisi Israel biyisi asi yawasa kainaonai i tupuwa. Egypt kamonai si kasikasibau taveyei ba memena si wosisi kosi patupatumisi. Niko buka si keauwari wai asi bata (4).
God mekabage Hebrew biyisi patupatumisi i yawasisi.
Hebrew biyisi si wagaga ku Sainai koyana.
God baidamanina maragasina Sainai koyanai i wosei ana pipiya kurisi ba kairuwana i berisi.
Israel biyisi bopepeta gawarina si wosei.
1
Israel Biyisi si Bobisipuvisi
1 Israel natunatuna, asi rakaraka yabata si nae ku Egypt wai nikosi, 2 Ruben, Simeon, Levi, Judah, 3 Isaka, Zebulun, Benjamin, 4 Dan, Naphtali, Gad ba Asha. 5 Jacob ana rakaraka kamonai wai pipiyisi ereonowasi asi 70; ba Joseph wai matapa Egypt yai i mamana.
6 Joseph ba tuwateiteina kona kimtina kamonai ereonowasi si rabobo, 7 saba Israel biyisi si tuwa wai si pesara saki, Egypt si bonuvi i nunu roboi.* Acts 7:17
Egypt Taupaumina Israel Biyisi Bita i Berisi
8 Damanina ba, taupauma wauna bibadana i yauni ba, Egypt kamonai Joseph awaika i wosei wai kega i kuiri.* Acts 7:18 9 Ba ana pipiya kurisi i wona, “Ko kinani, Israel biyisi si pesara saki, kega bage kota. 10 Ko botu tana nuwasuya kabitam ba, awaika tana wosei kata kega sina pesara ba sina getawanita. Kega awaika tana wosei wai, biabiya maranai, kata abiya sini baisisi yabata tani rauwa ba sina getawanita wai, kupura sini sumarei.”
11 Patuma babadisi si terisi kata saibira kaikaposi yai siti poroporovisi, ba ita bobunuisi. Israel biyisi si tamarisi kata, Pharaoh ana kam kasi bobitaura yovesi, meyaga kaikaposi, Pithom ba Ramese si bowa. 12 Ba bagunai wata si bitupa ketowana saburerisi, saba ba Israel biyisi yebo asi koroto nakata naki i rakarakata wai, Egypt biyisi si naganagarisi, 13 ba si wosisi si bagibagi saburere. 14 Asi yawasa si wosei i goyo saburere ba, asi saibira isu bita taveyana brick ba motar si wosewose, ba yebo masawa si wosewose kata, si bobisipuvisi kega bage rorowa rutainina.
22 Damanina ba Pharaoh ana dam i kaotunetuneyisi, “Sebasebare ereonowasi sina tupuwa wai ku Nile okowina koi garuisi, saba bibaine wai ko boterisi sina mana.”* Acts 7:19