1 Nikona murinai Paul Athens i sumarei ba i nae ku Corinth. 2 Namai Jew biyina kana waba Aquila, Pontus sebare kaowana Priscilla yabata karauwata mom Italy yai si botu, kairavina Caesar Claudius Jew biyisi ereonowasi i kaotuneisi Rome sita kasibau taveyei. 3 Paul Aquila ba Priscilla yabata si mana ba si saibira, kairavina kosi ba Paul abapayapayaya kwapirisi yai tent si popopo. 4 Sabath patepatena, Paul Jew biyisi asi dugu yovena kamonai sisiya padapadana i tereterei, kata Jew ba Greek biyisi siti nuwabirabira.

5 Silas ba Timothy Macedoniai si verakasibau maranai, Kosi tent bowaina si wosewosei, ba Paul kona wona i raumamarei. Jew biyisi kurisi i bisisiya kata Iesu wai kona Baibaiyawasina Kaobaisiyena. 6 Saba si kawapatei ba si kaobigoyoni, wai kana gara popokauna i kasitatabi ba i wona, “Tarami wai komi yebo gayamimi tepanai, kega koni kunumakiku. Karaku ba mara naoti yai wai Gentile biyisi kurisi ana rumamara.”

7 Ba Paul Jew biyisi asi dugu yovenai i sumarisi i nae Titius Justus kurina, kona wai God e bo pepetei ba ana yove wai Jew biyisi asi dugu yovena gwabinai. 8 Jew biyisi asi dugu yove badana Crispus ana rakaraka, ba pipiya ereonowasi ana yove yai Bada si geruwei. Ba pipiya pesarisi Corinth kamonai yebo Paul si nonori, wai si geruwana, ba si babataito.

9 Pom kesana aba kinakinanai Bada Paul kurina i sisiya ba i wonei, “Kega ke nagara! Ki sisiya! Kega kuni kawa potapota! 10 Kairavina yauku wai kom yabata, ba kega kotoi kesana ina kokonim kona ina kasibigoyonim, basuna pipiya pesarisi niko meyagai wai Yauku kariku ai.” 11 Damanina ba Paul namai i mana bodu kesana ba sepina, Wara Gairena pipiya i bibeyebeyisi.

12 Saba maranai Gallio, Achaia kupurinai* Achaia kana waba kesana wai Greece. i governor, wai Jew biyisi mutusi si bomsiri yabata ba Paul si yauni bibuibuiyina kairavina. 13 Paul si kunumakei si wona, “Niko sebare pipiya e binuwa tainisi God te bopepetei wai ata kairuwana e bikasikotobi.”

14 Paul i dagui iti sisiya saba Gallio, Jew biyisi kurisi i wona, “Abisiri yai Rome kairuwana ini kasikotobi wai ana nonorimi ba ami kairuwana ini kasikotobi wai ikesimi ko tere bitotori. 15 Saba komi kona, wona ba waba ba ami kairuwana kairavina ko bikawapata, wai komi wata ko bobitotori. Yauku kega nikosi ani buibuiyana.” 16 Ba bibuibuiya yovena kamonai i kwabinisi. 17 Damanina ba ereonowasi si taibira ba Jew biyisi asi dugu yove badana wauna Sosthenes, bibuibuiya yovena kamonai si botawani ba si gudai. Saba awaika si wosewosei wai Gallio i ma paraparaga.

18 Paul Corinth yai bigeruwana biyisi yabata kao pesarisi si mana, ba i sumarisi Priscilla ba Aquila yabata ku waka si geru ba si nae ku Syria. Muri yai sita geru wai Cenchreai, ana kaobiyoyobana nununai wai uyavina si garibi. 19 Si verakasibau ku Ephesus wai, Paul namai, Priscilla ba Aquila i sumarisi. Ba ikesina, i nae Jew biyisi asi ku dugu yovena ba Jew biyisi yabata si ogatara. 20 Kona maranai si babai yabata mara yogina sita mana wai, i totoyana. 21 Saba i bisumarisi wai i kaobiyoyobanisi, “God ana wainai wai ana veramaga, ba Ephesus yai wakai i geru.” 22 Maranai i verakasibau ku Caesarea wai i gae bigeruwana biyisi Jerusalem yai i kakaivisi ba i nae ku Antioch. 23 Paul Antioch yai i mana i kakaba wai Galatia kupurina, ba Phrygia kupurina kamosi yai wata i veramaga ba bigeruwana biyisi i kaobimaragasisi.

24 Kona maranai Jew biyina kana waba Apollos, Alexandria sebare, i botu ku Ephesus. Kona wai sebare kuikuirina, Wara Gairenai i kuira kabitamni, ba ana sisiya kaimasavisi wata. 25 Bada ana keta i kaobibeyei wai pipiya mutusi kurisi, ere tepatorana Iesu kairavina i beyebeyena ba i sisiyana kabikabitamni, saba John ana babataito wata i kuiri. 26 Maranai Priscilla ba Aquila si nonori Jew biyisi asi dugu yovena, kamonai ere tepatorana i raumamara wai, si taina sirei asi ku yove ba God ana keta basuna damana si beyena kabitamni.

27 Apollos ana waina ita nae ku Achaia, wai warewaresina si kaobimaragasi ba si kiruma, nonorayauna kurisi kata sita verabeyei. I verakasibau wai namai, iyabosi wata God ana baibaitai si geruwana wai i baita sakiyisi. 28 Debai Jew biyisi yabata si ogatara wai, ere maragasina i getawanisi, ba Wara Gairena i beyisi kata Iesu kona Baibaiyawasina Kaobaisiyena.