1 Apostle ba bigeruwana biyisi mutusi, Judea kamonai si nonori kata Gentile biyisi God wonana matapa si bosekwai. 2 Ba Peter i veramaga ku Jerusalem wai, Jew bigeruwana biyisi si kaobisipuwei, 3 si wona, “Kata kom Gentile biyisi asi ku yove ku riu, ba yabata ko kam!”

4 Ba Peter awaika ereonowana i tupuwa wai i mamatarisi, 5 i wona, “Kao kesana Joppa meyagina kamonai, a rupari ba aba kinakinana a kitai. Ba sawara kesana a kinani sowo kaikapona rutainina naoku ai sapamai i gakira. 6 Ba sowona ku kamonai i kinana wai aba payapayaya kaekaesi asi bata, manamisi ba bikokonisi, ba tanoai tebo tete ba manu a kinanisi. 7 Ba gamo a nonori i wona, ‘Peter, ke bomsiri ki kasibunuwana ba kuna kam.’

8 Saba a kaobeyei, ‘Kega Bada, yauku kega meyana awaika Jew biyikai ama dudura e wonawona pudapudana wai ana kani.’

9 Saba gamo sapamai i wona mena, ‘Kega God sawara i wosei gairena wai kuna wona goyona.’ 10 Nikona i tupuwa mara tonu ba murinai wai si taina geyei ku sapama.

11 Kona sebasebare asi tonu Caesareai si poraisi wai si verakasibau memena a mamana wai ku yovena. 12 Ba Kanuma Kaobaisiyena i woniku kata yabata kata nae, ba kega nuwanuwaku ita kairagaraga kata kosi wai Gentile biyisi. Kata bigeruwana biyisi asi 6 yabata ka nae sebare kotoi ama wara i porai wai ana ku yove. 13 Ba i wonikai mekabage kona aneya i rerematara kurina, ba i wona, ‘Wasaga ki poraisi ku Joppa, Simon Peter sina nuweni. 14 Ba ina wonim kata mekabage kom ba am rakaraka koi ereonowami kona yawasa.’

15 Ba a dagui ati sisiya saba, Kanuma Kaobaisiyena mekabage dagudagunai i gakira kurikai wai nanakasike i gakira kurisi. 16 Damanina ba Bada i wona wai a nosi, ‘John okowai i babataito, ba komi kona Kanuma Kaobaisiyenai kona babataito.’* Acts 1:5 17 Abisiri yai God Gentile biyisi, puyo i berisi wai yebo kota kesanina i berita. Maranai Iesu Keriso wabanai tai geruwana. Ba yauku kotoi wai, God ana keta ata vera papari.”

18 Maranai mutusi Peter ana sisiya si nonori wai bigesaira si boterei, ba si dagui God si bokabakabari. Si wona, “Ta kinakinani kata God Gentile biyisi yebo i nuwanuwanisi wai si tombaubauna meyisi ba yawasa mama damanina si yauni.”

19 Ba Stephen si kaobigoyoni ba si kasibunui murinai, bigeruwana biyisi si tupaketowanisi wai si vera si kasi buburanisi. Mutusi si nae ku Phoenicia kupurina, Cyprus neyarinai, ba Antioch meyaga kaikaponai Syria kupurinai, God wonana Jew biyisi wata kurisi si rumamarei.* Acts 8:1-4 20 Saba bigeruwana biyisi mutusi Cyprus yai si nae, ku Antioch ba Cyrene yai si dagui, Bada Iesu Warana Gairena Gentile biyisi kurisi si raumamara. 21 Bada ana maragata wai kosi yabata, wai Gentile biyisi koroto kaikapona si nuwabirabira, ba si geruwana.

22 Ba bigeruwana biyisi Jerusalem kamonai si nonori wai Barnabas si porai ku Antioch. 23 Maranai i verakasibau ba God ana bigairena matakirina i kita wai nuwagaire i bonuwei ba bigeruwana biyisi i kaobimaragasisi, kata nuwanuwasi tupanai Bada siti tumaganei. 24 Barnabas wai sebare gairena, Kanuma Kaobaisiyena i bonuwei ba ana bitumagana i rakata saki wai, pipiya pesarisi i botuvisi Bada kurina.

25 Damanina ba Barnabas Saul i nuveni i nae ku Tarsus. 26 Ba i panani wai i urabai i veramaga ku Antioch. Asi ruwamo namai bodu kesana bigeruwana biyisi yabata si mana ba koroto kaikapona si beyebeyisi. Kona maranai Antioch kamonai bigeruwana biyisi si yorisi Keresiyana.

27 Kosi marasiyai peroperoveta mutusi Jerusalem yai si wagawaga ku Antioch. 28 Kesana kamosi yai kana waba Agabus, dugu kesana kamonai i bomsiri ba Kanuma Kaobaisiyena ana maragatai i wonisi kata mara murinai kapoi ina tupuwa kupura ereonowana Rome kamonai.* Acts 21:10 (Nikona wai Claudius ana bibadanai maranai.) 29 Ba bigeruwana biyisi Antioch kamonai asi maragata nununai si nuwakesana ba warewaresisi Judea biyisi mane si gaeni ba si berisi. 30 Nikona si wosei wai asi puyo Barnabas ba Saul si yauni wai si nae ku Jerusalem ba ogababada si berisi.