1 Ba yebo sebare kesana kana waba Ananias, kaowana Sapphira yabata asi tano si gimonei. 2 Ba Ananias manena mutuna iuna tawani ba kaowana wai i kuiri ba mutuna wata i yauna i nae apostle i berisi.

3 Damania ba Peter Ananias kurina i wona, “Ananias, awaika kairavina Satan i badim wai Kanuma Kaobaisiyena kurina ku kwaruma ba mane mutuna ku botawani? 4 Tano kona kom karimi yai, ba kui gimonei murinai yebo manena wai karimi yai ba mekabage ku nuwasuya wai nikasike ku kwaruma? Nikona wai kega pipiya kurisi ku kwaruma, saba God kurina.” 5 Maranai Ananias niko sisiya i nonori wai, i gakira i peku ba i rabobo; ba ereonowasi awaika i tupuwa si nonori wai nagara i bobunuisi. 6 Ba yaraka mutusi si riu tupuvina si sumai, ba si kabari si kasibau si dogui.

7 Ora tonu murinai wasikena awaika i tupuwa wai kega i kuiri ba i botu i riu. 8 Ba Peter wasikena i toirubai, “Ke woniku, kaowam yabata tano koi gimonei, ba manena ko panani wai ereonowana nina kona?”

Ba wasikena i kaobeyei i wona, “Eee, maisana ereonowana ka berim.”

9 Damanina ba Peter wasikena i wonei, “Mekabage kaowam yabata ko nuwasuya wai, Bada Kanumina ku ruruba ko terei? Ba iyabosi kaowam si dogui wai, sebasebaresi karaku matam ketai, kom yebo sina kabarim sina kasibau.” 10 Ba wasikena mara kesana i peku Peter kaenai ba i rabobo. Ba yaraka si riu wai raoboraobona si kinani wai, si kabari si kasibau kaowana gwabinai si dogui. 11 Bigeruwana biyisi ereonowasi Jerusalem kamonai, ba pipiya mutusi nikona si nonori wai nagara i bobunuisi.

12 Ba apostle matakira ba kituruba pesarisi si wose pipiya kamosi yai, ba bigeruwana biyisi ereonowasi mamanina sibi kesanisi Solomon ana tupatainai wai namai kesanisi. 13 Bagunai wata si kao bigegaenisi saba kega kesana kotoi i botubotu ku kamosi. 14 Saba yebo pipiya pesarisi sebasebare ba baibaine Bada si geruwei wai asi koroto i rakata ba i pesara. 15 Ba apostle asi saibira damona wai, pipiya gubagubagisi si kabarisi, si kasibau ku keta basusi, ba gawara si kepana ba si terisi kata, abisiri yai Peter ita nenae wai, kemeyauna wata pipiya mutusi ita sowoisi wai, sita yawasa. 16 Kata pipiya pesarisi yebo meyaga mutusiyai Jerusalem parinai, gubagubagisi ba yebo iyabosi kanuma goyogoyosi, kamosi yai si mamana wai, ereonowasi si urabaisi si botu wai si yawasa.

17 Damanina ba priest kaikapona ba turaturana, kosi iyabosi wai Sadducee biyisi nuwarauwa i bonuvisi. 18 Ba apostle si patumisi ba ku patuma yovena si terisi. 19 Saba kona pominai Bada ana aneya patuma yovena kana matam keta i botaveyei ba i urabaisi si kasibau. 20 Ba i wona, “Ko nae God ana yove garana kamonai ba pipiya ereonowasi niko yawasa wauna, warana tupana ko wonisi.” 21 Damanina ba aneya i wonisi wai nanakasike si wosei. Mara tomtom ai si riu God ana ku yove garana kamona ba pipiya bibeyebeyisi si dagui.

Ba maranai priest kaikapona kana bibaita yabata si verakasibau wai, Sanhedrin biyisi ereonowasi si yorisi si botu ba dugu kaikapona si yauni, ba wara si porai ku patuma yovena kata apostle sita urabisi sita botu. 22 Saba God ana yove aba potapotasi si verakasibau ku patuma yove wai kega namai si pananisi wai si veramaga ba si mamatara, 23 si wona, “Yakai patuma yovena wai gudu kikisina kapanani, saba aba potapota pipiyisi wai matam ketai si bimsiri. Saba maranai matam keta kabo tavetaveyana wai, kega kesana kotoi kamonai ka panani.” 24 Nikosi sisiya si nonori wai God ana yove aba potapotaisi asi bada kaikapona, ba priest kaikaiwabosi wai nuwasuya si kakabi, kata awaika i tupuwa.

25 Damanina ba pipiya kesana i botu ba i wona, “Koi tainabaenega, nokosi sebasebare ko patumisi wai karaku God ana yove garana kamonai pipiya te bibeyebeyisi.” 26 Ba God ana yove aba potapotasi asi bada kaikapona yabata si nae wai apostle, si urabaisi si botu. Kega si rubi yagiyaginisi, kairavina pipiya si nagarisi kata akimai si ta kayo ravisi.

27 Ba apostle si botuvisi wai Sanhedrin kurisi si terisi, kata God ana yove kana priest kaikapona iti kasekasemanisi. 28 Ba i wonisi, “Komi sisiya padapadana ka berimi, kata kega Iesu kana wabai koti beyebeyena, saba ko wose tupetupena kata ami bibeyebeyena Jerusalem i bonuvi, ba ko wosei wai niko sebare ana rabobo kunumakina kana kabari.”

29 Saba Peter ba apostle mutusi si kaobeyisi si wona, “Yakai God kana bosisirei ba kega pipiya! 30 Ba tutunuta asi God, Iesu rabobo ai ibo bimsiriyei, ba niko Iesu korosi yai ko tuparatui. 31 Ba God, kona i bokabari ku yaro kasauna mena i terei, kata iti Bada, ba iti Taupauma wai Israel biyisi iti naovisi sita rupena ba asi piragagoyosi ita notataveyisi. 32 Ba yakai yabata mataki yai nikosi sawara ka kinana, ba yebo Kanuma Kaobaisiyena yabata kata pipiya iti beyisi kata nikona wai bisuwona. Ba God kona puyona wai iyabosi wata te bosisirei wai e bereberisi.”

33 Maranai nikona si nonori wai, si yagisi saki apostle kurisi, ba asi waina siti kasibunuwanisi. 34 Ba saba Pharisee kesana kana waba Gamaliel, kona wai kairuwana bibeyebeyena biyina, ba pipiya ereonowasi si bokuwayei, kona babadisi kamosi yai i bomsiri, ba i wonisi kata apostle sita uraba kasibauvisi mara yoginaikei. 35 Ba babada kurisi i wona, “Israel sebasebare, ko nuwasuya kabitam ba muri yai awaika kona wosei nikosi sebasebare kurisi. 36 Kata rorowa naki Theudas i kasibau i wonawona kata kona wai pipiya kaikapona kesana, ba pipiya asi 400 si kibi. Ba saba si kasibunui wai ana pipiya ereonowana si vera goyowana wai awaika ereonowana i momosa. 37 Kona murinai Judas Galilee biyina census maranai i kasibau wai yebo pipiya pesarisi si kibi. Ba kona yabata si kasibunui wai ana pipiya si kibikibi wai si kasi buburanisi. 38 Kona kairavina nikosi pipiya ko boterisi sina nae. Abisiri yai awaika te nuwanuwasuyei ba te wosewosei wai pipiya asi maragatai wai karaku wata ina momosa. 39 Ba abisiri yai nikona God ana maragatai wai kega rubana kesana kotoi ini gudui. Ba kona kinani wai God kobi abiyei.”

40 Gamaliel ana sisiya si damaninei wai, apostle si yorisi si riu ba si kwapuisi. Ba si kaotunetuneyisi, si wona, “Ko nae ba kega Iesu kana wabai kona rumamara mena.” Ba si boterisi si nae.

41 Damanina ba apostle nuwagaire yai Sanhedrin* Jew biyisi asi government si sumarisi si nae, ba si kuiri kata kosi siniyara si yauni wai, Iesu kana waba kairavina. 42 Saba nikona kega si boterei, ba kao patepatena si nenae God ana yove garana kamonai, ba yove nunusi yai wara gairena sibi beyebeyena ba si raumamarei, kata Iesu wai kona Baibaiyawasina Kaobaisiyena.