2
Agundok Iruhin Wata Narap Um Douk Sagomatin Yopinyi Mour Abom
1 Iruhin ananin Nuganin douk nyeigur nyato iruhw abom neshagrakuk eshesh enselahos. Namudok aria enyudok apak memneken iri baraen, apak ta musuwen dodog mugipeshen. Mare mukri mutanam mukutinyukuk uwe, uwok. 2 Seiwok Iruhin nakripi enselahos shanaki shakrip Moses enyi lo douk dodogowinyi abom. Namudok aria abudok nyutob arpesh shaken agabus enyudok baraen iri, eshesh douk ta sharao debeiri eriger wosik um esheshih yoweihi aih. 3 Namudok aria ta douk apak mukri mukenyuk agabus enyudok baraen um enyudok nyarik iri yopinyi mour abom douk Iruhin neneken um nurap mutanamori mupe wosik um, apak douk yah wakap um muruwok um Iruhin um. Enyudok baraen um Iruhin nakri watak nurap mutanamori um, enyen sagomatin douk Debeini Jisas narik nakripeshen. Aria eshudok douk shemneken iri, eshesh douk shakripap aria madukemesh um enyen adurin atin abom. 4 Iruhin shopunek nenek enyudok baraen nyatogur adurin namudok. Anan nohur arpesh shenek sabainyi enenyenen anan atun neneken iri mour nyani eneh aih douk shatrih shakitak yowiyokuk um eheh hatogur aria apak matrih. Matrih aria makri Jisas ananin baraen douk adurin atin abom. Anan douk shopunek nakri aria Ananin Mishin nyagipesh ananim atum urkum aria nyekesh sisigin yopinyi dodog iri saki.
Jisas Nenekumap Yah Um Munak Um Iruhw Heven
5 Douk yakri ipak urkwip gamo purum enyudok baraen. Enyudok, Iruhin douk madae nukri um enselahos ta shupe debesh um eneshenesh douk shupe agudok namugari nahobig douk ta nunekag iri uwe, uwok. Agudok namugari nahobig douk mape makriyag iri, uwok. 6 Aria enen baraen nyetem Iruhin ananik Buk iri douk nyakri namudok. Nyakri,
“O Iruhin, nyak nyakri apak arpesh douk maresh arpesh,
um nyak urkum morumap abom um?
Apak douk arpesh meyoh.
Aria namudok mumam, um nyak nyataurumap um?
7 Banab nyutob meyoh nyak nyenekap mape shakamum enselahos atin.
Aria nyak watak nyakop yopinyi big
aria nyatukap mato nyeiguhw shato iruhw.
8 Aria douk nyenekap mape debeipari um ihishmorim eshudok eneshenesh.
Ihishmorim eshudok eneshenesh douk nyenekesh shape shakamum apak.”
Enyudok baraen douk nyakri Iruhin nenek apak arpesh mape debeipari um ihishmori eneshenesh eshudok. Madae nyukri enen atin anan neneken iri enyudok nyupeik meyoh uwe, uwok. Nyakri ihishmorim eshudok eneshenesh. Enyudok douk wosik, aria douk abudok nyutob douk madae mutik apak arpesh mupe debeipari um ihishmori eshudok uwe, watak. 9 Aria apak douk matik atun arman meyoh. Anudok arman douk Jisas. Banab nyutob meyoh Iruhin neneken nape shakamum enselahos atin. Iruhin nenekan nape namudok aria shan nagok um nutaurumap. Douk shan nagok aria nemnek debeiri eriger. Iruhin nataurum apak arpesh meyoh aria neshopok Jisas nanaki nagok um apak ihishmorim arpesh. Aria douk, Iruhin natuk ananin nyeigur nyato iruhw, neneken dodogowin atin abom aria nyatrugun abom.
10 Yakri gamo ikripep um enyudok. Iruhin douk nenek ihishmori eshudok eneshenesh aria nape natrish. Aria douk nape narao ihishmorim ananish batowish shatanamori um shuto iruhw heven shukih shuni anan sharao debeishi nyeiguhw. Douk namudok aria neshopoki Jisas nanaki shan nemnek debeiri eriger. Douk shan nemnek debeiri eriger namudok aria natogur debeini narik nenekumesh yah hato iruhw heven. Iruhin nenek enyudok aria douk wosik um ananih yopihi aih abom. 11 Jisas douk nakwrupuk apakish yoweishi inahos aria nenekap matogur yopupari abom mape Iruhin ananipari atup. Aria anan nani apak douk matogur atup awirop abom meyoh. Namudok aria Jisas douk madae nunek abraen um nuhwarap ananish owashish um uwe, uwok. 12 Anan douk neyagwreh enyudok baraen nyetem Iruhin ananik Buk iri. Nakrip ananin Yain Iruhin namudok, nakri,
“Eik douk ta ikrip eikish owashish um nyak.
Abudok nyutob munak munatorum atugun munek lotumen obi nyutob,
eik ta ituk nyakin nyeigur nyuto iruhw.”
13 Aria shopunek nakri namudok, nakri,
“Eik ta ipeum inek bilip ipeum Iruhin atun um enenyenen.”
Aria shopunek nakri,
“Eik douk enyudok.
Batowish Iruhin nekeyesh iri douk shopunek shani eik mape.”
Jisas Natogur Adurin Abom Um Nutaurum Apak
14 Eshudok arpesh douk Jisas nahwaresh ananish batowish iri, eshesh douk agundok atapishi arpesh meyoh abom. Jisas shopunek douk natogur arpen. Douk nenekesh namudok um shan nagok aria nanunu agundok douk Satan nape dodogowin atun aria nenek arpesh shagok um. 15 Jisas shopunek nenekesh namudok um nukweshih arpesh douk shanogugur um shugok aria esheshih nyumneh shapeum douk ehudok aih howeshikesh dodog abom iri.
16 Aria douk madukemesh namudok. Jisas douk madae nataurum eshesh enselahos uwe, uwok. Anan douk nataurum Abraham ananish barheshish.* Baugenyum enyudok baraen um Abraham ananish barheshish douk biyen. Enen nyakri eshudok Abraham ananish barheshish douk eshesh Israel. Enen nyakrium apak munek bilip iri. 17 Jisas douk adur nanamori nutaurum apak arpesh. Douk namudok aria narao arpenyihw yegenyihw abom nadukem apak ananishi owashish um ihihmorim aih. Douk nenekesh namudok um nutogur apakini Debeini Pris abom aria nusuhw Iruhin ananin mour nuneken wosik abom. Anan douk nenek gihaumap aria nataurumap namudok um Iruhin nukweshihuk apakish yoweishi inahos. 18 Aria douk, meishi arpesh douk Satan nukwiraehesh um shunek yoweishi inahos iri, apakini Debeini Pris douk ta nutaurumesh. Um maresh? Abudok nyutob Satan nukwiraeh anan obi nyutob, anan kanak douk narao debeiri eriger, aria neyotu dodog.
*2:16: Baugenyum enyudok baraen um Abraham ananish barheshish douk biyen. Enen nyakri eshudok Abraham ananish barheshish douk eshesh Israel. Enen nyakrium apak munek bilip iri.