1 Morotoino Jezu toytose ropa tosaka, Nazare pona, typoetory tõ maro. 2 Mame juteu tõ atamorepatoh taka toytose ynororo oserematohae, ahno amorepatohme tyya. Mame aomiry etananõ ynara tykase toto ipoko,

—Otokoino mose tutuarõtase nae? Onoky poe tuaro nae? Onoky poe roropa kurãkõkara kurãkãko roropa nae? tykase toto.

3 —Yrome Jezu waro sytatose. Wewe poko erohkety mosero, Maria mũkuru. Zakorõ tõ moxiamo, Tiaku, Joze, Juta, Ximão, enara. Aoryxiry tõ kymaro xine roropa mana, tykase toto ipoko.

Morara exiryke aomiry etary se pyra toh kynexine. 4 Mame ynara tykase Jezu eya xine,

—Ritonõpo poe urutõkõ se imehnõ mã repe. Yrome esarypõkõ ise pyra mã toto. Jekyry to roropa ise pyra. Itapyĩtaõkõ roropa ise pyra, tykase Jezu eya xine.

5 Naeroro inukurãkatyã kynexine moroto tuhke pyra. Toitoine rokẽ kurãkõkara tapose eya toto ekurãkatohme ropa.

6 —To! Jenetupuhpyrahme sã tarõkõ nase, tykase ynororo tyya rokene.

Morarame pata pisararãkõ pona toytose ynororo imehnõ amorepase. 7 Mame typoetory tõ tykohmase tyya 12me, toto enyohtohme. Asasakoro rokẽ tonyohse toto eya. Ynara tykase ynororo eya xine,

—Joroko tõ itũtanohpotatoko ropa ahno ae Ritonõpo omi poe. 8 Otyro anaropyra ke ytotoko. Tymyxike rokẽ ytotoko. Wyi anaropyra ke ytotoko, saku tineru eny tytineruke pyra, enara ke ytotoko, tynaroke pyra. 9 Asapatũkõ rokẽ amurutoko, toiro rokẽ kamisa amurutoko.

10 —Mame pata pona tooehse awahtao xine, “Jepe, ytapyĩ taka onyhtokose. Ymaro matose otuhnõko,” karyhtao rokẽ eya xine imaro xine mytotatose. Moroto rokẽ mehtatose imepỹ pona oytorykõ ponãmero. 11 Mame imehnõ typataka xine oytorykõ se pyra toto ahtao, õmirykõ etary se pyra roropa toto ahtao mepuhsasakatatose oytorykõ ropahtao inenerykõme turumekarykõ oya xine enetupuhtohme eya xine, tykase Jezu typoetory tõ turuse.

12 Morarame toytose toto Ritonõpo omiry poko imehnõ amorepase.

—Oorypyrykõ irumekatoko emero porehme, tykase toto imehnõ amoreparyme tyya xine. 13 Joroko tõ tutũtanohpose roropa eya xine tuhke. Kurãkõkara tukurãkase roropa eya xine. Zupuhpyrykõ pona ikasery panõ tyrise eya xine toto kurãkatohme ropa.

14 Morarame Erote a morohne totase, Jezu tõsekãtose exiryke emero pata tõ punero. Ynara tykase toto toitoine Jezu poko,

—Mokyro ahno ẽpurihkahpono. Tõsemãse ropa mana toorihxĩpo. Morara exiryke imehnõ kurãkãko mana, tykase toto ipoko.

15 Mame imehnõ ynara tykase,

—Mokyro Eria, tykase toto. Imehnõ roropa ynara tykase,

—Mokyro Ritonõpo poe urutono, pake ahtao Ritonõpo poe urutonõpo panõ mokyro, tykase toh repe ipoko.

16 Mame morara kary etaryke tyya ynara tykase Erote,

—Arypyra. Otarãme João zuhkahpyry tõsemãse ropa mana, tykase ynororo, João tuhkapose tyya exiryke.

17 Ãpuruhpyry taka tõmapose kynexine pake eya Erotia omi poe, takorõ Firipe pyty omi poe. Takorõ pyty maro torẽnase ynororo tõseporyxĩpo. 18 Morara exiryke João tõturuse eya repe,

—Ãkorõ pyty maro torẽnase awahtao popyra mase, tykase ynororo eya repe.

19 Morara exiryke Erotia João zehno toehse yronymyryme. 20 Yrome João etapapory se pyra Erote kynexine zuno toexiryke, kure exiryke, otyro kara João exiryke. Morara exiryke ipynoto sã kynexine. João omiry etaryhtao tyya toepohnohse repe, yrome otara se sã rokẽ toehse ynororo.

21 Zomory João omiry etary se toehse ynororo. Morarame Erote aniwesario toehse. Tope tõ toahmase eya, tuisa tomo, pata esamo, Karireapõkomo, enara, toto otuhtohme tymaro. 22 Erotia ẽxiry roropa tooehse morotona wase. Mokyro eneryke tyya xine tãkye toehse morotõkomo, Erote, tyneahmatyã maro zua kure exiryke. Tuakehse ahtao ynara tykase Erote nohpo a,

—Oturupoko ya õpenery se awahtao. Otytyko se awahtao ekarõko ase oya. 23 Jesary apiakãko ase irãnakuroko oya ekarotohme. Mãpyra jomihpyry omipona pyra tokurehse jahtao, ah Ritonõpo juãnohno, tykase ynororo eya.

24 Mame morara kary etaxĩpo tyya toytose nohpo oturupose tyse a,

—Oty se ãkohxo ke ha aja Erote a, tykase ynororo tõturupose tyse a. Mame ynara tykase jeny eya,

—“Ahno ẽpurihkane zupuhpyry se rokẽ ase,” kaxiko eya, tykase jeny tõxiry a.

25 Mame toytose ropa Erote a ynororo.

—Ahno ẽpurihkane zupuhpyry se rokẽ ase paratu ao, tykase ynororo eya.

26 Moro etaryke tyya sekese pyrah tykase Erote, João zuhkapory se pyra toexiryke. Tãtasamase ynororo repe. Yrome tõmihpyry poko tutuarõtase ynororo. “Õpenery ekarõko ase oya. Jesary apiakãko ase irãnakuroko oya ekarotohme,” katopõpyry poko tutuarõtase ynororo. Katonõ tõ netaryme morara tykase toexiryke roropa, 27 João zuhkane tonyohse eya ãpuruhpyry taka. 28 Zupuhpyry tonehse toto a paratu ao ekarotohme nohpo a. Mokyro a tarose tyse a rahkene. 29 Morarame João poetohpyry tomo a ekary totase tyya xine ahtao ekepyry poko tooehse toto zonẽtohme tyya xine.

30 Morarame Jezu nenyohtyã tooehse ropa toto. Emero toerohtopõpyrykõ poko tõturuse ropa toto, imehnõ amorepatopõpyry poko roropa tyya xine. 31 Morarame ahno imoihme kynexine moroto. Oehnõko morotona toh kynexine. Oseosesahpokoxi ãko toh kynexine. Jezu otukuhtome toh kynexine typoetory tõ maro. Morara exiryke ynara tykase Jezu typoetory tomo a,

—Ehmaropa tokare pyra. Soserematatose, tykase Jezu typoetory tomo a.

32 Mame toytose toto ahno esaka pyra kanawae. 33 Yrome tonese ynororo tuhkãkomo a aytoryhtao. Morara exiryke tutuarõtase toto. Zuapõmase toh toytose tururume pata tõ poe, tuna ehpikuroko. 34 Morarame towomyryhtao kanawae ahno imoity tonese eya. Toenupunase ynororo toto poko okyno tõ sã toto exiryke, tosẽkãkara samo. Morara exiryke tamorepase toto eya itamurume. 35 Morarame kokonie pukuro toehse ahtao ipoetory tõ tooehse eya. Ynara tykase toto Jezu a,

—Ahno esary kara sero. Moxiã aropoko ropa pata tõ pona. Kohmãnõko nase. 36 Tynapyrykõ epekahtohme aropoko toto, tykase toh repe.

37 Yrome Jezu a tozuhse toto,

—Autuhmatoko toto, tykase ynororo eya xine.

—Oty ke? tykase toto. —Yna ytory se hma wyi epekahse? Tineru 200mã ke wyi topekahse ahtao ipune pyra mana, ahno tuhke exiryke, tykase toto tosẽkomo a.

38 —Otãto wyi nahe? Enetoko keh aporo, tykase ynororo eya xine.

Mame toytose toto enese.

—Omame wyi pisarara nae nase. Kana roropa asakoro nae nase, tykase toto eya.

39 Morarame typorohkapose toto atakenaka ona hpoty htaka. 40 Typorohse toto emero. 41 Mame wyi tapoise tyya ahtao kana maro, kakoxi tõsenuhmase ynororo,

—Kure mase Papa, tykase ynororo. Moromeĩpo wyi tytohtohkase eya typoetory a ekarotohme imoihmãkomo a ekarotohme. Kana roropa tapiakase eya emero toto zopatohme. 42 Tõtuhse toto tuesapare toh toehse rahkene, emero. 43 Mame tõsẽ akoĩpyry tanỹse ropa eya xine, 12me ruto pehme wyi akoĩpyry maro. 44 Mokaro autuhtyã orutua kõ rokẽ ahtao, tuhke exiry 5.000me kynexine toto.

45 Morarame typoetory tõ tyripose ropa kanawaka, osemazuhme toto atakuohtohme mõpozakoxi, Petesaita pona. Jezu moroto ro kynexine. Imoihmãkõ osekazumary tyya eraximãko kynexine. 46 Morarame tõsekazumakehse toto ahtao toytose Jezu ypy pona oturuse Tumy maro, Ritonõpo maro. 47 Mame tykohmãse ahtao, ipoetory tõ tuna rãnao toh kynexine. Jezu rokẽ toiroro kynexine ipũ po. 48 Mame typoetory tõ tonese eya, koehãko toto etuarimãko. Tyryrykane konõto toto ytohtome kynexine. Mame kuratiri etapitory zano, toytose ynororo typoetory tomo a. Tuna poro toytose ynororo. Kanawa kuroko toytory se kynexine repe.

49 Yrome ipoetory tomo a tunõmase tuna poro ayaytory eneryke tyya xine.

—Ahno akuaryhpyry mokyro, tykase toto, tykohkohtase. 50 Eya xine Jezu tonese. Tõserehse toto emero. Yrome eya xine ynara tykase Jezu,

—Juno pyra ehtoko. Ywy ase. Enaromyra ehtoko, tykase eya xine ynororo.

51 Mame kanawaka tõtyrise ropa ynororo. Mame tyryrykane tymynyhpãkapose. Moro eneryke tyya xine tõsenuruhkase toto ipoetory tõ itamurume onenetupuhpyra ro toexirykõke. 52 Wyi emãkapotopõpyry poko eya tuenikehse toto, onenetupuhpyra ro toexirykõke.

53 Morarame tãtakuohse toh rahkene Kenezare pona Jezu maro. Kanawa tymyhse eya xine. 54 Mame aowomyryhtao Jezu tonetupuhse imehnomo a. 55 Tururume toytose toto kurãkõkara enehse. Toto etueh tapo tonehse toto a Jezu a toto kurãkatohme ropa. Emero rokẽ kurãkõkara tukurãkase ropa eya. 56 Mame pata tõ poro toytose Jezu, pata pisarara poro, pata konõto tõ poro. Emero rokẽ pata tõ poro ayaytoryhtao kurãkõkara tonehse imehnomo a puroro pona,

—Ajohpãme sã oupõ ehpiry ytemuhmaxi, tykase toto Jezu a. Mame zupõ tytemuhmase ahtao tyya xine toekurãkase ropa toto emero.