2 “Õtururu mã tuaro pyra oehtoh enetupuhpõko;

onoky mahno, tuaro jehtoh onenetupuhpyra tyripõko mah?

3 Owõko ty xikihme orutuame awahtao.

Ekaropõko ase oya jezuhtohme oya.

4 “Otoko mexiahse sero nono tyrise ahtao ya?

Tuaro nymyry awahtao moro poko oturuko ya.

5 Onoky a sero nono zumo ehtoh tymenekase?

Onoky a morohne tukuhse, zuaro hma?

6 Oty po xikihmãkõ tyrise nã kehko sero nono apõme?

Onoky a topu konõto tyrise esaka epoehme sero nono ehtohme?

7 Moro ẽmepyry ae senohne emero tyrise ahtao xirikuato tõ toremiase toto oximõme.

Ynenyohtyã tykohtase toto tãkye toehtohkõke.

8 “Onoky a tuna konõto tapuruse myahxo ytopyra ehtohme tonuruse ahtao sero nono wakuru ae?

9 Ya moro tuna konõto tyõtose akurũ ke,

ya ro moro tuna tyõtose ikohmamyryke.

10 Ehpiry tõ tyrise ya,

apuru tõ ke tapuruse ya.

11 Ynara tykase ywy eya:

‘Oehnõko mase tarona rokene,

mya ytopyra mase.

Pohkane tõ kaetokohxo exiketõ mã etypohnõko kehko taro.’

12 “Jo, isene awahtao sero nono po ẽmepyry tonehpose oya saereh kapitotohme?

13 Xixi tõmehkapose oya nae sero nono po popyra exiketõ erehtohme toto ahpahpotohme aotonẽtohkõ tae?

14 Saereme ypy tõ ehtoh tonõ enepõko mana jakanahmã kõ roropa upo mirihmã samo aryhnao, imenuru sã roropa orino pokona.

15 Saereme ahtao zae pyra exiketomo a saeremehxo mana,

toto akorekehkãko mana popyra ehtoh poko toexirykõ se toto ahtao.

16 “Jo, ytopitopyra mexiase tuna konõto enatyry tõ enese?

Zue aka tuna konõto kuaka ytopitopyra roropa mexiase?

17 Omõtoh tonõ aorihtyã esaka tonepose oya imepyny a?

Moroto mã xinukutume konõto

ikohmamyry enahpỹme mana.

18 Sero nono zumo ehtoh waro hma?

Kuezuhko morohne waro awahtao.

19 “Otokoino saerehkatoh oehnõko nae?

Ozeino roropa ikohmamyry oehnõko nae?

20 Ohpetu pona morohne ytory enepory waro hma, imeĩpo aropotohme ropa toto esyryhmapitotopõpyry pona ropa?

21 Otarame morohne waro mase tamuhpõme oexiryke,

pake tonuruse oexiryke sero nono onyripyra ro ahtao.

22 “Mytoase ykyryry newe kurãkatoh enese, konopoimo topu xikirimã kurãkatoh roropa?

23 Morohne kurãkãko ase etuarimatoh ehtoh pona, etonatoh pona roropa.

24 Mytoase xixi tũtatoh pona, tyryrykane exipitotoh pona roropa xixi tũtatoh wino?

25 “Onoky a konopo esemary tyrise konopo itamurume oehtohme,

onoky a tyryrykane esemary tyripose roropa tyryrykane konõto ytotohme?

26 Onoky omi poe konopo oehnõko nae ona tonorẽ pona ahno esaka pyra?

27 Onoky omi poe nono tonorẽ ehxikãko nae onahpoty ahtatohme?

28 Tumyke konopo nae?

Otokoino tuna oehnõko nae otyro ehxikatohme?

29 Onoky kuenimã jeru ẽme nae, newe roropa?

30 Onoky mokyro tuna tũpore rineme topu samo, ikuhpo eworĩko jerume aehtohme?

31 “7me xirikuato tõ mykyry waro mah eary ke, puripurikaneme,

Oseruao Maria tõ myhpokary waro roropa hma?

32 Xirikuato ẽmepyryme maparukawa osenepory waro hma,

Uusa Zumohxo arory waro mahno, Uusa Zumõkara roropa?

33 Xixi tõkehko Rihpõ waro hma,

nuno roropa xirikuato tõ roropa Rihpõ waro mahno?

Morohne Rihpõ waro hma sero nono po?

34 “Õmiry etapory waro hma kakoxi akurũ tõ a, konopo itamurume enehpotohme zueme tuna ehtohme opona?

35 Nenenehkane enepory waro hma aropotohme,

ynara kaxĩpo oya:

‘Taro ynanase õmiry omipona ehtohme?’

36 Onoky a torõ tõ tuaro tyripose, ipi tomo a, poroporo roropa, zueme tuna kumary ehtoh ekarotohme?

Morararo onoky kuratiri orutua zurũko konopo oepyry poko?

37-38 Onoky akurũ tõ kukuru waro nae?

Onoky konopo enehpory waro roropa nae nono ehxikatohme tũpore toehse ahtao?

39 “Omoro hma kaikuxi tamuru tõ nahpãko mah tuesapare ipoenõ ehtohme,

40 tõtonẽse toto ahtao tosao xine, eutary ao tykarimory eraximaryhtao eya xine?

41 Onoky torõ tõ nahpãko nae ipoenõ xitaryhtao ynetaryme, toto ytoytoryhtao roropa tonahsẽ zupiry poko?