1 Kure exiry ypiryme awahtao, aja a tysuhsuru ke tohpase awahtao!

Morarame tõseporyse kuahtao osema tao, epohnõko sexiry, mame imehnõ oty kara exiry.

2 Kuarory aja tapyĩ taka, moroto ahtao kuamorepary.

Eukuru kurã ekarory oya, uwa eukuru jehnahpyry, romã risẽ roropa õkurume.

3 Emary opozery wino jupuhpyry zopino exĩko mana,

japoĩko mana tomary ke ãpotunuru wino.

4 Nohpo tomo, Jerusarẽ põkomo, õmirykõ etapoko yna a onerekohmara oehtohkõme tohrame yna ahtao oximaro.

5 Onoky mokyro oehnõko ona poe, ipyno exikety maro,

oximaro ytoytõko mã toto?

Moroto masã wewe zopino kuẽpakase, oenurutopõpyry po.

Moroto asa a tonurumase mexiase.

6 Jesety rokẽ imeroko okurohtao, imehnõ pyno pyra exiko.

Ywy ro rokẽ apoiko ãpory tõ ke, imehnõ pyra.

Opyno jehtoh jamihme mana orihtoh samo.

Amaro se jehtoh joorikyry zuno jehtoh motye mana.

Apoto zukary sã mana,

mame jahkãko mana apoto konõto samo.

7 Opyno jehtoh onezehkasaromepyra tuna mana.

Tuna zueme ahtao ro onerymaposaromepyra mana.

Ipyno ehtoh epekatyry se ahno ahtao tineru ke, uuru tõkehko ke, toiparo rokẽ exiry.

“Moky kahpyry,” ãko rokẽ mana ipoko.

8 Tooryxike ynanase tymanahke pitiko rokene.

Otara ãko ynanae nuasemã tooehse ahtao yna oryxiry ekaropose ipyno toehtohme?

Orutua poko exipitopyra mana.

Towomatoh se ro mana.

9 Apurume sã ynororo ahtao ewomãko ynanase tapyi kaetokohxo exikety ke, parata risẽ ke.

Omõtohme sã ynororo ahtao, wewe apupari ke apuru rĩko ynanase ewomatohme.

10 Apurume ase, ymanatyry tõ tapyi kaetokohxo exiketõ sã mana.

Ypyno exikety zuaro mana:

imaro jahtao tãkye ase, torẽtyke pyra ipunaka.

11 Saromão tutupike nexiase, uwa zoko tomo, Paau-Hamõ po.

Erohketõ ipoko tymenekase eya.

Toiro erohkety miume parata ke topehmase eya.

12 Saromão, osehko otinerũ miume parata apoise.

Erohketomo, osehtoko otinerũ 200me parata apoitoko oerohtamitukõme.

Yrome ywy tutupike roropa ase; uwa zoko tarykase ya, ywy ro rokẽ ypenetatoh rĩko ase ipoko!

13 Kuku ỹpynu, õmiry etary se mã jepe tomo.

Ywy roropa õmiry etary se ase ynarykahpyry po.

14 Osehko axiny ypyno exikety, tururume kapau samo, kapau mũkuru tõ samo pyhseky ãko ypy po, typoxine exiketõ po. Enara rokene.