135
Eremiatoh sero, Ritonõpo eahmary poko
1 Ritonõpo Kuesẽkõ eahmatoko!
“Kure mase,” kahtoko eya, ipoetory tomo,
2 amarokõ Itapyĩ tao exiketomo,
Kuesẽkõ maro Oturutoh tao!
3 Ritonõpo eahmatoko kure aexiryke;
oeremiatoko eahmaryme, pynotome aexiryke.
4 Jako tymenekase eya topeme aehtohme,
Izyraeu tõ tymenekase eya tykyryry kurãme toto ehtohme.
5 Ritonõpo imehxo mana, zuaro ase;
imehnõ ritõ tõ emero motye Kuesẽkõ mana.
6 Tyriry se toehtoh rĩko Kuesẽkõ mana:
kapu ao te, sero nono po te, tuna konõto tõ kuao te,
zue konõto tõ ao, enara.
7 Sero nono etyhpyry poe akurũ enehnõko mana,
nenenehkane rĩko mana konopo maro,
tyryrykane enyohnõko mana tykyryry tõ esary ae.
8 Ejitu tõ poenõ apitoryme aenurutyã totapase eya,
ahno tomo te, eky tomo, enara.
9 Tyjamitunuru tonepose Ejitu põkomo a,
osenuruhkatoh tonõ toto tuisarykõ wãnohtohme akorehmananõ maro.
10 Ahno tõ tuhke typoremãkase eya;
tuisa tõ jamihmãkõ totapase eya.
11 Seõ totapase eya, amoreu tõ tuisary,
Oke, Pasã tõ tuisary roropa,
Kanaã põkõ tuisary tõ roropa emero totapase eya.
12 Typoetory tomo a mokaro nonohpyry tokarose eya; Izyraeu tomo a esarykõme ehtohme.
13 Ritonõpo, sero nono põkõ emero awaro
exikehpyra exĩko mã toto;
omoro mase yna Esemy, emero zumakahpõkomo wenikehpyra exĩko mã toto opoko.
14 Izyraeu tõ ewomãko Kuesẽkõ mana;
typoetory tõ pyno exĩko mana.
15 Imehnõ neponãmarykõ parata risẽme mã kehko,
uuru risẽme roropa, ahno nyrityamo.
16 Tỹtare mã kehko, yrome oturupyra;
tonure roropa toh mã repe,
yrome osenuhmara mã kehko.
17 Typanare toh mã repe, yrome otato pyra mã kehko;
oseremara roropa mã kehko.
18 Tynyrityãkõ sã mã mokaro tyrinanomo,
tuamekaro xine rokene.
Mokaro roropa, tyneponãmarykõ enetupuhnanomo,
tuaro pyra mã toto.
19 Ritonõpo Kuesẽkõ eahmatoko, Izyraeu tomo;
“Kure mase, Ritonõpo,” kahtoko, imaro oturuketomo!
20 “Kure mase, Ritonõpo,” kahtoko, Rewita tomo;
Kuesẽkõ eahmatoko, emero aomipona exiketomo!
21 Ritonõpo eahmatoko Xião po,
Jerusarẽ po, Kuesẽkõ esary po.
“Kure mase, Ritonõpo,” kahtoko!