110
Ritonõpo nymenekahpyry Tuisame
Tawi nymerohpyry.
1 Ritonõpo Kuesẽkõ ynara tykase jesemy a:
“Oporohko japotunuru wino oepetõkara
poremãkatohto ya, anamotome toto ehtohme.”
2 Tuisame oehtoh orẽpyrahxo tyripõko
Ritonõpo mana Jerusarẽ poe.
“Oepetõkara Esẽme exiko,” ãko
Ritonõpo Kuesẽkõ mana.
3 Mokaro oepetõkara maro osetaparyhtao oya
opoetory tõ oehnõko mã toto osekarotohme oya.
Konopo oepyry sã ẽmepyryme mokaro
nuasemãkõ oehnõko mã toto oya ypy tõ kurã po.
4 Ritonõpo Kuesẽkomo a tõmiry totapose,
jũme onytyoromara ehtohme.
Ynara tykase: “Omoro mase oturuketyme ya jũme,
Meukizeteke oturuketyme ehtopõpyry samo.”
5 Tuisa, ãpotunuru wino Ritonõpo mana,
tuisa tõ poremãkãko mana zehno toehse ahtao.
6 Sero nonory põkõ apiakãko mana,
osetaparyhtao ona tõ pehkãko mana
aorihtyã ekepyry ke,
sero nono poro porehme tuisa tõ poremãkãko mana.
7 Osema tao tuna ẽnõko tuisa mana iporiry wino,
tyjamihtase owõnõko ropa mana, orẽpyra rahkene.