99
Ritonõpo, Tuisa Imehxo Exikety
1 Ritonõpo Kuesẽkõ tuisame mana:
ahno tõ tykytyky ãko mã toto.
Typorohse mã ynororo tapõ po tuisamehxo kerupĩ tõ epoe; sero nono tykytyky ãko mana.
2 Kuesẽkõ jamihmehxo mana Jerusarẽ po;
ahno tõ emero esẽme mana.
3 Eahmatoko emero porehme, imehxo aexiryke,
tuisamehxo aexiryke aomiry etatoko.
Kure rokẽ mana.
4 Tuisa orẽpyra Exikety, zae ehtoh sehxo mase;
Izyraeu tomo a zae ehtoh tonehpose oya,
ajohpe pyra ehtoh tyripose roropa oya,
jamihme pyra exiketõ ewomatohme eya xine.
5 Ritonõpo Kuesẽkõ seahmatone kuosekumurukõ po
syporohtone apõ konõto ẽpataka.
Ritonõpo Kuesẽkõ kure rokẽ mana.
6 Moeze tõ Arão maro oturuketõme toh kynexine
Ritonõpo poetoryme, Samueu roropa tõturuse eya;
Ritonõpo Kuesẽkõ tykohmase eya xine,
tozuhse roropa toto eya.
7 Akurũ xikihme exikety poe tõturuse ynororo
Izyraeu tomo a;
aomiry omipona toehse toh kynexine,
inyripohpyry roropa, inekarohpyry eya xine.
8 Ritonõpo yna Esemy, opoetory tõ tozuhse oya;
toto rypyry korokaneme mosenepoase eya xine,
iirypyry tuãnohse oya ahtao ro.
9 Ritonõpo Kuesẽkõ eahmatoko.
“Kure mase,” kahtoko eya esary po, ypy kurã po.
Ynara exiryke, Ritonõpo Kuesẽkõ kure rokẽ mana.