95
Eremiatoh sero Ritonõpo eahmatohme
1 Osehtoko, Ritonõpo Kuesẽkõ eahmase!
Seremiatone kuatãkyemarykõme Ritonõpo netaryme, kypynanohnekomo!
2 Ehmaropa ẽpataka, “Kure mase,” katohme eya,
tãkye rokẽ seremiatone eahmaryme.
3 Kuesẽkõ Ritonõpo Jamihmehxo Exiketyme exiryke, tuisa imehxo imehnõ ritõ kõ motye emero porehme.
4 Sero nono tytororo esẽme mana, eutary tõ poe
nono kurohtao ypy tõ kaehxo exiketõ pona.
5 Tuna konõto esẽme mana tyrise tyya exiryke,
sero nono roropa inyrihpyry tomary ke.
6 Ehmaropa, Ritonõpo seahmatatose
kuesekumurukõ po; kuesekumurukõ po
syporohtone ẽpataka Kyrihpõkõme aexiryke.
7 Kuesẽkõme mana; ipoetoryme sytatose,
eky tõme sã sytatose kaneru tomo onahpoty po,
inyrihpyry po, kypynanohnekõme mana.
Seroae etatoko ke Ritonõpo omiry kyya xine:
8 “Putuhtome exiketõ sã pyra ehtoko,
atamurukõ ehtopõpyry sã pyra Meripa po,
Masa po ona tonorẽ po.
9 Moroto atamurukõ jukuhne toto, tyehno xine jehtohme. Yjamitunuru tonese tyya xine ahtao ro jukuhne toto. Onymoipyra toh kynexine.
10 Morara exiryke 40me jeimamyry mokaro
zehno toehse exine. Ynara akene: ‘Azahkuru rokẽ mokaro osenetupuhnõko mana. Jomipona pyra ekurehnõko mã toto,’ akene.
11 Toto zehno exine, naeroro ynara akene:
‘Jesaka jũme omõpyra ekurehnõko matose
ynonory pona, oserematoh taka.’ ”