91
Ritonõpo Kuewomanekomo
1 Ritonõpo a ytokety osewomatohme, tehme
roropa ynororo ahtao Jamihmehxo exikety maro,
2 zae ynara ãko eya mana:
“Omoro mase ypynanohne, jewomane roropa.
Jesẽme mase, Ritonõpo, oenetupuhnõko ase.”
3 Opynanohnõko Ritonõpo mana, apoitoh taka
omõpyra oehtohme tonẽse moro ahtao ro;
oewomãko roropa mana tyrohsẽ tõ wino
akuruhtara oehtohme.
4 Taporihke exikety typoenõ ewomary sã
taporiry zopikoxi oewomãko mana.
Amonohkara mana, kokoro rokẽ amaro
exĩko mana oewomatohme osewomatoh samo.
5 Oserehpyra exĩko mase apoitoh poko koko,
oryhmatoh poko roropa saereme ahtao.
6 Enaromyra mase exĩko tyrohsẽ poko koko,
tykohmãse ahtao,
orihmatoh poko roropa saereme ahtao.
7 Miume ahno totapase ahtao opũto,
10 miumãkõ totapase ahtao õmye,
oryhmara exĩko mana.
8 Osenuhmãko mase,
popyra exiketõ wãnopyry enẽko mase.
9 Ritonõpo tyrise oya opynanohneme,
mokyro Imehxo Exikety oewomaneme;
10 morara exiryke popyra ehtoh oetapara
ekurehnõko mana, osetapaketõ oehpyra mã toto atapyĩ pũtokoxi.
11 Tynenyohtyã ripõko Ritonõpo mana
oewomatohme emero rokẽ pona oytoryhtao.
12 Tomary ke ãpoĩko mã toto epuhtãmara opupuru ehtohme topu tõ pona.
13 Opupuru ke reão tõ tũtũmãko mase, okoi tõ roropa, reão tõ osekatõ komo te, okoi tõ orihmatõ komo.
14 Ynara ãko Ritonõpo mana: “Ypyno exiketõ
pynanohnõko ase,
Ritonõpome jenetupuhnanõ tosẽkõme ewomãko ase.
15 Ykohmaryhtao eya xine ezuhnõko ase,
aetuarimarykohtao imaro xine exĩko ase.
Toto pynanohnõko ase, imehxo toto rĩko ase.
16 Isene toto ehtoh ke toto epehmãko ase;
toto Pynanohneme osenepõko ase.”