86
Oturutoh Ritonõpo a akorehmapotohme
Tawi oturutopõpyry.
1 Ritonõpo yna Esemy, jotururu etako,
kuezuhko roropa jamihme pyra jexiryke,
takorehmaneke pyra jexiryke roropa!
2 Kypynanohko orihpyra jehtohme õmipona jexiryke;
kypynanohko opoetoryme jexiryke,
oenetuputyryke roropa ya Jesẽme.
3 Omoro mase Ritonõpo, Jesemy.
Naeroro juãnohpyra exiko;
oya jotururu poko kohmãnõko ase.
4 Ritonõpo, tãkye kyriko ukurohtao,
oturukehpyra jexiryke oya!
5 Ritonõpo, kure mase, yna rypyry korokãko mase,
yna pyno mase, emero oturuketõ oya pyno mase.
6 Jotururu oya etako, Ritonõpo,
otato exiko kui karyhtao ya jakorehmatohme!
7 Popyra ehtoh toehse ahtao ya okohmãko ase,
jezukuruke oya.
8 Imepỹ asã exikety pyra mana, Ritonõpo;
imepỹ pyra mana onyrityã riry waro exikety.
9 Emero ahno onyrityã oehnõko,
tosekumuru po porohnõko mã toto oẽpataka;
imehxo oehtoh eahmãko mã toto
10 jamihme oexiryke,
emese kure roropa oexiryke kurãkõ riry poko.
Omoro rokẽ mase Ritonõpo.
11 Ritonõpo Jesemy, kuamorepako ise oehtoh ritohme,
mame õmiry omipona exĩko ase yronymyryme!
Kuamorepako zae õmiry omipona jehtohme
opyno jexiryke.
12 Ritonõpo Jesemy, oeahmãko ase yronymyryme,
imehxo oehtoh onekarokehpyra ase imehnomo a.
13 Ypyno mase yronymyryme!
Kypynanopyase jorihmapopyra imehnõ ehtohme.
14 Ritonõpo, epyrypaketõ oehnõko ya osetapase.
Yzehno exiketõ jetapary se mã toto,
õmiry etary se pyra exiketomo.
15 Yrome omoro mase Ritonõpo yna Esemy,
yna pyno Exikety;
penekehpyra mase, kure rokẽ mase.
Õmihpyry anamonohpyra mase.
16 Kueneko ropa, juãnohpyra exiko;
kyjamihtanohpoko, kypynanohko roropa
õmipona jexiryke, õmipona aja ehtopõpyry samo.
17 Ritonõpo Jesemy, kure oehtoh
enetupuhpotoh ekaroko ya!
Mame ypyno oehtoh eneryke yse pyra exiketomo a
ehxirõko mã toto,
jakorehmatoh oya eneryke tyya xine,
jemuhkehkatoh oya eneryke roropa tyya xine.