79
Tynonorykõ pynanohpotoh Ritonõpo a
Asape nymerohpyry.
1 Ritonõpo, ononory pona tomõse opoetory tõ kara.
Atapyĩ Kurã tyripose nuriame eya xine,
Jerusarẽ takuhmopose eya xine, tonahkase mana.
2 Opoetory tõ ekepyry tynomose eya xine
kurumu tõ zohme, onokyro tõ zohme roropa.
3 Opoetory tõ munuru tukuãse eya xine tuna samo;
Iporiry sã munu serere ãko Jerusarẽ esemary kuroko,
ahno pyra toehse mana aorihtyã ekepyry zonẽtohme.
4 Imehnõ nonory põkõ, ynakatonomory, yna poihtõko,
exianãko mã toto, yna eunohnõko mã toto.
5 Ritonõpo, otãto ahtao yna zehno
exikehnõko mahno?
Jũme yna zehno exikehpyra hma? Otarame yna poko
tohne oehtoh ezehpỹme sã mana, apoto samo?
6 Ritonõpo, mokaro zehno exiko opoetory tõ kara,
imehnõ nonory põkomo, oeahmara exiketomo,
õmiry omipona pyra exiketomo!
7 Yna, opoetory tõ etapãko mã toto,
ononory enahkapõko mã toto.
8 Yna onuãnohpyra exiko yna tamuru tõ
rypyhpyry emetakame, yna pyno exiko seromaroro taomipohtomase yna exiryke.
9 Yna akorehmako, Ritonõpo, yna Pynanohneme mase; yna ipynanohko, yna rypyry ikorokako yna Esẽme imehxo oexiryke.
10 Otyme kure imehnõ nonory põkõ ynara
ekaropory opoko: “Otoko hnae Oesẽkomo?”
Ritonõpo, ajohpame sã mokaro wãnopyry enery se
ynanase opoetory tõ etapahpõkomo.
11 Tõmase exiketõ ãpuruhpyry taka pusuhkatoh
etako te, ajamitunuru ke mokaro ipynanohko,
tapiakase exiketomo aorihtohme.
12 Ritonõpo, mokaro imehnõ nonory põkõ zuãnohko
7me opoihtotopõpyry eya xine emetakame!
13 Mame yna opoetory tõ, oeky tõ kaneru sã ynanase, yna Esẽme mase.
Jũme “Kure mase,” kakehpyra ynanase,
yna poenõ maro, yna pakomotyã roropa.
Eremiãko ynanase oeahmaryme, seroae te,
imeĩpo roropa jũme rahkene.