74
Ritonõpo, opoetory tõ poko wenikehpyra exiko!
Asape nymerohpyry.
1 Ritonõpo, oty katohme turumekase yna oya
jũme samo?
Oty katohme yna zehno mahno?
Yna esẽme mase, kaneru sã ynanase oeky tõ samo,
opoetoryme ynanase.
2 Wenikehpyra exiko opoetory tõ poko,
tymenekase toto oya pake opoetoryme toto ehtohme.
Typynanohse toto oya imehnõ namotome toto ahtao,
amaro toto ehtohme.
Wenikehpyra exiko ypy Xião poko, oesahpyry.
3 Ytoytoko senohne patãpo tõ poro:
Atapyĩ mõkomohpyry emero tonahkase yna
epetõkara a.
4 Atapyĩ tao oepetõkara tykohtase orẽpyra toehtohkõ poko tãkye toehtohkõke,
moroto pãteira tyrise eya xine, orẽpyra toehtohkõ enetupuhpotohme.
5 Apotopokõ akohnanõ sã toh nexiase,
wewe akohnõko tywyrykõ ke.
6 Tywyrykõ ke te, mate tõkehko ke
atapyĩ emepory tõ wewe risẽ tonahkase eya xine.
7 Atapyĩ Kurã tykararahse eya xine, nono pona
tomase, tyahkase eya xine;
Oesary nuriame tyripose eya xine, oeahmatoh esary.
8 Ynara tykase toto tukurohtao xine:
“Senahkatose toto emero porehme.”
Oesary kurã tyahkase toto a emero,
sero Izyraeu nonory po.
9 Onyriry tõ ajamitunuru ke onenepyra toehse yna,
urutõ pyra toehse roropa mana;
otara ahtao serara sã exikehnõko ropa nae?
Zuaro pyra ynanase.
10 Ritonõpo oty po ahtao yna eunohkehnõko
yna epetõkara nae?
Jũme oeunohkehpyra toh exĩko nae?
11 Oty katohme yna akorehmary se pyra hmahno?
Oemary anỹko mokaro wãnohtohme.
12 Yrome omoro, Ritonõpo, moino ro yna Esẽme mase.
Tuhke rokẽ typynanohse ynanexiase oya.
13 Ajamitunuru ke tuna konõto tapiakase oya,
zakareimo zupuhpyry takurihmose oya nakuao.
14 Zakareimo Rewiatã zupuhpyry takurihmose oya;
ipũ typahse oya onokyro tõ zohme ona po.
15 Tuna enatyry tõ tyrise oya iporiry tõ roropa,
tuna inunõ tonore tyripose oya.
16 Ẽmepyry tyrise oya ikohmamyry roropa,
xixi tyrise oya esaka, nuno roropa,
xirikuato tõ roropa emero tosaka xine.
17 Sero nono ehpiry tõ tyrise oya,
jeimamyry tyrise oya ikonopory roropa.
18 Ritonõpo yna Esemy, wenikehpyra exiko
oeunohkehpyra oepetõkara exiry poko.
Popyra ehtoh poko mã toto, opoihtõko mã toto.
19 Opoetory tõ Izyraeu onekaropyra exiko
epetõkara a, takorehmaneke pyra toto ahtao.
Opoetory tõ tyyryhmase exiketõ poko,
wenikehpyra exiko!
20 Wenikehpyra exiko õmihpyry poko,
totapose oya yna a.
Imehnõ etapãko zehnotokõ mana,
emero rokẽ po ikohmamyryhtao.
21 Tyyryhmase exiketõ onyhxiropopyra exiko,
yrome ah tymõkomokãkara oeahmã toto
omise exiketõ roropa.
22 Owõko, Ritonõpo, onyriry ewomako!
Wenikehpyra exiko, awaro pyra exiketõ
oeunopyry poko kohmãnõko mã toto.
23 Wenikehpyra exiko oepetõkara kui kary poko
ozehno toehtohkõke, panaikato onyrikehpyra
roropa oepetõkara mana.