72
Tuisa akorehmapory poko Ritonõpo a
Saromão omihpyry.
1 Ritonõpo, tuisamã amorepako zae ehtoh ke imehnõ apiakatohme eya, zae oehtoh samo! Zae oehtoh ekaroko eya
2 ajohpe pyra aehtohme opoetory tõ tuisaryme
aerokuruhtao, zae toto apiakatohme
tymõkomokãkara tonekunohse ahtao
jamihmehxo exiketomo a.
3 Tymõkomoke ononory põkõ tyripoko,
opoetory tõ akorehmako zae ehtoh poko toto ehtohme!
4 Tuisamã akorehmako zae tymõkomokãkara
apiakary poko; etuarimaketõ akorehmatohme,
imehnõ enekunohnanõ poremãkatohme.
5 Ah opoetory tõ oeahmã toto xixi nae ro ahtao,
ezurume nuno ahtao roropa, jũme enahpỹme!
6 Ah mokyro tuisamã konopo sã nexino ona po,
aepyryhtao onahpoty ehxikase nono poro.
7 Ah zae ehtoh poko exiketõ nemã toto
isene ro mokyro ahtao.
Ah osetapara nexĩ toto, kure rokẽ toto ehtohme
ezurume nuno nae ro ahtao.
8 Tuisame exĩko mana tuna konõto poe
imepỹ tuna konõto pona te,
tuna Eupyrati poe nono etyhpyry pona.
9 Ahno tõ ona tonorẽ põkõ tosekumuru po
porohnõko mã toto ẽpataka, epetõkara roropa
porohnõko mã toto tosekumurukõ po
tõmytykõ nono pokoxi mokyro ẽpataka.
10 Expania tuisary tõ, ahmõta tõ tuisary roropa
tynekarorykõ enehnõko mã toto eya, mokaro
roropa Arapia tuisary te, Etiopia tuisary roropa tynekarorykõ enehnõko mã toto eya.
11 Tuisa tõ emero tosekumurukõ po porohnõko
mã toto mokyro ẽpataka, imeimehnõ nonory
põkõ emero aomiry omipona exĩko.
12 Tymõkomokãkara pynanohnõko mana:
“Kuakorehmako ajohpãme samo,” karyhtao eya xine; tytineruke pyra exiketõ maro, turumekase exiketõ roropa.
13 Jamihme pyra exiketõ pyno mana,
etuarimaketõ roropa, takorehmaneke pyra exiketõ pynanohnõko mana.
14 Mokaro pynanohnõko mana irohmanohpotoh winoino te, etaetapatoh winoino roropa;
isene toto ehtoh sehxo mana ipunaka.
15 Ah mokyro tuisamã isene exikehpyra nexino!
Ah uuru nenehpõ toto eya Arapia poe!
Ah noturũ toto Ritonõpo a ipoko kokoro rokene,
kure rokẽ tyripotohme eya, jũme!
16 Ah tiriiku tõkehko itamurume nexino
sero nono po!
Ah ypy tõ poro tỹkyryneke nexino itamurume,
ypy tõ Ripano põ samo!
Ah pata tõ pehme nexĩ toto ahno ke
onahpoty samo ona po!
17 Ah tuisa esety poko jũme wenikehpyra ahno
nexĩ toto; imehxo aehtoh waro imehnõ ehtohme
xixi nae ro ahtao!
Ah imeimehnõ ahno tõ emero kure toehtohkõ
nekaropõ toto Ritonõpo a,
kure mokyro tuisa ritopõpyry saaro eya.
18 Ritonõpo eahmatoko, Izyraeu tõ Esemy!
Ynoro rokẽ morohne emero Rihpõme aexiryke.
19 Jũme Ritonõpo Imehxo Exikety eahmatoko!
Ah sero nono pehme nexino Imehxo Aehtoh ke!
Enara! Aõ! Kure mana!
20 Sero ke Ritonõpo maro Tawi, Jese mũkuru,
oturutoh tonõ nenahno.