33
Eremiatoh Ritonõpo eahmaryme
1 Eremiatoko Ritonõpo Kuesẽkõ eahmaryme,
amarokõ emero aomiry omipona exiketomo.
Atãkyematoko inyrityã poko,
eahmatoko emero zae ehtoh poko exiketomo.
2 “Kure mase,” kahtoko Ritonõpo a rira tõ maro,
eremiatoko eahmaryme haapa tõ etory maro,
10me eary nae exiketomo.
3 Eremiatoko Ritonõpo netaryme,
eremiatoh ke kasenato,
haapa tõ etotoko, okohtatoko roropa opore samo.
4 Ritonõpo omiry ajohpe pyra mana;
inyrityã emero zae mana ipunaka.
5 Zae ehtoh sehxo Ritonõpo Kuesẽkõ mana,
ajohpe pyra exiketõ jamaro mana; sero nono
pehme mana kypyno xine Ritonõpo ehtoh ke.
6 Tõmiry ke kapu tõkehko tyrise Kuesẽkomo a.
“Exiko,” karyke xixi tyrise eya te,
nuno te, xirikuato tõ roropa.
7 Oximõme tuna konõto tõ tyrise Ritonõpo a
esaka toiro; tukurãkase kehko eya ikurãkatoh tonõ ao.
8 Ah sero nono põkõ emero Ritonõpo Kuesẽkõ
omiry omipona nexĩ toto!
Imehxo aexiry enetupuhtoko,
ahno emero, sero nono po.
9 Aotururuhtao sero nono tyrise kehko.
“Exiko,” tykase ynororo ahtao, emero toehse rahkene.
10 Ahno tõ osenetupuhtoh tyritohme,
morohne enahkapõko Ritonõpo mana,
mokaro penetatoh onyripopyra mana.
11 Yrome tyriry se Ritonõpo ehtoh
jũme exikehpyra mana.
Inymenekahpyry nyritoh enahpỹme mana jũme.
12 Tãkye mã mokaro tosẽke exiketomo,
Ritonõpo ke! Tãkye kuhse mã toto
tymenekase exiketomo Ritonõpo a typoetoryme!
13 Ritonõpo Kuesẽkõ kapu poe osenuhmãko
mana, ahno tõ enẽko mana, kymarokõ porehme.
14 Tosae enẽko mana,
isene exiketõ emero sero nono po.
15 Aosenetupuhtohkõ rĩko Ritonõpo mana,
inyriry tõ waro mana emero porehme.
16 Tuisa tõ osepynanohpyra mã toto
soutatu tõ ke, tuhke nae toexirykõke.
Soutatu tõ roropa imehnõ onyporemãkara
mã toto jamihme toexirykõke.
17 Kawaru tõ osetapaketõ topetõkara
onyporemãkapopyra mã toto osetapary poko,
tyjamitunuru ke osepynanohsaromepyra mã toto.
18 Ritonõpo Kuesẽkõ rokẽ mã
tõmiry omipona exiketõ ewomãko mana.
Ynoro rokẽ mã typyno xine aehtoh
enetupuhnanõ kurãkãko mana.
19 Toto pynanohnõko mana orihpyra toto ehtohme.
Mame omise konõto toehse ahtao
isene ro toto kurãkãko mana.
20 Ritonõpo enetupuhnõko sytatose Kuesẽkõme;
kuakorehmanekõme mana, kuewomanekõme roropa.
21 Atãkyemãko sytatose Kuesẽkõ nyrihpyry pokoino;
enetupuhnõko sytatose kure rokẽ aexiryke.
22 Ritonõpo yna Esemy, yna pyno exikehpyra exiko, oenetupuhnõko ynanase!