24
Ritonõpo tapyĩ kurã taka ytory
Tawi nymerohpyry.
1 Sero nono esẽme Ritonõpo Kuesẽkõ mana,
emero esẽme roropa mana;
sero nono epõkõ maro, ahno te, onokyro tomo,
otyro tõkehko emero esẽme mana.
2 Tuna konõto epoe nono tyrise eya,
apõ tõ tyrise eya tuna konõto zue ao.
3 Onokãkõ ytõko nae Kuesẽkõ ypy pona?
Onoky Itapyĩ kurã taka ytõko nae?
4 Zae exiketõ rokẽ omõnõko mã toto,
zae roropa aosenetupuhtoh exiketomo,
imepỹ neponãmary oneahmara exiketõ
Ritonõpo myakãme.
Tõmiry anamonohpyra roropa exiketomo.
5 Kure rokẽ mokaro rĩko Ritonõpo Kuesẽkõ mana,
ipynanohnõko mana, ewomãko roropa mana.
“Zae mose mana,” ãko Ritonõpo mana apiakatoh tao.
6 Moro sã mã mokaro Ritonõpo pyno exiketomo,
Jako Esẽ eahmananomo.
7 Omõtoh tonõ etapuruhmakatoko,
omõtoh pakato tõ etapuruhmakatoko.
Mame mokyro omõnõko mana, Tuisa Imehxo Exikety.
8 Onoky mokyro Tuisa Imehxo Exikety?
Ritonõpo Kuesẽkomo, jamihme exikety,
tuarohxo exiketyme roropa mana.
Kuesẽkõ orẽpyrahxo, jamihme mana,
topetõkara poremãkapõko mana.
9 Kure rokẽ omõtoh tonõ etapuruhmakatoko,
etapuruhmakatoko omõtoh tonõ pakatokomo,
mame Tuisa konõto Imehxo Exikety omõnõko mana.
10 Onoky mokyro Tuisa konõto Imehxo Exikety?
Ritonõpo mokyro Kuesẽkomo Jamihmehxo Exikety.
Ynororo rokẽ Tuisa konõtome mana,
Imehxo Exikety.