21
Ritonõpo eahmaryme
Sero saumu tymerose Tawi a.
1 Ritonõpo, tãkye mã tuisa,
eya ajamitunuru mekaroase exiryke;
atãkyemãko mã ynororo,
opoe topetõkara typoremãkase exiryke eya.
2 Ipenetatoh mekaroase eya
inekaropohpyry oya mekaroase eya.
3 Toehse omoro eya, kure rokẽ tyrise ynororo oya,
zupuhpyry pona parimã myriase, uuru risemy.
4 Isene toehtoh tokaropose tuisa a,
isene ehtoh mekaroase eya, okynã exikehpyra mana.
5 Imehxo nase opokoino, takorehmase oya exiryke.
Tanỹpose ynororo oya epe tõ motary pona:
“Imehxo mase,” ãko imoihmãkõ eya,
opoetoryme aexiryke.
6 Kure rokẽ tyrĩko mase, jũme kakehpyra,
amaro toexiryke atãkyemãko mana.
7 Ritonõpo Jamihmehxo Exiketyme
enetupuhnõko tuisa mana, ipyno Ritonõpo exiryke,
tuisame exikehpyra mana.
8 Topetõkara apoĩko tuisa mana;
tyjamitunuru ke tyzehnotokõ apoĩko mana, emero.
9 Toto enahkãko mana apoto zemime
exikety samo toeporehkase ahtao.
Toto zehno Ritonõpo exiryke, toto enahkãko mana,
apoto ke toto zahkãko mana.
10 Ipakomotyã isene pyra exĩko mã toto;
emero etapãko tuisa mana.
11 Atamorepãko epetõkara mana
tuisa poremãkatohme tyya xine repe,
yrome ekurehnõko mã toto.
12 Pyrou tõ ekomãko mana toto pona,
toto erehtohme eramatohme epatohme.
13 Ritonõpo, oeahmãko ynanase jamihme
kuhse oexiryke; eremiãko ynanase,
oeahmaryme ajamitunuru poko.