14
Popyra ahno ehtopo
(Saumu 53)
Sero saumu tymerose Tawi a.
1 Putupyra exiketõ mã mokaro,
ynara kananõ tukurohtao xine:
“Ritonõpo pyra mana,” kananomo.
Popyra rokẽ mã mokaro, inyrityã nuriame;
zae ehtoh poko exikety pyra mana ipunaka.
2 Kapu poe sero nono põkõ enẽko Ritonõpo mana,
zae ehtoh waro exikety zupĩko mana,
toiro Ritonõpo pyno exikety zupĩko mana.
3 Mame tamonohse toto a emero,
zae ehtoh esemary.
Oxisã mã toto popyra ipunaka, tymotase samo.
Zae ehtoh poko exiketõ pyra mana,
toiro zae exikety pyra mana ipunaka.
4 Ritonõpo, ynara ãko ekaropõko:
“Zae ehtoh waro pyra toh nae,
mokaro popyra exiketomo?
Torẽnase toto ypoetory tõ kyryry kurã
ematonanopyry poko.
Oturupyra roropa mã toto ya.”
5 Yrome imeĩpo enaromỹke exĩko mã toto,
tykytyky ãko, tõmiry omipona exiketõ maro
Ritonõpo exiryke.
6 Tymõkomoke pyra exiketõ ise ehtoh
kararahnõko popyra exiketõ mana.
Yrome mokaro ewomãko Ritonõpo mana.
7 Ritonõpo, Izyraeu tõ pynanohne enehpoko,
Jerusarẽ poe!
Opoetory tõ enepyry ropa ahtao
imeimehnõ nonory poe,
tãkye exĩko mã toto Jako pakomotyamo.