1 Kuku, jomihpyry poko wenikehpyra exiko, jũme ynyripohpyry oya wenikehpyra exiko. 2 Jomiry oya omipona exiko, mame isene exikehpyra exĩko mase. Tomeseke exiko ynyripohpyry omipona oehtoh poko, oenuru ewomary sã oya. 3 Ãmorepatopõpyry ya ikurãkako okurohtao. 4 Tuaro ehtoh poko exiko, ooryxiry pyno oehtoh samo ipyno exiko. Ãtamorepary poko exiko oepe kurã pyno oehtoh samo. 5 Ãkorehmãko mã kehko ameke oehtohme imehnõ pyxiã winoino, tõmire ajohpe exikety poe roropa.

6 Pake hkopyra osenuhmãko exiase osenuhmatoh ae ytapyĩ tao, 7 nuasemãkõ enease tuaro hkopyra exiketomo; mame toirõ enease putupyra exikety. 8 Mokyro ytoytõko nexiase osema ae, nohpo tapyĩ esemary pũtokuroko. Ytoytõko nexiase itapyĩ kuroko, 9 kohmãnõko nexiase, xinukutumehme sã toehse. 10 Morarame tutũtase nohpo osẽpatakãmase imaro, tupõ tamuruse eya imeimehnõ poko exikety samo, osenetupuhnõko nexiase tynyriry poko. 11 Musurehpe nexiase, ihximyra, toytory poko osema tõ ae torẽnase ynororo. 12 Jarãnao xikihme eraximãko nexiase, pata rãnao te, osema ehpio roropa osenuhmãko. 13 Mokyro nuasemano a toytose nohpo, toahmase ynororo, typohse roropa eya, mame ynara tykase eya eahmaryme:

14 — Ynekarotyã arono seroae ynekaroryme Ritonõpo a, tõsẽ osepeme ehtoh nae ase ytapyĩ tao tupuruse seroae. 15 Naeroro utũtano oẽpatakãmase. Oupĩko akene, seromaroro kueneno! 16 Jynyhtoh tyõtose ya kamisa kurã ke Ejitu põ ke. 17 Ixtaratu ke jynyhtoh typoxine tyrise ya: mira ke, aroe ke, kanera ke, enara. 18 Eropa, oximaro kuehtohme ẽmepyry pona ro. Oseahmary poko ẽmehnõko sytase oximaro. 19 Ynio tapyi tao pyra mana. Toytose ynororo mya rahkene. 20 Tineru tarose eya itamurume. Nuno zumome ahtao rokẽ oehnõko ropa mana.

21 Tõmiry anusasamã ke mokyro tõmipona tyripose eya. Tonekunohse ynororo eya. 22 Axĩ toytose ynororo imaro, pui ytory samo tuamekaro totapatoh pona, onokyro omomyry sã roropa apoitoh taka, 23 moroto eano wõko pyrou mã rahkene. Torõ sã nexiase ytõko apoitoh taka, tuamekaro toorikyry poko exiryke.

24 Seromaroro aimo, etako pahne! Otatõme exiko ãmorepatoh poko ya. 25 Mokyro nohpo panõ poko penetara exiko, eporemãkapopyra exiko eya; onekahmara exiko. 26 Tuhkãkõ typoremãkase eya, taorihmapose roropa orutua kõ eya, tuhke ikuhpỹme. 27 Mokyro nohpo tapyĩ taka oytoryhtao aorihtyã esaka ytõko mase, topohme ytõko mase oorihtoh pona.