1 Mame Moeze tykerekeremase Miriã tomo a Arão maro, typytase Moeze exiryke nohpo, Etiopia põ maro. 2 Ynara tykase toto:

— Ritonõpo tõturuse Moeze ae rokẽ pyra. Tõturuse roropa ynororo kymoro ae.

Mame mokaro otururu totase Ritonõpo a. 3 (Moeze epyrypara ipunaka, imehnõ motye imehxo toexiry poko epyrypara nexiase.)

4 Ynara tykase Ritonõpo Moeze tomo a, Arão maro, Miriã maro:

— Osehtoko, amarokõ oseruao, ymaro oturutoh taka! Naeroro toytose toto. 5 Tyhtose Ritonõpo akurũ ao Tapyi omõtoh taka. Mame Arão tykohmase eya Miriã maro. Toeporehkase toto ahtao, 6 ynara tykase Ritonõpo:

— Seromaroro, etatoko ke jotururu oya xine. Urutõ tõ nae ahtao arãnao xine osenepõko ase eya xine enepotoh ae te, oturũko ase roropa toto maro aosenetykõ ae. 7 Yrome ypoetory Moeze maro moro sã pyra mana, tymenekase ya ynororo ypoetory tõ emero esẽme ehtohme. 8 Naeroro imaro oturũko ase osẽpataka, topohme, tupimãkõ ke pyra, enetupuhpotoh ke pyra; tonese roropa ywy eya! Oty katohme zuno pyra hmatokene ypoetory Moeze kerekeremary poko oya xine?

9 Mame toytose Ritonõpo tohne mokaro poko. 10 Moro akurũ toytose ahtao Tapyi epoe axĩ Miriã pihpyry tyrohsẽ hpe toehse, karimutume akurũ samo. Arão a tonese Miriã, tyrohsemyimo hpe rahkene. 11 Ynara tykase Arão Moeze a:

— Ajohpame sã tuisa, yna onuãnohpopyra exiko azahkuru yna ehtoh poko, ajoajohpe toehse yna exiryke. 12 Ajohpame sã poeto aepukahpyry sã Miriã onyripopyra exiko, zokonaka tonahkase aexihpyry sã aenururuhtao.

13 Naeroro ynara tõturuse Moeze Ritonõpo a:

— Ritonõpo ajohpãme sã ikurãkako ropa!

14 Ynara tykase Ritonõpo Moeze a:

— Jumy ituh tykase ahtao ẽmyty pona, toehxirose ynororo exiry 7me ẽmepyry. Naeroro ah ynororo taroposẽme nexino owinoino xine 7me ẽmepyry. Imeĩpo enehko ropa.

15 Mame 7me ẽmepyry taropose Miriã a ameke tapyi tõ wino. Tehme rokẽ toh nexiase mokyro enehtoh ropa pona itapyĩ taka ropa.

16 Moromeĩpo toytose toto Hazerote poe ona Parã pona osesarise.