9
Ahno osekarory tyyrypyrykõ poko
1-2 Mame ẽmepyry 24mã po, nuno 7mã po, tõximõse Izyraeu tomo, otuhpyra ehtohme, toemynyhmatohkõme tyyrypyrykõ poko. Osemazuhme tãtapiakase toto juteutõkara wino. Toemynyhmarykõ enetupuhpotohme upo tamuruse eya xine, kamisa topuxiximã risemy. Tupuhpyrykõ pona nono tyrise roropa eya xine. Mame towõse toto xikihme, tyyrypyrykõ tokaropitose eya xine, tytamurukõ rypyhpyry tõ roropa. 3 Okynahxo, 3 orame exisasaka Ritonõpo Omiry tysekeremase toto a, imoihmãkõ netaryme. Moromeĩpo 3 orame ropa tõsekarose toto, tyyrypyrykõ tokarose eya xine, kure Ritonõpo tokarose roropa eya xine eahmaryme.
4 Rewita tõ xikihme toh nexiase tyzarã pitiko po, kae. Tõturuse toto opore samo Ritonõpo a, Tosẽkomo a. Ynara toh nexiase zara po: Jesua te, Pani te, Katamieu te, Sepania te, Puni te, Serepia te, Pani te, Kenani, enara.
5 Mame ahno tykohmase rewita tomo a Ritonõpo eahmatohme. Ynara toh nexiase rewita tomo: Jesua te, Katamieu te, Pani te, Hasapaneia te, Serepia te, Hotia te, Sepania te, Petaia, enara. Ynara tykase toto:
“Owõtoko! Ritonõpo Oesẽkõ eahmatoko!
‘Kure mase, Ritonõpo,’
kakehpyra ehtoko jũme.
Ah emero sero nono põkõ, ‘Kure mase,’ nykã toto eya,
Imehxo aexiryke, eahmary kyya xine ipune pyra ahtao ro.”
Aoturutopõpyry kõ Ritonõpo a
6 Ynara tykase Izyraeu tõ Ritonõpo eahmaryme:
“Ritonõpo, omoro rokẽ yna Esẽme mase.
Kapu tyrise oya, xirikuato tõ roropa.
Sero nono tyrise oya, tuna konõto roropa, emero zae exiketõ roropa.
Isene toto tyrise oya, emero porehme.
Tosekumurukõ po kapuaõkõ porohnõko mã toto oeahmaryme.
7 “Oya, Ritonõpo, Aparã tymenekase,
touse ynororo oya Ua wino, Papironia poe;
Esety tymyakãmase oya Aparãome.
8 Ỹme aexiry oya, tonese oya.
Õmihpyry metapoase eya.
Sero nono ekarõko ase Aparão a, makene:
Kanaã põkõ nonory, heteu tõ nonory, amoreu tõ nonory,
perizeu tõ nonory, jepuseu tõ nonory, kirikaseu tõ nonory,
ipakomotyã esaryme ehtohme.
Morara tyrise oya, omihpyry ae ro, ekurehpyra oexiryke.
9 “Yna tamuru tõ etuarimatopõpyry tonese oya Ejitu po.
‘Yna ipynanohko!’
katopõpyry okohmaryme eya xine totase oya tuna konõto Tahpiremã ehpiõ po.
10 Tõsenuruhkase toto ajamitunuru eneryke tyya xine Ejitu tuisary wãnopyryme,
Kowenu tuisary akorehmananõ wãnopyryme roropa, Ejitu põkõ maro,
zuaro oexiryke opoetory tõ rohmanohpotopõpyry eya xine.
Morara exiryke imehxo oexiry waro toehse sero nono põkõ mã emero,
seroae ro imehxo oexiry waro mã toto emero porehme.
11 Tuna konõto tapiakase oya yna tamuru tõ ẽpataka,
Tarose toto oya tuna kuroko, osema ae akuohtohme, nono tonorẽ poro.
Mokaro ekahmananõ tynerymapose oya zue ao.
Tyneryse toto topu neryry samo pohkane konõto kuao.
12 Akurũ ke toto tarose oya saereme ahtao,
koko apoto xikihmã ke, tykohmãse ahtao.
Osema saerehkatohme, zae osema ae toto ytotohme.
13 Ypy Xinai pona tyhtose omoro, kapu ae Opoetory tõ zurutohme.
Õmihpyry kurã mekaroase eya xine
zae ehtoh poko tamorepase toto oya.
14 Tamorepase toto oya ẽmepyry 7mã apiakary poko,
opoko ehtohme, oeahmatohme eya xine.
Opoetory, Moeze ae, onyripohpyry mekaroase eya xine.
15 Omise toehse toto ahtao,
kapu ae tonahsẽ menehpoase inapyrykomo,
topu poe tuna tutũtanohpose oya tutunazehnase toto ahtao.
Tynonorykõ tapoipose oya tosarykõme, õmihpyry ae ro, itamuru tomo a.
16 Yrome yna tamuru tõ epyrypaketõme toh nexiase
putupyra exiketõ sã toehse toto
õmihpyry omipona se pyra toh kynexine, Onyripohpyry tomo.
17 ‘Arypyra, Õmiry omipona pyra ynanase,’ tykase toto.
Tuenikehse toto onyrihpyry poko emero;
tuenikehse toh kynexine ajamitunuru enepotopõpyry poko.
Toepyryparykõme, imepỹ tymenekase eya xine tutuisarykõme,
Ejitu pona toto arotohme ropa,
topehke pyra imehnõ namotome toehtohkõme ropa.
Yrome omoro, Ritonõpo, yna rypyry korokaneme mase.
Kurãme mase, yna pyno exiketyme.
Okynã sã yna zehno pyra mase,
opoetory tõ pynanopyry enahpyra mana.
Morara exiryke toto onurumekara mexiase.
18 Pui mũkuru panõ tyrise eya xine, uuru risemy.
‘Ritõ mose ro’ tykase toto,
‘Kuenepyhpõkomo Ejitu nonory poe.’
Ritonõpo, tyhtomase mexiase eya xine.
19 Yrome toto onurumekara mexiase ona tonorẽ po,
ahno pyno itamurume oexiryke.
Akuru onupuxihkara mexiase apoto roropa
osema enepotohme eya xine saereme ahtao, koko, enara.
20 Ouzenu kurã mekaroase eya xine
toto amorepaneme zae ehtoh poko toto ehtohme;
Tonahsẽ manã mekaroase eya xine
tuna roropa tutunazehnase toto ahtao.
21 40me jeimamyry taropose eya xine ona tonorẽ po,
tynahpase toto oya, omise pyra toto ehtohme.
Toto zupõ onenahkara roropa kynexine,
ipupurukõ zaozao pyra toh kynexine.
22 “Oya ahno typoremãkapose eya xine, tuisa konõto tomo,
katonõ nonory, tosarykõ ehpiõ po,
Hexipõ nonory typoremãkase Izyraeu tomo a,
tuisa Seõ nonory roropa,
Pasã nonory roropa, moroto Oke tuisame ahtao.
23 Oya ipoenõ tomãkapose, tuhke ikuhpỹme, xirikuato sã kapu ao.
Mame tonehse toto oya sero nono pona,
õmihpyry ae ro, itamuru tomo a.
24 Kanaã nonory typoremãkase eya xine;
oya morotõkõ typoremãkapose.
Opoetory tomo a, ajamitunuru mekarone,
typenetatohkõ ritohme Kanaã põkomo a, ituisary tomo a roropa.
25 Pata tõ jamihmãkõ tapoise eya xine
tapuruse toto ahtao ro, tupito tõ kurã roropa,
tapyi tõ maro tymõkomoke pehme,
tuna pẽkamã tõ tahkase toto ahtao, oriwera tomo, wewe eperytaketomo,
uwa zoko ke tarykase exiketomo.
Typenetatohkõ tonahsẽme tonahse eya xine,
tupunase toto, tõseahmase toto
onekarohpyry kurã ke porehme.
26 “Yrome opoetory tõ orumekary se toehse,
owino toeramase toto;
õmiry omipona pyra toehse toh kynexine.
Toeramase toto õmihpyry omipona toehxĩpo xine.
Õmiry poko urutõ kõ totapase eya xine,
zae ehtoh poko tutuarõtase toto ahtao,
‘Ehmaropa Ritonõpo a ropa,’ tykase toto ahtao.
Tyzehno xine orine toto, tynyrihpyrykõ ke, tõmihpyrykõ ke roropa.
27 Morara exiryke tokarose toto oya toto epetõkara a, toto poremãkatohme, irohmanohpotohme.
Yrome toetuarimarykohtao, okohmane toto takorehmapotohkõme,
tozuhse toto oya, kapu ae.
Toto pyno exikehpyra oexiryke,
toto akorehmananõ tonyohse oya, toto pynanohtohme epetõkara wino.
28 Mame osepeme toehse ropa toto ahtao tykatonomorykõ maro,
tyyrypyrykõ poko toehse ropa toto, õmiry omipona pyra.
Morarame toto typoremãkapose ropa oya, topetõkara a.
Mame toeramase ropa toto ahtao,
tyyrypyrykõ rumekatohme ropa,
toto pynanohtohme ropa oya,
Aomirykõ totase oya, kapu ao,
toto typynanohzomose ropa oya,
toto pyno exikehpyra oexiryke.
29 Turuse toto oya: ‘Kurehxo exiry Jomiry omipona awahtao xine,’
yrome aepyryparykõke Õmihpyry turumekase eya xine.
Õmihpyry omipona ahtao isene exĩko ynanase.
Orumekary se toh kynexine, putupyra exiketõ samo,
Õmihpyry omipona pyra toehse toto.
30 Tuhke jeimamyry ae turuse toto oya,
penekehpyra mexiase.
Urutõ kõ ae tõturuse Ouzenu toto netaryme repe,
yrome onetara toh kynexine.
Naeroro toto mekarone imehnõ nono põkomo a toto poremãkatohme eya xine.
31 Mãpyra, toto pyno exikehpyra oexiryke,
toto onurumekara mexiase
toto onenahkara roropa mexiase.
Omoro mase Ritonõpo,
opoetory tõ pyno exikehpyra, kurãme oexiryke!
32 “Ritonõpo, yna Esemy, Imehxo Exiketyme mase!
Osenuruhkãko ynanase, ajamitunuru eneryke yna a!
Õmihpyry yna tamuru tomo a anamonohpyra mase.
Moino typoremãkase yna ahtao, axirio tomo a tarona, toetuarimase yna!
Yna tuisary tomo, yna tamuximãkomo, oturuketomo te, urutõ kõ roropa,
yna tamuru tomo te, yna ekyry tomo emero toetuarimase yna!
Wenikehpyra exiko yna etuarimatoh poko!
33 Zae mase ipunaka yna wãnopyry poko;
zae ro mexiase, iirypyryme toehse yna ahtao ro.
34 Onyripohpyry omipona pyra yna tamuru tõ kynexine,
yna tuisary tomo te, tamuximãkomo, oturuketõ roropa.
Õmiry onetara toh kynexine, turuse toto ahtao oya.
35 Kure oexiryke opoetory tomo a, tuisa tõ tyrise oya toto esẽme.
Moroto toh kynexine nono konõto po, nono kurã po, onekarohpyry;
yrome oeahmara toh kynexine, tyyrypyrykõ onurumekara, popyra toto ehtopõpyry poko.
36 Seromaroro imehnõ namotome ynanase,
sero nono onekarohpyry po, nono kurã, tỹkyryry zamaro exikety,
ipoe otuhnõko ynanase.
37 Tykyrysã tõkehko arõko tuisa tomo,
onekarotyã yna a
ynarohmanohpotohme yna rypyry pokoino.
Typenetatohkõ rĩko mã toto yna a te, yna eky tõ poko, pui tõkehko poko, enara.
Naeroro yna ryhmatopõpyryke otupĩko ynanase.”
Tosetykõ merotopõpyry tõmirykõ etaporyme
38 Morara exiryke, morohne toehse exiryke, kymarokõ Izyraeu tõ, kuomirykõ merõko sytatose Ritonõpo omihpyry omipona kuehtohkõme. Mame moro pokona tosetykõ merõko kutuisarykõ mana, rewita tõ maro, oturuketõ roropa, enara.