2 “Jo, zae pyra mase, zae rokẽ exiketyme osekaroryhtao Ritonõpo a.

3 Ynara kary Ritonõpo a zae pyra roropa mana:

‘Ritonõpo, jetũ exĩko mah yyrypyry poko jahtao?

Otyme kure ya yyrypyry poko pyra jexiry?’ ãko mase.

4 Oezuhnõko ase,

oepe tõ ezuhnõko roropa.

5 “Kakoxi osenuhmako kapu enetohme akurũ tõ roropa.

Kaehxo mã kehko omotye.

6 Oorypyry poko awahtao Ritonõpo Kapuaõ onyryhmara mase.

Itamurume popyra awahtao ro, ‘Oty’ kara mana,

sam kamexipopyra mase eya.

7 Kure ehtoh riryhtao oya, moro ke Ritonõpo anakorehmara mase.

Okyryry se pyra Ritonõpo mana ipunaka.

8 Oorypyry poko awahtao imehnõ ahno rokẽ etuarimãko.

Ahno rokẽ akorehmãko roropa mase kure ehtoh poko awahtao.

9 “Tyyryhmase ahtao itamurume kohtãko etuarimaketõ mana.

Takorehmane kohmãko mã toto, typynanohtohkõme jamihme exiketõ winoino.

10 Yrome eramara ropa mã toto Ritonõpo a, tyrihpõkomo a.

Ijamitunuru ekarõko mokyro mana, koko ahtao.

11 Yrome eramara ropa mã toto Ritonõpo a, tamorepase tahtao xine ro eya, torõ tõ motye, onokyro tõ motye roropa.

12 Takorehmane kohmãko toh mã repe.

Yrome toto epyryparyke onezuhpyra Ritonõpo mana, popyra roropa toto exiryke.

13 Yrome zae pyra mana ynara kary Ritonõpo poko:

‘Onetara mana, onenepyra roropa Ritonõpo mana, Jamihmehxo Exikety.’

14 “Jo, Ritonõpo onenepyra oexiry ekarõko mase.

Yrome penekehpyra exiko eraximary poko;

oehtoh poko zuaro mana.

15 Popyra ehtoh poko exiketõ onuãnohpyra Ritonõpo,

ekarõko mase.

Iirypyrykõ poko oty kara roropa,

ekarõko roropa mase.

16 Oturukehpyra oexiry toiparo rokẽ mana.

Oturũko mase itamurume repe,

yrome tuaro pyra exikety sã sekere ãko mase.”