2 “Jemuhkehkary se awahtao xine, jotururu etatoko rokene.

3 Penekehpyra ehtoko jotururuhtao oya xine;

imeĩpo tõtyhkase jahtao jurõko matose ise awahtao xine.

4 Ahno maro oseosezuhpyra ase,

morara exiryke typenekehse ywy.

5 Kuenetoko osenuruhkatohme,

oemary tyritoko õtarykõ pona.

6 Josenetuputyryhtao senohne jehtopõpyry poko oserekohmãko ase

tykytyky ãko joko porehme.

7 “Oty katohme popyra exiketõ isene exikehpyra nae toto?

Oty katohme tymõkomoke exĩko toh nae?

Tamuhpõme exĩko roropa toh nae?

8 Tumũkue exĩko mã toto, typakõke roropa,

isene ro mã toto, mokaro wãtary enetohme tymaro xine.

9 Itapyĩ tao imehnõ zuno pyra mã toto,

onuãnohpyra roropa Ritonõpo mana.

10 Eky tõ, pui tõkehko amonohkara emũkuãko mã toto,

enurũko mã toto mynyhkara.

11 Imũkuru tõ tururume ytõko mã toto kaneru poenõ samo,

pyhseky ãko mã toto tãtãkyemarykõme.

12 Eremiãko mã toto,

oseahmãko roropa mã toto eremiatoh ke, pãteru tõ ke, rira tõ ke, rue tõkehko maro.

13 Popyra exiketõ kure ehtoh apoĩko mã toto, kurehxo ehtoh ke roropa,

orihnõko mã toto torẽtyke pyra,

etuarimara roropa mã toto.

14 “Moro sã toto ahtao ro Ritonõpo a ynara ãko mã toto:

‘Yna inomoko torẽtyke pyra;

zuaro se pyra ynanase onyripohpyry tõ poko.

15 Onoky mokyro, Ritonõpo Jamihmehxo Exikety, eahmapotohme yna a?

Otyme kure yna otururu eya?’

16 Popyra exiketõ ynara ãko mã toto:

‘Toerohse jexiryke yronymyryme tytineruke toehse ywy, tymõkomoke roropa, emero.’

Yrome moro omi zae pyra mana ya.

17 “Otara ahtao popyra exiketõ ezuru tozehse nexiase?

Otara ahtao toiro popyra exikety tonahkase, tuãnohse Ritonõpo a, zehno toexiryke?

18 Otara ahtao popyra exiketõ typahse Ritonõpo a tiriiku akumuru samo,

tiriiku pihpyry sã roropa tarose ahtao tyryrykane a?

19 “Ynara ãko matose: ‘Ahno mũkuru wãnohnõko Ritonõpo mana jũ rypyry emetakame.’

Yrome zae exiry jumy tuãnohse ahtao iirypyry emetakame zomory zuaro ehtohme.

20 Ah mokyro iirypyryme exikety tuãnohsẽme nexino, sam katohme,

popyra ehtoh zehno Ritonõpo Jamihmehxo Exikety ehtoh waro ehtohme!

21 Yrome, toorihse ynororo ahtao, aorihtyã esao ynororo ahtao, oty kara mana tyekyry atasamary poko.

22 Ahno Ritonõpo Jamihmehxo Exikety amorepãko nae, kapuaõkõ apiakaryhtao eya?

23 “Ahno nae tãkye exiketomo, jamihme, torẽtyke pyra toorihtohkõ poko,

tymõkomoke tahtao xine ro orihnõko mã toto,

24 tyrohsẽke pyra, kure rokene.

25 Mãpyra imehnõ tyoro sã mã toto, tãkye ehtoh onukuhpitopyra,

orihnõko mã toto sam karyke tukurohtao xine.

26 Yrome oxisã etyhpyryme orihnõko mã toto.

Tonẽse toto ahtao oxisã tyõtosẽme exĩko mã toto moromoro tõ maro.

27 “Õsenetupuhtohkõ waro ase.

Popyra jekarõko matose, zuaro ase.

28 Ekaropõko matose:

‘Otoko mokyro imehxo exikety tapyiny seromaroro, tyyrypyhpyke exikety tapyiny?’

29 “Ytoketõ maro oturupyra ro mexiatose?

Aomirykõ imeimehnõ poko onetara ro mexiatose?

30 Ynara ekarõko mã toto:

‘Tohne toehse Ritonõpo ahtao, mame ahno tuãnohse ahtao eya, popyra exikety epãko mana;

typynanohsẽme exĩko mana.

31 Mokyro onyhxiropyra imehnõ mana inyrihpyry xihpyry poko.

Mokyro onepehmara imehnõ mana zae pyra inyrihpyry emetakame.

32 Mokyro ekepyry tarose ahtao zonẽtoh pona, erase tõ moroto eraximãko mã toto.

33 Ahno tuhkãkõ miu motye mokyro ekepyry ekahmãko mã toto,

tomeseke sã ekepyry enyhtõko eutary aka,

mame zohzohme sã nono ẽmãko mã toto etapurutohme.’

34 “Jepe tomo, jemuhkehkasaromepyra matose,

õmirykõ emero ajohpe rokẽ mana.”