2 “Oty katohme jyhtomãko matou?

Otara ahtao japurokehnõko matou õmirykõ ke?

3 Tuhke rokẽ typoihtose ywy oya xine.

Ehxiropyra hmatou azahkuru oehtopõpyrykõ poko ypoko?

4 Azahkuru jahtao ro, otãto oryhmatorỹko hano?

5 Ymotye kure osekarõko matose.

Popyra ehtoh toehse ya exiryke iirypyryme jekarõko matose.

6 “Tuaro ehtoko zae pyra Ritonõpo toehse ypoko.

Ahno apoitoh tyrise eya japoitohme.

7 Kohtãko ase, yyryhmara Ritonõpo ehtohme.

Yrome onetara imehnõ mana.

Kohtãko ase opore repe,

yrome zae ehtoh onyripyra mã toto.

8 Jesemary tapuruse eya, ytopyra jehtohme.

Jesemary tõ tonẽse eya ikohmamyry a.

9 Ymõkomory emero tupuxihkase eya,

ime jehtopõpyry tonahkase roropa eya.

10 Ypipohnõko mana emero rokẽ poe jenahkatohme.

Kure ehtoh eraximary ya touse roropa eya, otyro mity oury samo.

11 Yzehno toehse ynororo, tyahse sã ywy;

topekarame jekaroase.

12 Tysoutatu tõ tonehpose eya etonatohme ymaro.

Nono ahkãko mã toto;

tõsesarise mã toto ytapyĩ zomye.

13 “Turumekapose ywy Ritonõpo a wekyry tomo a.

Imepỹ nono põme exiketyme jyrĩko jepe tõ mana.

14 Wekyry tomo a turumekase ywy,

jepe tõ tuenikehse mã toto ypoko.

15 Ytapyĩ tao tynyhse aexityã juaro pyra sã mã toto;

ypoetory tõ roropa ytapyĩ tao imepỹ nono poe aepyhpyryme jekarõko mã toto.

16 Ypoetory kohmãko ase repe onetara mana,

‘Ajohpãme sã kuakorehmako,’ karyhtao ro eya.

17 Ỹtary tymoke mana ypyty a, typoxine pyra;

nuriame ase jakorõ tomo a.

18 Poetohti tõ yse pyra mã toto;

jeunohnõko mã toto jowomyryhtao.

19 Jepe tõ mã yse pyra ipunaka,

imehnõ pyno exiase repe,

yrome jepeme pyra toehse mã toto.

20 Ipihpyryme rokẽ toehse ywy tupunatãse.

Orihsasaka toehse ywy.

21 Oenupunako ypoko, jepe tomo, Ritonõpo a tapurose jexiryke.

22 Oty katohme yyryhmãko matou, yyryhmary sã Ritonõpo a?

Penekehpyra hmatou sam kamexipory poko ya?

23 “Kure ya exiry jomiry poko wenikehpyra ahno ahtao,

pape pokona tymerose ahtao roropa!

24 Kure roropa exiry jomiry tymerose ahtao kurimene ke xũpu pokona te, topu pokona roropa, jũme ehtohme!

25 Ynara zuaro ase: Jewomane isene mana;

etyhpyryme oehnõko mana jewomase sero nono pona.

26 Ypihpyry tonahkase ahtao ro tyrohsẽ ke,

ynara zuaro ase: sero joko ao Ritonõpo enẽko ase.

27 Ywy roro jenuru ke nymyry mokyro enẽko ase,

mokyro waro exĩko ase rahkene.

Moro sehxo ywy yronymyryme!

28 Typoremãse exiase ynara karyke oya xine:

‘Otãto mokyro sam kamexipõko sytatou?

Ipokoino rokẽ moro popyra ehtoh toehse eya.’

29 Yrome Ritonõpo tapemã zuno ehtoko.

Moro ke popyra exiketõ wãnohnõko Ritonõpo mana.

Tuaro ehtoko, Apiakane nae mana,

kymarokõ apiakãko mana.”