46
Ejitu poremãkatopo Karakemi po
1 Ritonõpo Kuesẽkõ tõturuse ya ahno tõ poko. 2 Tõturuse ya Neko tõ poko, Ejitu tuisary, isoutatu tõ maro, typoremãkase aexityã poko Karakemi po, tuna Eupyrati pũto. Tuisa Napukotonozo a Papironia tuisary a typoremãkase Neko tomo. Moro toehse asakoropane jeimamyry taropose ahtao Jeoakĩ a, Joxia mũkuru, Juta põkõ esemy. Ejitu poko ynara tykase Ritonõpo:
3 “Ejitu põkõ soutatu tõ tuisary ynara kohtãko mã toto:
‘Osewomatoh apoitoko arotohme oytorykõme etonatoh taka!
4 Kawaru tõ kyryry tyritoko oekykõ pona õtyritohkõme epona xine!
Atakenaka ytotoko,
kapasete tõ tyritoko opuhpyrykõ pona!
Awaratãkõ aehtotoko.
Soutatu zupõ amurutoko!’
5 “Yrome oty enẽko ywy?”
ãko, ekaropõko Ritonõpo mana.
“Ejitu põkõ soutatu tõ epãko mã toto, enaromỹke toexirykõke.
Torehse toto, tururume ytõko toto axiny,
tỹkakoxi xine osenuhmara mã toto.
‘Emero rokẽ po omye xine erehtoh nae,
etapatopo, enahkatopo, orihmapotopo!’ ãko Ritonõpo mana.
6 Mokaro axĩ tururume ytoketõ epasaromepyra mã toto;
soutatu tõ mã osewomasaromepyra mã toto.
Inikahpozakoxi, tuna Eupyrati pũto osetapãko mã toto,
epukãko mã toto.
7 Onoky mokyro, onuhkety, tuna Niro samo, zueme tuna exiryhtao pehme toehse ahtao, ehpio tyneryse ahtao.
8 Ejitu mokyro, onuhnõko Niro samo zueme ahtao, tuna samo ehpio kõ tyneryse ahtao.
“Ejitu ynara ãko mana:
‘Onuhnõko ase zueme tuna ehtoh samo, sero nono pehkatohme;
pata tõ enahkãko ase epõkõ maro.
9 Ejitu põkomo, kawaru tõ aropotoko, kahu tõ roropa axĩ toto ytotohme etonatoh taka!
Soutatu tõ aropotoko etonatoh taka, orutua komo Etiopia poe Ripia poe roropa, osewomatoh aronanomo, Rute põkõ roropa, emese kure pyrou ekomananomo tytakykõ ke.’ ”
10 Sero ẽmepyry ahno apiakatohme Ritonõpo a, Kuesẽkõ Jamihmehxo Exiketyme mana!
Seroae, emỹpõko mana;
seroae, topetõkara wãnohnõko mana.
Itapemã mokaro enahnõko mana tuesapare toehtoh pona,
imunurukõ ẽnõko mana ise pyra toehtoh pona.
Seroae, tynetapatyã zahkãko Ritonõpo Jamihmehxo Exikety mana inikahpozakoxi, tuna Eupyrati pũto.
11 Ejitu põkomo, ytotoko Kireate pona opi zupise!
Oepitykõ toiparo rokẽ mana,
popyra oehtoh ekurãkasaromepyra mana.
12 Imeimehnõ nonory po tokãtose oehxirotopõpyry poko, oporemãkatopõpyry poko.
Oxitarykõ totase ahno a ononorykõ poro porehme.
Imepỹ pona soutatu tõsetapase,
oximaro toepukase toto nono pona.
Napukotonozo oehtopõpyry poko
13 Papironia tuisary, Napukotonozo tooehse ahtao Ejitu tõ nonory poremãkapose, Ritonõpo tõturuse ya, ynara tykase:
14 “Ynara kahtoko pata tõ po, Ejitu po:
Mikitou po te, Mẽpi po te, Tapane po, enara:
‘Opyrekõ apoitoko õsewomatohkõme;
okyryrykõ emero tonahkasẽme exĩko etonatoh tao!
15 Oty katohme oneponãmarykõ jamihme exikety toepukase?
Tomase ynororo exiryke Ritonõpo a nono pona.’
16 Ejitu põkõ soutatu tõ tõsetapase; toepukase toto.
Ynara tykase toto oseya:
‘Ehmaropa axiny!
Ehmaropa tapyi taka kuesaka xine ropa, osewomatohme, orihpyra kuehtohkõme, epatohme kuepetõkara winoino!’
17 Ejitu esẽ esehpatoko sero esety kasenato ke:
‘Panaikato ke epyrypakety, tokurehse exikety.’
18 “Ywy, tuisame Exikety oturũko ase.
Ywy ase Ritonõpo, Isene Exikety.
Jesety mã Oesẽkomo, Jamihmehxo Exikety.
Ypy Tapoa imehnõ ypy tõ motye kaehxo mana.
Ypy Karameru roropa kaehxo mana tuna konõto epoe,
morohne sã mokaro aehtyã osetapase amaro xine
omotye xine jamihme mã toto, Ejitu põkomo.
19 “Ejitu põkomo, atakimatoko tarose oehtohkõme imehnõ poetoryme!
Pata Mẽpi patãpome exĩko,
tomasẽme exĩko nono pona,
tytaõke pyra exĩko mana.
20 Pui ẽxiry sã Ejitu mana kurano, tupurusẽme moromoroimo a inikahpoe aehtyamo a.
21 Soutatu tõ epehmãko mã toto takorehmatohkõme repe,
yrome pui mũkuru tõ sã rokẽ mã toto.
Osetapara mã toto.
Toeramase rokẽ mã toto emero epatohme, toto ehxirotoh toehse exiryke,
toto enahkatoh toehse mana.
22 Ejitu põkõ epãko mã toto,
etakinãko mã toto okoi samo, soutatu tõ epetõkara oepyryke.
Wywy ke osetapãko mã toto apotopokõ akohnanõ samo.
23 Itu akohnõko mã toto, tupime moro taka omomyry ahtao ro;
isoutatu tõ tuhke mã toto, ikuhpỹme, taparara tõ tuhke exiry motye.
24 Ejitu põkõ toehxirose mã toto,
typoremãkase toexirykõke ahno a inikahpoe exiketomo a.
Ywy Ritonõpo oturuno.”
25 Ritonõpo, Jamihmehxo Exikety, Izyraeu tõ Esemy ynara tykase:
— Amõ wãnohnõko ase, Tepa põkõ neponãmarykõ, Ejitu tõ roropa te, toto neponãmarykõ roropa te, ituisary tõ maro. Ejitu tuisary wãnohnõko ase, ahno roropa emero, mokyro enetupuhnanõ towomanekõme. 26 Mokaro ekarõko ase toto etapary se exiketomo a, tuisa Napukotonozo a hkotano, Papironia esemy ipoetory tõ maro. Yrome imeĩpo mokaro ahno oehnõko ropa mã toto Ejitu nonory pona ehse. Ywy, Ritonõpo, oturuno.
Typoetory tõ pynanohnõko Ritonõpo mana
27 “Ypoetory Jako pakomotyamo, enaromyra ehtoko!
Izyraeu tomo oserehpyra ehtoko!
Opynanohtorỹko ase moro nono poe, moe otũtatohkõme ropa,
moroto imehnõ poetoryme matose.
Oehnõko ropa matose oesaka xine kure rokẽ ehse,
torẽtyke pyra, towomase.
Mame imehnõ oerehpyra xine exĩko mã toto.
28 Amaro xine exĩko ase opynanohtohkõme.
Imeimehnõ nonory põkõ enahkapõko ase
emero porehme moro pona taropose matose ya,
yrome amarokõ oenahkapopyra exĩko ase.
Tuãnohsẽme exĩko matose roropa repe,
yrome awãnopyrykohtao ya,
zae rokẽ awãnohtorỹko ase;
onymotyẽkara ase.
Ywy Ritonõpo oturuno.”