Epereu tõ Neneryme Imerohpyry sero
Sero pape merohpõ waro pyra sytatose. Otarãme Pauru kynexine, otarãme Aporu. Sero pape taropose Jezu enetupuhnanõ neneryme, juteu tõ neneryme tuhke pata tõ punero. Tyorõ poko toto amorypary se toehse imehnõ juteu tomo Jezu rumekatohme ropa eya xine, pake toehtopõpyry sã ropa toto eramatohme ropa.
Yrome tynymerohpyryae Ritonõpo omipona exiketõ akorehmary se kynexine sero pape merohpono tãkye toto ehtohme Jezu maro toytorykõ poko. “Oesẽkõme Jezu enetuputyry poko oya xine onurumekara ehtoko oetuarimarykohtao ro,” ãko eya xine mana. “Jezu osenetupuhtoh kure kuhse mana, Jezu ehtoh roropa kure kuhse mana. Pake kuehtopõpyrykõ motye kure mana,” ãko mana.
1
Ritonõpo mũkuru poko
1 Pake Ritonõpo kynoturune kytamurukomo a urutõkõ ae. Tuhke rokẽ kynoturune. Urutõkõ osenetupuhtoh ae kynoturune. Aosenehtohkõ ae roropa kynoturune eya xine. 2 Morarame pake hkopyra kynoturune ropa Ritonõpo kyya xine Tumũkuru ae. Tumũkuru a senohne emero tokarose Ritonõpo a. Ynororo a sero nono tõkehko tyripose eya aporo, seropõkõ emero. Mame tymenekase ynororo Ritonõpo a emero esẽme ehtohme, sero nonopõkõ esẽme, kapuaõkõ esẽme roropa, enara ehtohme. 3 Ime aexiry saerehkane sã mana. Ritonõpo ime exiry saaro ime aexiry mana ipunaka. Mame Ritonõpo ime exiry enepõko mana seropõkomo a. Tyjamitunuru ke tynyrityã onenahkapopyra mana. Morarame seropõkõ rypyry korokaxĩpo kỹporohne kapu ao, tuisamehxo, Ritonõpo maro. Emero esẽme Ritonõpo mana.
Tynenyohtyã motye Ritonõpo mũkuru ehtoh poko sero
4 Tynenyohtyã motye kuhse Tumũkuru tyrise eya. Esety roropa Ritonõpo mũkurume, Tumy wino tapoise eya. Mokyro esety Ritonõpo nenyohtyã esety motye mana. 5 Tumũkuru a ynara tykase Ritonõpo,
“Umũkurume mase.
Seroae omyme osekarõko ase,”
tykase Ritonõpo Tumũkuru a. Yrome tynenyohtyamo a morara kara kynekurehne. Ynara tykase roropa Tumũkuru poko,
“Jũme ase,
umũkurume mana,”
tykase Ritonõpo Jezu poko. Yrome morara kara kynekurehne tynenyohtyã poko. 6 Ynara roropa tykase Ritonõpo Tumũkuru tooehse ahtao sero nono pona,
“Ynenyohtyã emero kure Umũkuru rĩko mana.
‘Kure mase, tuisa imehxo,’ ãko toh mana eya,”
tykase Ritonõpo. 7 Yrome ynara tykase tynenyohtyã poko,
“Tyryrykane sã ynenyohtyã rĩko ase axĩ toto ytotohme.
Apoto sã roropa ynamoto tõ ripõko ase orẽpyra toto ehtohme,”
tykase. 8 Yrome Tumũkuru poko ynara tymeropose Ritonõpo a,
“Ritonõpome mase.
Tuisame oehtoh exikehpyra mana jũme.
Zae oexiryke ipunaka tuisa kurãme mase.
9 Zae ehtoh se mase te, popyra ehtoh zehno roropa mase.
Morara exiryke kymenekase, tãkye ipunaka oehtohme
imehxo oehtohme roropa, imehnõ motye kuhse oehtohme,”
tykase Ritonõpo Tumũkuru a. 10 Ynara tykase roropa Ritonõpo eya,
“Oya sero nono tyrise apitoryme.
Kapu roropa tyrise oya, oemary ke, tuisame oexiryke.
11 Enahnõko mã onyrityã repe.
Yrome omoro orihpỹme mase jũmãme.
Xihpyryme onyrityã mã exĩko repe upo xityã samo.
12 Upo sã toto amẽnõko ropa mase, toto myakãmatohme.
Yrome omoro mase etyorõmara.
Tãhpome exipyra mase roropa,”
tykase Ritonõpo Tumũkuru a. 13 Ynara tykase roropa Ritonõpo Tumũkuru a,
“Oporohko tãna. Tuisamehxo mexino ymaro.
Ozehnotokõ poremãkapõko ase,
opoetoryme toto rĩko ase roropa,”
tykase Ritonõpo eya. Yrome morara kara kynexine tynenyohtyamo a.
14 Naeroro kuamorepatoxi Ritonõpo nenyohtyã poko. Kapu ae inenyohtyã mokaro. Tupũke pyra rokẽ mã toto. Toto aropõko Ritonõpo mana tarõkõ akorehmatohme. Tynypynanohtyã akorehmase toto aropõko mana.